O'zbekistonning Pokistondagi elchixonasida mamlakatimiz ziyorat turizm salohiyatini targ'ib qilish bo'yicha videoanjuman bo'lib o'tdi. Bu haqda “Dunyo” AA deb xabar berdi.

Tadbirda O'zbekiston Bosh vaziri o'rinbosari Aziz Abduhakimov, Vazirlar Mahkamasi huzuridagi Din ishlari bo'yicha qo'mita raisi Abdug'ofur Ahmedov, O'zbekiston musulmonlari idorasi raisining birinchi o'rinbosari Homidjon Ishmatbekov qatnashdi.

Shuningdek, Pokiston din ishlar bo'yicha federal vaziri Pir Nur ul-Haq Qadriy, diniy ishlar va dinlararo totuvlik bo'yicha federal vazir, O'zbekistonning Pokistondagi ziyorat turizmi elchisi Pir Hasib ur-Rahmon, Milliy assambleya spikeri o'rinbosari Qosim Hon Suri, Islom mafkurasi kengashi raisi Qibla Ayoz, hukmron PTI partiyasi sanoat qo'mitasi raisi Iftixor Rasul Ghumman, “Shahzad International Petroleum Exploration (Pvt) Ltd.” xalqaro neft kompaniyasi rahbari Pir Naqib ur-Rahmon, Pokistondagi O'zbekiston sayyohlik axborot markazi direktori Hamid Choudri ishtirok etdi.

Tadbir Buxoro, Samarqand, Hiva, Termiz, Toshkent kabi shaharlardagi islom qadamjolarga alohida e'tibor qaratib, mamlakatimizning ziyorat, tarixiy, salomatlik va akademik turizm sohasidagi salohiyatining taqdimoti bilan boshlandi.

Pokiston diniy ishlar bo'yicha federal vaziri Pir Nur ul-Haq Qadriy mamlakatimizda ziyorat turizmi, islom qadamjolarini qayta tiklash va ta'mirlash bo'yicha islohotlarni alohida ta'kidlab, buning uchun hukumatimiz va xalqimizga minnatdorchilik izhor etdi. Pokiston hukumati O'zbekiston islom tamaddunining bebaho qadamjolarining ishonchli posboni sifatida e'tirof etib, mamlakatni islom olamining barcha ziyoratchilariga keng ochish borasidagi insonparvar va bag'rikeng siyosat ijobiy baholanayotganini qayd etdi.

Videoanjuman Facebook va YouTube ijtimoiy tarmoqlari orqali onlayn uzatildi. Uni keng jamoatchilik kuzatib bordi.

O'zbekiston musulmonlari idorasi matbuot xizmati