Qur'onning nafis nusxasi taqdimot qilindi
Sharja xalqaro kitob ko'rgazmasida Qur'oni karimning nafis nusxasi taqdimoti tashrif buyuruvchilar e'tiborini tortdi.
IQNA saytining “Khaleej Times” nashriga tayanib xabar berishicha, bu nafis Qur'on kitobining 11-12-asrlarga oid qo'lyozma nusxasi bo'lib, mashhur eronlik xattot Ibn Bavobning durdona asari sanaladi.
Asl qo'lyozma Myunxendagi Bavariya davlat kutubxonasida saqlanadi. Bu davrda Qur'onning bu turi atigi o'n nusxada chop etilgan.
Mazkur nusxa tadbirda namoyish etilgan bu qimmatbaho asarning aniq o'lchami, uslubi va vizual jozibasi bo'yicha chop etilgan atigi 300 nusxadan biridir.
“Adeva Rare Collectibles” kompaniyasi vakili Florian Strolls bunday deydi: “Bu Qur'on haqiqiy san'at asari bo'lib, zarhal qog'ozga kursiv nasx yozuvida yozilgan oyatlardir”.
U qo'shimcha qildi: “Mazkur qo'lyozma aql bovar qilmaydigan darajada bezatilgan va qo'lyozma san'ati olamida o'ziga xos o'rin tutadi. Har bir suraning sarlavhalari ko'k, oq va qizg'ish jigarrang yozuvda chiroyli tarzda yozilgan. Oyatlar esa ko'k, kumush va nafis atirgul naqshlari bilan ajratilgan. Harflarning o'lchami matematik tamoyillarga asoslangan bo'lib, masshtab birligida arab alifbosining birinchi harfi bo'lgan “Alif” harfining o'lchami qo'llaniladi.
Bir oz chapga qiyshaygan vertikal harflar o'ylangan holda joylashtirilgan va Ibn Bavob maktabidan farq qiladigan uslubni ko'rsatadi”, – dedi Strolls. Uning qo'shimcha qilishicha: “Birinchi sahifaning diqqatga sazovor xususiyati bu ikki sura nomlarining o'ziga xos tartibda joylashuvidir, bu esa Qur'oni karimni noyob san'at asari qiladi”.
O'zbekiston musulmonlari idorasi
Matbuot xizmati
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
