Taqvoning sifatlari
Taqvodor insonning sifatlari quyidagilar:
– Ota-onaga yaxshilik qilish.
– Qarindoshlik rishtalarini bog'lash.
– Qo'shnilarga yaxshi muomalada bo'lish.
– Shijoatli, kechirimli bo'lish.
– Odil, shirinso'z bo'lish.
– O'zgalarni o'zidan ustun qo'yish.
– Allohning azobidan qo'rqish.
– Iffatli bo'lish, ko'zi, qulog'i, tili va boshqa a'zolarini Alloh harom qilgan narsalardan tiyish...
Insondagi taqvo alomatlari
– Islom shariati belgilagan chegaradan chiqmaydi.
– Allohga bandalik izhor qiladi.
– Qalbi kek, adovat, nafrat, hasaddan salomat bo'lib, muhabbat, muloyimlik va mehrga to'la, Allohning zikri bilan obod bo'ladi.
– Ilm-ma'rifat, yaxshilik, fazilatlarni yoyadi. Odamlarning orasini isloh qiladi.
– O'zgalarga yordam beradi, manfaat ulashadi.
Taqvodorlarning ajr-savobi
– Alloh taolo taqvodorlarni O'ziga do'st, valiy qilib oladi. U Zot: «Uning valiylari faqatgina taqvodorlardir», degan. (Anfol surasi, 34-oyat).
– Alloh taqvodorlarni suyadi. U Zot: «Yo'q! Kim ahdiga vafo qilsa va taqvo qilsa, Alloh taqvodorlarni sevadir», degan. (Oli Imron surasi, 76-oyat).
– Alloh solih amallarni qabul qiladi. U Zot: «Albatta, Alloh taqvodorlardangina qabul qiladir», degan. (Moida surasi, 27-oyat).
– Yaxshi oqibat. Alloh taolo: «Va oqibat taqvodorlarnikidir», degan (A'rof surasi, 128-oyat).
– Jannat. Alloh taolo: «Albatta, taqvodorlar jannatlar va chashmalardadir», degan. (Hijr surasi, 45-oyat).
– Allohning roziligiga erishadi, savob tarozisi og'ir keladi, omonlik maqomida bo'ladi. Alloh taolo: «Albatta, taqvodorlar omonlik maqomidalar», degan. (Duxon surasi, 51-oyat).
– Qiyomat kuni Rasululloh sollallohu alayhi vasallamga yaqin bo'ladi, chunki u komil iymon egasidir.
– Oxiratdagi martabasi ulug' bo'ladi. Dunyoda odamlarning muhabbatini qozonadi.
– Umri barakali bo'ladi.
– Yo'li ochiq, rizqi keng bo'ladi. Alloh taolo: «Kim Allohga taqvo qilsa, uning yo'lini ochib qo'yadir va unga o'zi o'ylamagan tarafdan rizq berur», degan. (Taloq surasi, 2-3-oyatlar).
Muhammad Ali Muhammad Yusuf
tayyorladi
YUZDAN ZIYOD OILAGA KO‘MAK BЕRILDI
Sayyor yig‘ilish
Bir kishiga ko‘maklashsangiz, u qanchalik shod bo‘ladi.
Endi bir emas, o‘n emas, yuzdan ziyod oilaga ham ma’naviy, ham ma’rifiy, ham moddiy ko‘mak berilsa, qancha kishining ko‘ngli ko‘tarilishini, sizni alqashini tasavvur qilib ko‘ring-a.
Bugun Toshkent shahar bosh imom-xatibi Abduqahhor domla Yunusov boshchiliklarida poytaxtimizning Yangi hayot tumanidagi «Niyozmat ota» jome masjidida ma’naviy-ma’rifiy sayyor yig‘ilish o‘tkazildi.
Tadbirda Toshkent shahar bosh imom-xatibi o‘rinbosari Ergashali domla Rustamov, Toshkent shahar tumanlari bosh imomlari, imom-domlalar, «Haj 2026» ishtirokchilari qatnashdilar.
Tumandagi ijtimoiy-ma’naviy muhitni yanada sog‘lomlashtirish maqsadida mahallalarga tashrif buyurildi. Adashib aqidasi buzuq turli oqimlar ta’siriga tushib qolgan shaxslar, ajrim yoqasiga kelib qolgan oilalar bilan ham suhbatlar olib borildi.
Katta hayot tajribasiga ega hoji otalar, hoji onalar imom-xatiblar, otinoyilar bilan birgalikda olib borgan ma’rifiy targ‘ibotlari o‘z samarasini berdi: yuzdan ziyod xonadonga ham ma’naviy, ham moddiy yordam ko‘rsatildi.
* * *
Toshkent shahar bosh imom-xatibi Abduqahhor domla Yunusov Yangi hayot tumanidagi mahallalarga tashrif buyurib, u yerdagi bir qancha xonadonlarga kirib, xonadon egalarining qalblariga xursandchilik ulashdilar.
Quvonarlisi, yangi o‘quv yili arafasida homiylarni jalb qilgan holda 30 ta haqdor xonadon sohiblari farzandlariga sumka, o‘quv qurollari hadya etildi.
Yuzdan ziyod xonadon egalarining ko‘ngli ko‘tarilib, ular ezgu ishlarning boshida turgan barcha aziz insonlarning haqlariga xayrli duolar qilishdi.
Toshkent shahar vakilligi
Matbuot xizmati
