YaNGI LOYIHA: “PYeShQADAMLAR” KO'RSATUVI
O'zbekiston musulmonlari idorasi tasarrufidagi “Ko'kaldosh” bilim yurti bitiruvchisi No''monxon Yahyoxon bilan saodat asriga sayohat qilib, sahobalar hayotiga oid ta'sirli lavhalarni yangi tashkil etilgan “Peshqadamlar” loyihasida yoritib borish rejalashtirilgan.
Aziz muxlis, muslim.uz ijodkorlari Allohning yordami ila yana bir xayrli loyihaga qo'l urdi. Bundan maqsad Islom dini ma'rifatini Hazrati Payg'ambarimiz Muhammad sollallohu alayhi va sallamdan o'rganib, keyingi avlodlarga etkazib ketgan sahobalar hayotiga chuqur nazar solib, din rivoji yo'lida qilgan buyuk xizmatlarini ko'rsatib, ibrat olish sanaladi.
Islom tarixi sahobalar hayoti bilan chambarchas bog'liq. Ular payg'ambarlardan keyin insonlarning eng komil va fozillaridir. Sahobalarning eng yaxshilari to'rt xalifa, keyin jannatga kirishi bashorat qilinganlar, Badr va Uhud, Rizvon ishtirokchilari turadi. Shuningdek, ularning birlari ilmda, yana birlari halimlikda, boshqalari esa saxovat yo jasorat bobida peshqadam bo'lganlar. Alloh ulardan rozi bo'lsin.
Mana shunday ma'rifiy loyihalarni har bir talaba, har bir bitiruvchi yoki diniy soha xodimi silsila shaklida olib borishida bizning sayt va ijtimoiy tarmoqlarimiz minbar vazifasini o'tashi mumkin.
Haq taolo ushbu “Peshqadamlar” ko'rsatuvini muvaffaqiyatli qilsin!
O'zbekiston musulmonlari idorasi Matbuot xizmati
@muslimuzportal | @mp3muslim | @diniysavollar
Soha rahbarlari mahallalardagi targ‘ibot va obodonlashtirish ishlari bilan tanishdi
Mamlakatimizda mustaqillik bayramining 35 yilligi munosabati bilan “Mahallada obodlik va mehr-saxovat oyligi” hamda “Dolzarb 40 kunlik” tadbirlari doirasida hududlarda keng ko‘lamli targ‘ibot-tashviqot, obodonlashtirish, xayriya va mehr-oqibat ishlari amalga oshirilmoqda.
Mazkur jarayon bilan yaqindan tanishish maqsadida 4 avgust kuni O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev hamda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi mutasaddilar Toshkent shahri Sergeli tumanidagi “No‘g‘ayqo‘rg‘on”, “Qumariq” va “Ittifoq” mahallalarida bo‘lishdi.
Tashrif davomida soha rahbarlari mahallalardagi ijtimoiy-ma’naviy muhitni yanada sog‘lomlashtirish, xayriya va saxovat ishlarini kengaytirish, obodonlashtirish hamda bunyodkorlik ishlarining borishi bilan tanishdi. Shuningdek, mahalliy hokimiyat vakillari, “mahalla yettiligi”, nuroniylar hamda diniy soha xodimlari ishtirokida ushbu yo‘nalishlarda amalga oshirilayotgan ishlar muhokama qilindi.
Mahallalarda o‘tkazilgan sayyor yig‘inlarda “Jaholatga qarshi ma’rifat bilan kurashish”, oilalarda totuvlikni mustahkamlash, yoshlarni ilm-ma’rifatga yo‘naltirish, ehtiyojmand oilalarni qo‘llab-quvvatlash, farzand tarbiyasi hamda aholi muammolarini hal etishda hamjihatlikni kuchaytirish masalalariga alohida e’tibor qaratildi.
Shu bilan birga, xonadonlar atrofi, ko‘chalar, ariqlar va qabristonlarni obod qilish, ularning ozodaligini ta’minlash bo‘yicha olib borilayotgan ishlar yuzasidan ham tegishli tavsiya va ko‘rsatmalar berildi.
Darhaqiqat, Prezidentimiz ta’kidlaganlaridek, amalga oshirilayotgan islohotlar samarasi, eng avvalo, mahallalar hayotida yaqqol namoyon bo‘lishi va aholi kayfiyatida o‘z aksini topishi lozim. Shu ma’noda, joriy yil yakunida mamlakatimiz bo‘ylab “Eng orasta xonadon”, “Eng fayzli hovli”, “Eng obod ko‘cha” va “Eng namunali mahalla” nominatsiyalari bo‘yicha g‘oliblarning aniqlanishi mazkur ezgu tashabbuslarning mantiqiy davomi bo‘ladi.
O‘zbekiston musulmonlari idorasi Matbuot xizmati
