Al-Azkor: Muallif muqaddimasi (audio)
Imom Navaviyning qalamiga mansub “Al-Azkor” kitobining audio shaklidan bahramand bo'ling!
Muslim.uz portali ijodkorlari xalqimizga turli mavzudagi diniy-ma'rifiy kitoblarning audio shaklini taqdim etib kelyapti. Ushbu yo'nalishdagi xayrli ishlarning davomi sifatida aziz muxlislar e'tiboriga Islom olamining mo''tabar olimlaridan hisoblangan Imom Navaviyning “Al-Azkor” kitobi audiosini havola etamiz.
Mazkur kitobning audiosini eshitish orqali Payg'ambarimiz sollallohu alayhi vasallamning salavotu salomlar, zikr va duolar to'g'risidagi hadislaridan bahra olasiz.
Ma'lumot uchun, Din ishlari bo'yicha qo'mitaning 2018 yildagi 4942-sonli xulosasi asosida Imom Navaviyning “Al-Azkor” kitobi nashr etilgan. Kitobni arabchadan o'zbek tiliga o'girgan tarjimon Anvar Ahmad, mas'ul muharir Shayx Abdulaziz Mansur sanaladi.
Alloh taolo ushbu xayrli ishni muvaffaqiyatli va mo'min-musulmon xalqimiz uchun manfaatli qilsin.
O'zbekiston musulmonlari idorasi matbuot xizmati
Buxoroda Qur’on musobaqasi o‘tkazildi
O‘zbekiston Respublikasi Davlat mustaqilligining 35 yilligi munosabati bilan Buxoro viloyatida faoliyat olib borayotgan imom-xatib va imom-noiblar o‘rtasida “Qur’on tinchlikka buyuradi” shiori ostida Qur’on musobaqasi o‘tkazildi.
Ochilish marosimida Buxoro viloyati bosh imom-xatibi Jobir domla Elov so‘zga chiqib, mazkur ma’rifiy tadbirning ahamiyati haqida so‘zlab, ishtirokchilarga muvaffaqiyat tiladi.
Musobaqani o‘tkazishdan ko‘zlangan maqsad diniy soha xodimlarining Qur’oni karim bo‘yicha bilim va mahoratini yanada oshirish, ular o‘rtasida o‘zaro hamjihatlik muhitini shakllantirishdir.
Bellashuvda viloyatning tuman va shaharlarida faoliyat yuritayotgan 10 nafar imom-xatib va imom-noib ishtirok etib, Qur’oni karimni o‘qish va yoddan bilish borasidagi bilim va mahoratini namoyish etishdi.
Birinchi o‘ringa Peshku tumani “Chiqirchi” jome masjidi imom-noibi Afzal Shavkatov sazovor bo‘ldi. Ikkinchi o‘rin Buxoro shahridagi “Volidi Abdulazizxon” jome masjidi imom-noibi Abduvohid Akramovga, uchinchi o‘rin Jondor tumani “Raboto‘g‘lon” jome masjidi imom-xatibi Shuhrat Sherovga nasib etdi.
G‘oliblarga diplom va qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
