Hayrli ishga ko'maklashganlarga minnatdorlik bildirildi
O'zbekiston musulmonlari idorasi «Zo‘r» TV telekanali bilan faol hamkorlik qilib kelmoqda. Jumladan, ushbu telekanalda efirga uzatilayotgan “Meni kechir” ko'rsatuvida Diniy idora xodimlari, imom-xatiblar ekspert sifatida qatnashmoqda.
Kuni kecha «Zo‘r» TV telekanali mutasaddilari ushbu ko'rsatuvga hissa qo'shib kelayotgan bir guruh O'zbekiston musulmonlari idorasi xodimlari: Sherzod Yo'ldoshev, Hikmatullo Toshtemirov, Fazliddin Mamadaliyev va Ilhomjon Madaliyevlarga minnatdorlikchilik tariqasida “Tashakkurnoma” berdi.
Ma'lumot uchun, telekanalning “Meni kechir” ko'rsatuvida turli sabab bilan orasiga sovuqchilik tushgan insonlar muammosi o'rganilib, soha mutaxasislari ishtirokida ko'rsatuv qahramonlariga kerakli tavsiyalar beriladi. Natijada ko'plab insonlar o'rtasi isloh bo'lib, qarindoshlik va qadrdonlik munosabatlari tiklanadi.
Dinimiz ta'limotiga ko'ra, ezgulik Qur'oni karim va hadisi shariflarda buyurilgan va targ'ib qilingan amallardir.
Qur'oni karimda marhamat qilinadi: “Ezgulik va taqvo (yo'li)da hamkorlik qilinglar, gunoh va adovat (yo'li)da hamkorlik qilmanglar! Allohdan qo'rqinglar! Albatta, Alloh azobi qattiq zotdir” (Moida ,2-oyat).
Bu haqda Imom Zamaxshariy: “Oyatda umuman ezgulik va taqvoning har qanday ko'rinishini, gunoh va dushmanlikning barcha turlari nazarda tutilgan, deyish ham mumkin. Bu holda ham o'zaro kechirimli bo'lish va (yaxshiliklarda) yordamlashish ma'nosi anglashiladi”, deydi.
Demak, musulmon kishi insonlar orasini isloh qilish ishlarida ham hamkor bo'lishi kerak ekan. O'zbekiston musulmonlari idorasi ana shunday xayrli ishlarda doimo hamkor va yordamchi bo'lishga tayyor.
O'zbekiston musulmonlari idorasi matbuot xizmati
Imomlar 11 ming nafardan ziyod o‘quvchiga maktab forma va o‘quv qurollari hadya qilishdi
Mustaqilligimizning 35 yillik ayyomi hamda yangi o‘quv yili munosabati bilan O‘zbekiston musulmonlari idorasi Masjidlar bilan ishlash bo‘limi tomonidan yurtimiz bo‘ylab keng ko‘lamli xayriya tadbirlari o‘tkazildi.
Mazkur xayrli tashabbus asosida Respublikamizda faoliyat yuritayotgan 2 161 ta masjid xodimlari ishtirokida 11 144 nafar kam ta’minlangan, ijtimoiy himoyaga muhtoj hamda boquvchisini yo‘qotgan oilalar farzandlariga maktab formalari va o‘quv qurollari beg‘araz hadya qilindi.
Ushbu aksiya doirasida ajratilgan ko‘makning umumiy miqdori 4 milliard 929 million 995 ming so‘mni tashkil etdi.
Tadbirdan ko‘zlangan asosiy maqsad – yosh avlodning sifatli ta’lim olishiga ko‘maklashish, ularni yangi o‘quv yiliga munosib tayyorlash hamda qalblarida bayram quvonchi ulashishdir.
Istiqlol bayrami arafasida amalga oshirilayotgan bunday xayriya tadbirlari yurtimizda inson qadri, bolalar manfaatlari va ijtimoiy himoyaga muhtoj qatlamlarni qo‘llab-quvvatlashga alohida e’tibor qaratilayotganining amaliy namunasi, deyish mumkin.
O‘zbekiston musulmonlari idorasi
Matbuot xizmati
