Halq bankida “Islomiy darcha” ochiladi
O'zbekiston aholisining katta qismini islom diniga e'tiqod qiluvchi yurtdoshlarimiz tashkil etadi. Bank Axborot xizmati bildirishicha, bu esa mamlakatda islom moliya sohasini jadal rivojlantirish imkonini beradi. Muhimi, bu borada amaliy-sa'y-harakatlar boshlangan.
Mana, endi aktsiyadorlik tijorat Halq banki ham ana shu qizg'in jarayonning faol ishtirokchisiga aylandi. Ya'ni Hususiy sektorni rivojlantirish bo'yicha Islom korporatsiyasi (ICD) bilan istiqbolli shartnomani imzoladi. Unga muvofiq, bankda shar'iy tamoyillar asosida faoliyat yuritadigan “Islomiy darcha” ochilishi rejalashtirilmoqda.
— Mazkur xayrli tashabbus natijasi, birinchi navbatda, musulmon yurtdoshlarimiz uchun keng imkoniyat va qulayliklar yaratadi, — deydi Halq banki Boshqaruvi Raisi Farhod Salamov. — Qolaversa, bundan bankimiz ham katta manfaat ko'rishi, shubhasiz. Ezgu niyatlar bilan boshlayotgan ishimiz kelajakda kutilgan natijalarni berishiga ishonchim komil. Negaki, Hususiy sektorni rivojlantirish bo'yicha Islom korporatsiyasi — uzoq yillik moliyaviy hamkorimiz va vaqt sinovidan o'tgan ishonchli sherigimizdir.
— Islom moyaliyasining asosiy maqsadlaridan biri, bu real iqtisodiyotga ijobiy ta'sir qilish va uning o'sishini ta'minlashdan iborat, — deydi Hususiy sektorni rivojlantirish bo'yicha Islom korporatsiyasi Bosh direktori Ayman Sedjini. — Shu maqsadda Halq banki bilan hamkorlikda “Islomiy darcha” ochishni maqsad qildik. Albatta, bu kelishuviz mamlakatda bank xizmatlaridan foydalanmayotgan mijozlar uchun ham qo'l keladi. Chunki, bu “Islomiy darcha”ni ochish orqali mijozlarga va jismoniy shaxslarga ularning e'tiqodidan kelib chiqqan holda muqobil moliyaviy xizmat turlarini taklif qilish hamda ularning moliyaviy ehtiyojlarini qondirish mumkin bo'ladi.
Onlayn muloqot yakunida Halq banki Boshqaruvi Raisi hamda Islom korporatsiyasi Bosh direktori tomonidan “Islomiy darcha” ochish yuzasidan shartnoma imzolandi.
O'zbekiston musulmonlari idorasi matbuot xizmati
Mehr-saxovat va inson qadri — ezgulikka yo‘g‘rilgan xayrli tashabbus
Insonga mehr ko‘rsatish, muhtojning holidan xabar olish, bemorga tasalli berish va ehtiyojmandlarga ko‘mak qo‘lini cho‘zish xalqimiz ma’naviyatining azaliy fazilatlaridandir. Islom ta’limotida ham saxovat, mehr-oqibat va inson qadrini ulug‘lash eng ulug‘ amallardan biri sifatida e’tirof etilgan. Chunki bir insonning ko‘nglini ko‘tarish, uning qalbiga umid va ishonch bag‘ishlash jamiyatda mehr-muhabbat, hamjihatlik va totuvlikni mustahkamlaydi.
Shu ezgu qadriyatlarni hayotga tatbiq etish, aholining ehtiyojmand qatlamlarini qo‘llab-quvvatlash va yurtdoshlarimiz qalbida mehr-shafqat tuyg‘ularini yanada kuchaytirish maqsadida 2026 yil 13 avgust kuni Samarqand viloyati Urgut tumanida keng ko‘lamli ma’naviy-ma’rifiy hamda xayr-saxovat tadbirlari o‘tkazildi.
Mazkur xayrli tadbirlarda Samarqand viloyati bosh imom-xatibi vazifasini vaqtincha bajaruvchi Nursultonxon domla Abdumannonov, viloyat bosh imom-xatibi o‘rinbosari Xayrullo domla Sattarov, VAQF xayriya jamoat fondi Samarqand viloyati filiali rahbari Yoqubjon domla Mansurov, uning o‘rinbosari A.Sultonov, shahar va tuman bosh imom-xatiblari, «Haj–2026» ziyoratchilari, mahalla faollari va nuroniylar ishtirok etdilar.
O‘zbekiston Respublikasi davlat mustaqilligining 35 yilligi munosabati bilan o‘tkazilgan ushbu xayrli aksiya doirasida ijtimoiy himoyaga muhtoj, kam ta’minlangan va boquvchisidan ayrilgan 300 ta oila holidan xabar olindi. Ularning xonadonlariga tashrif buyurilib, turmush sharoitlari o‘rganildi, oilalarga zarur oziq-ovqat mahsulotlari yetkazib berildi.
Tashriflar davomida bemor va keksalarning holidan xabar olinib, ular bilan samimiy suhbatlar o‘tkazildi. Ularning haqqiga shifo, xonadonlariga fayzu baraka, yurtimizga tinchlik-xotirjamlik tilab duolar qilindi. Zero, muhtojning ko‘nglini ko‘tarish va uni yolg‘iz emasligini his ettirish ham insonparvarlikning yuksak ko‘rinishidir.
Shu bilan birga, hayotida turli ijtimoiy qiyinchiliklarga duch kelgan hamda yot g‘oyalar ta’siriga tushib qolish xavfi mavjud bo‘lgan ayrim fuqarolar bilan yakka tartibda muloqotlar tashkil etildi. Suhbatlarda sof e’tiqod, oila muqaddasligi, farzand tarbiyasi, halol mehnat, Vatanga sadoqat, milliy va diniy qadriyatlarga hurmat, shuningdek, turli buzg‘unchi g‘oyalarga nisbatan ma’naviy immunitetni mustahkamlash masalalari hayotiy misollar asosida tushuntirildi.
Tadbirlar doirasida Urgut tumanidagi jome masjidlarda peshin namozidan so‘ng ma’naviy-ma’rifiy uchrashuvlar ham o‘tkazildi. Ularda mehr-oqibat, qo‘ni-qo‘shnichilik munosabatlarini mustahkamlash, yoshlarni milliy va diniy qadriyatlarga sodiqlik ruhida tarbiyalash, oila tinchligini asrash, jamiyatda o‘zaro hurmat va ahillik muhitini qaror toptirish kabi dolzarb mavzular atroflicha yoritildi.
Uchrashuvlar yakunida mamlakatimiz tinchligi, xalqimiz farovonligi, Vatanimiz ravnaqi va yosh avlodning ilmli, odobli hamda vatanparvar insonlar bo‘lib voyaga yetishi haqida xayrli duolar qilindi.
Bugun yurtimizda inson qadrini ulug‘lash, aholining ehtiyojmand qatlamlarini har tomonlama qo‘llab-quvvatlash, jamiyatda mehr-saxovat va o‘zaro g‘amxo‘rlik muhitini qaror toptirishga alohida e’tibor qaratilmoqda. Urgut tumanida o‘tkazilgan mazkur xayrli tadbirlar ham ana shu ezgu maqsadlarga xizmat qilib, aholi o‘rtasida hamjihatlik, bag‘rikenglik va insonparvarlik tuyg‘ularini yanada mustahkamladi.
Mehr bor joyda ishonch, saxovat bor joyda baraka, inson qadri ulug‘langan jamiyatda esa tinchlik va farovonlik qaror topadi. Ana shunday ezgu amallar xalqimiz o‘rtasidagi birdamlik rishtalarini mustahkamlab, yurtimizning yanada obod va fayzli bo‘lishiga xizmat qiladi.
Samarqand viloyati vakilligi matbuot xizmati
