O'zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazi tomonidan «Imom Moturidiy xalqaro ilmiy-tadqiqot markazi: istiqboldagi rejalar» mavzusida xalqaro onlayn-anjuman tashkil etildi, deb xabar bermoqda «Dunyo» AA.
Din ishlar bo'yicha qo'mita ma'lumotiga ko'ra, tadbirda o'zbekistonlik hamda xorijlik taniqli olimlar, davlat va jamoat arboblari, xalqaro tashkilotlar vakillari ishtirok etdi. Jumladan, Ta'lim, fan va madaniyat masalalari bo'yicha Islom tashkiloti (ISESCO) bosh direktori Salim al-Malik, Al-Azhar islom tadqiqotlari akademiyasi bosh kotibi Nazir Muhammad Ayyad, Islom taraqqiyot bankining fan, texnologiya va innovatsiyalar bo'yicha maslahatchisi Hayat Sindi kabi taniqli olim, mutaxassis va jamoat arboblari nutq so'zladi.
Anjumanda so'zga chiqqanlar Imom Moturidiy ilmiy merosini o'rganish va xalqaro jamoatchilikka targ'ib qilish sharafli va mas'uliyatli vazifa ekanini qayd etib, bu borada O'zbekiston Respublikasi Prezidenti Shavkat Mirziyoev tomonidan olib borilayotgan sa'y-harakatlar yuksak baholandi.
Ishtirokchilar globallashuv jarayonida namoyon bo'layotgan mafkuraviy tahdidlarga qarshi kurash jarayonida o'zaro hamkorlikni mustahkamlash zarurligini ta'kidlab, kelgusida amalga oshiriladigan ishlar rejasi ham muhokama qilindi.
— Imom Moturidiy xalqaro ilmiy-tadqiqot markazi dunyoning etuk moturidiyshunos olimlari, tadqiqotchilarini birlashtiradigan, qizg'in fikrlar muhokama qilinadigan platforma bo'lib xizmat qiladi, — dedi O'zbekiston Vazirlar Mahkamasi huzuridagi Din ishlari bo'yicha qo'mita raisi raisi Abdug'ofur Ahmedov. — O'z navbatida, ushbu maskan ma'rifiy islom g'oyalarini tarannum etadigan va bunga zamin yaratadigan ma'rifa markaziga aylanadi.
Anjuman yakunida Ta'lim, fan va madaniyat masalalari bo'yicha Islom tashkiloti (ISESCO) bilan Imom Moturidiy xalqaro ilmiy-tadqiqot markazi o'rtasida o'zaro hamkorlikni yo'lga qo'yish bo'ytcha anglashuv memorondumi imzolandi.

O'zbekiston musulmonlari idorasi matbuot xizmati