— Men imkon qadar ibodatlarimni pinhona qilishga harakat qilaman, riyo bo'lib qolmasin, deyman. Ko'pchilik ichida ham “men namoz o'qiyman”, deyishga iymanaman. Lekin bir qarindoshim namoz o'qishini ko'pchilik orasida baralla aytadi, ko'p yolg'on so'z aralashtirishi sezilib turadi. Bu gunoh emasmi?
— Ibodatlarning eng afzali maxfiy qilinganidir. Chunki bunday amal riyodan uzoq bo'ladi. Ammo toatni oshkor qilishdan odamlarga yaxshilikni targ'ib qilish, ularga namuna bo'lish niyat qilinsa, bunday amal ham afzal hisoblanadi. Rasululloh sollallohu alayhi vasallam: “Maxfiy qilingan ish oshkora qilingan ishdan afzal, agar oshkora qilingan ish unga ergashishlari uchun qilingan bo'lsa, u afzaldir”, dedilar (Hakim Termiziy rivoyati).
Alloh taolo banda qilayotgan barcha ishlarni ko'rib, bilib turadi. Muhimi, niyat xolis Alloh uchun bo'lsin. Zero, ulamolar: “Odamlar uchun amalni tark qilish riyo va odamlar uchun amal qilish shirk”, deyishgan.
Muhammad Ayyub HOMIDOV
O‘tgan solihlardan qoida va meros bo‘lgan so‘z bor:
من رام العلم جملة ذهب عنه جملة
."Kimki ilmning hammasini birdaniga o‘rganishni istasa, ilmning hammasidan quruq qoladi"
Oz vaqtda ilmning hammasini o‘rganib olaman, deya xomtama bo‘lgan talaba, ilmning hammasidan bebahra qoladi. Hech narsaga erishmaydi.
Qur’oni karim Rasululloh sollallohu alayhi vasallamga 23 yil davomida nozil bo‘lgan...
Imom Burhoniddin Marg‘inoniy rahimahulloh "Hidoya" asarini 13 yil mobaynida ro‘zador holda yozganlar...
Imom Buxoriy rahimahulloh "Sahihul Buxoriy"ni 16 yilda, tahorat olgan holda va ikki rakat nafl namoz o‘qib, yozganlar...
Ilm kitoblari harfma-harf va kalima-kalima izohlab o‘rganiladi. Igna bilan quduq qazishga sabr-toqat, oliy himmat, intizom va uzoq vaqt zarur. Shoshqaloqlik va puxtalik bir-biriga zid – hech qachon jamlanmaydi.
Muhtaram tolibi ilm! Ilmning boshi sabrdir: kitobga sabr qilasiz, ustozga sabr qilasiz, yashayotgan shahringizga sabr qilasiz, hamdarslaringizga sabr qilasiz va hokazo.
Ilm olish lazzatiga erishgach, sabr maqomidan rozilik va muhabbat maqomiga o‘tib olgach hayotingiz mazmuni kitob va ustozlar suhbatiga aylanadi.