Mo'minlarning onasi Sofiyya bint Huyay roziyallohu anhodan rivoyat qilinadi: «Nabiy sollallohu alayhi vasallam e'tikof o'tirgan edilar. U zotni ziyorat qilgani borib, gaplashib o'tirdim. So'ng ketish uchun turdim. U zot ham meni kuzatib qo'yish uchun turdilar.
Shunda ansorlardan ikki kishi o'tib qoldi. Ular Nabiy sollallohu alayhi vasallamni ko'rishlari bilan yurishni tezlatishdi. Shunda Nabiy sollallohu alayhi vasallam: «Shoshilmanglar! Bu Sofiyya bint Huyay», dedilar. Ular: «Subhanalloh, ey Allohning Rasuli (sizni begona bilan turibdi deb o'ylarmidik?!)» deyishdi. Shunda Rasululloh sollallohu alayhi vasallam: «Shayton odam bolasining qon oqar joylarida yuradi. Shuning uchun qalbingizga biror yomonlik (yoki biron narsa) tashlashidan qo'rqdim», dedilar» Imom Buxoriy va Muslim rivoyat qilishgan.
“Solihlar gulshani” kitobidan