Shu kunlarda ijtimoiy tarmoqlarda “Vaqf” xayriya jamoat fondi tomonidan yurtimizda istiqomat qilayotgan yordamga muhtoj oilalarga ulashilgan xayriya mahsulotlari oldida qorbobo surati tasvirlangan fotolavhalar turli izohlar bilan tarqatilmoqda.
Qat'iy ta'kidlaymizki, “Vaqf” xayriya jamoat fondi tomonidan tashkil etilgan mehr-muruvvat tadbirlari biror-bir sana yoki ijtimoiy bayramlarga aloqasi ham, qorboboni taklif etishda Fondning o'rni ham yo'q.
Joylardagi tadbirlarning shakli va mazmuni hududlardagi tashkilotlar tomonidan uyushtirilgan bo'lib, bunday farosatsizlikka yo'l qo'ygan mahalliy mutasaddilarni mutlaqo oqlab bo'lmaydi. Hususan mana shu holatga sababchi bo'lgan Surxondaryo viloyati Qumqo'rg'on tumani hokimligi vakillari uzr so'rashlari kerak.
Shunday ekan, tarqatilgan suratlardagi qorbobolarning “Vaqf” xayriya jamoat fondiga hech qanaqa aloqasi yo'q. Bu holat uchun Fond va uning xodimlarini obro'sizlantirish, haqorat va adolatsizlikdir. Har qanday to'g'ri va ishonchli ma'lumotni istalgan vaqtda Fondning o'zidan olish mumkinligini yana bir bor ta'kidlaymiz.
“Vaqf” fondini obro'sizlantirish orqali shuhrat orttirishga urinadiganlar ham borligi har qanday mo'min kishini xavotirga soladi. Aslida, bu ham nafsdagi kasallik bo'lib, shaytoniy qutqu turtki bo'ladi. Mo'min banda bunga hushyor bo'lishi kerak.
So'z isboti bilan deganlaridek, mo'min kishi, avvalo, kalomlarning eng ulug'i – Qur'oni karimga murojaat qiladi. Kalomullohda: «Ey mo'minlar! Agar sizlarga biror fosiq kimsa xabar keltirsa, sizlar (haqiqiy ahvolni) bilmagan holingizda biror qavmga aziyat etkazib qo'yib, (keyin) qilgan ishlaringizga pushaymon bo'lmasligingiz uchun (u xabarni) aniqlab (tekshirib) ko'ringiz!», deb marhamat qilingan (Hujurot, 6).
Mufassirlar oyati karimani sharhlab, keltirilgan har qanday xabarga ishonavermaslikni, agar fosiq kishi (fosiq “fisq” so'zidan olingan bo'lib, lug'atda “qobiqni teshib chiqish” ma'nosini anglatadi. Shar'iy istilohda esa Alloh taoloning toatidan chiqib, ma'siyatlarni yashirmay, uyalmasdan, ochiq-oydin qiladigan odamga “fosiq” deyiladi) biror gap olib kelsa, uni yaxshilab tekshirib ko'rish zarurligini ta'kidlashadi.
Hadisi shariflarda: “Eshitgan narsasini gapiraverish kishining yolg'onchiligiga kifoya qiladi” (Imom Muslim rivoyati), “Musulmon shunday kishiki, uning na qo'lidan, na tilidan musulmonlar ozor ko'rmaydi” (Imom Buxoriy rivoyati), “Birovga zarar berish ham, zarar ko'rish ham yo'q” (Imom Bayhaqiy rivoyati) deyilgan.
Shunday ekan, keng ko'lamli xayriya ishlariga rahna solish maqsadida, tarqatilgan xabarlardan kimga nima naf? Nima maqsadda shunday qilindi? Oyati karimaga ko'ra, xabar tekshirilib ko'rildimi, “Vaqf” fondining biror mas'ulidan so'raldimi? Hadisi sharifga binoan eshitgan narsasini aniqlashtirmasdan turib, o'zining ijtimoiy tarmoq sahifalariga qo'yib yuborgan kishilar Fondga ziyon-zahmat etkazgan, obro'sizlantirgan bo'lib qolmadilarmi?!
Qayd etish kerakki, sinovlar ketidan sinovlar bo'lgan joriy yilda yurtimizdagi ehtiyojmand va yordamga muhtoj oilalarga yordam ko'rsatish, ularning ko'ngillariga ro'shnolik olib kirish va dardu tashvishlarini aritish yo'lida Fond tomonidan yil davomida juda ko'p xayriya ishlari amalga oshirib kelinmoqda. Mana shunday mehr-muruvvat tadbirlari shu yilning dekabr' oyida ham keng ko'lamda bajarildi.
Muxtasar aytganda, har bir mahalladan 10 nafardan jami 91550 nafar kam ta'minlangan oilalarga oziq-ovqat mahsulotlari ulashildi.
Mazkur xayriya mahsulotlari joylardagi mutasaddi tashkilotlar vakillari, mahalla faollari, jamoatchilik vakillari hamda ko'ngillilar ishtirokida tayyorlandi va ehtiyojmand oilalarga etkazildi.
Shuningdek, 56 ta “Mehribonlik”, “Muruvvat” va “Saxovat” uylaridagi mavjud ehtiyojlarni o'rgangan holda, ularga foydalanish uchun televizor, kir yuvish mashinasi, tikuv mashinasi, komp'yuter va printer, sovutgich, generator, videokamera, changyutgich, pech', dazmol kabi zarur texnik jihozlar olib berildi.
Sinovli kunlarda yanada jipslashib, bir-birini qo'llab-quvvatlash, yiqilganni suyash o'rniga, mana shunday 100 mingdan ziyod oilalar va bir necha yuz ming insonning dardiga malham bo'lgan savobli ishlarga soya solish va noxolis talqin etish chin mo'minlik sifati emas.
So'zimiz yakunida quyidagi rivoyatni keltiramiz. Tamim ibn Avs Doriy roziyallohu anhudan rivoyat qilingan hadisda Nabiy alayhissalom: «Din samimiy xayrixohlikdir», dedilar. Biz: «Kim uchun?» dedik. U zot: «Alloh uchun, Uning Kitobi uchun, Rasuli uchun hamda musulmonlarning imom-rahbarlari va hammalari uchun», dedilar» (Imom Muslim rivoyati).
Hayrixohlik – pand-nasihat qilish, toyilsa turg'izish, adashsa shafqat ila yo'l ko'rsatish, boshiga ish tushganda dalda bo'lish, to'g'ri yurganida yoniga kirish, qo'llab-quvvatlash kabi ishlar bilan ro'yobga chiqadi.
“Vaqf” xayriya jamoat fondi Matbuot xizmati
Kecha, 28 aprel kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtiroklarida “Haj – 2025” mavsumini yuqori darajada o‘tkazish bo‘yicha videoselektor yig‘ilishi bo‘lib o‘tdi. Unda haj delegatsiyasi vakillari, ishchi guruhi a’zolari, mingboshilar va shifokorlar jamoasi ishtirok etdi.
Majlis avvalida Muftiy hazratlari haj qiluvchi inson Haq taoloning mehmoni ekani, shu bois haj amalini bajarayotgan kishiga ko‘mak bergan, uning og‘irini yengil qilgan inson ulug‘ ajru savoblarga noil bo‘lishi haqida so‘zladilar. Shuningdek, har bir ishchi guruhi a’zosi ana shunday ulug‘ darajalarni maqsad qilib, Rahmonning mehmonlariga O‘zi rozi bo‘ladigan darajada sidqidildan xizmat qilishi lozimligini alohida qayd etdilar.
Shayx Nuriddin Xoliqnazar hazratlari yig‘ilish davomida muborak safarga qadar ziyoratchilar bilan muntazam suhbatlar tashkil etish va ularda hajning tartib-qoidalari, farz, vojib va sunnatlari, o‘ziga xos mashaqqatlarini tushuntirish va zikru duolar qilish va yurtdoshlarimizning barcha savollariga batafsil javob berish zarurligini ta’kidladilar. Shuningdek, muborak zaminlarda har bir daqiqani g‘animat bilish, toatu ibodat ila o‘tkazish masalalariga alohida e’tibor qilishga urg‘u qaratdilar.
O‘zbekiston musulmonlari idorasi raisi o‘rinbosari Obidjon Qodirov, Din ishlari bo‘yicha qo‘mita Ziyorat turizmini rivojlantirish bo‘limi boshlig‘i Bobomurod Rustamov va Shifokorlar guruhi rahbari Alisher Saatov kabilar so‘zga chiqib, tashkiliy ishlar, tibbiy jihatlar, xat-hujjatlar, jamoaviy tartib-intizomga rioya etish, qonun-qoidalarga amal qilish, hojilar xavfsizlini ta’minlash va ogohlikga oid muhim tavsiyalarni berdilar.
Shuningdek, joriy mavsumda “Haj – 2025” ishchi guruhi va shifokorlar zimmasiga juda katta mas’uliyat yuklangani, shu bois har kim o‘z vazifasini vijdonan to‘la bajarishi zarurligi ta’kidlandi.
Tadbir yakunida Haq taolodan bu yilgi haj mavsumi muvaffaqiyatli o‘tishini so‘rab xayrli duolar qilindi.
O‘zbekiston musulmonlari idorasi Matbuot xizmati