Bulg'or islom akademiyasi rektori Doniyor Abdrahmonovning taklifiga binoan, Imom Buxoriy xalqaro ilmiy-tadqiqot markazi ilmiy xodimlari tomonidan akademiyaning magistr va doktarantlari uchun Zoom videokonferentsiya dasturi orqali «Markaziy Osiyoda islom ta'limoti» mavzusida besh kunlik o'quv kursi tashkil etildi, deb xabar bermoqda «Dunyo» AA muxbiri.
Ta'kidlash kerakki, Imom Buxoriy xalqaro ilmiy-tadqiqot markazi bugungi kunda AQSh, Buyuk Britaniya, Frantsiya, Germaniya, Misr, Saudiya Arabistoni, Turkiya, Malayziya, Pokiston, Hindiston, Rossiya, Qozog'iston, Qirg'izistondagi 30 ga yaqin etakchi islom tadqiqot markazlari, universitetlar bilan hamkorlikka oid memorandumlar imzolagan.
Tataristondagi Bulg'or islom akademiyasi ham markazning yaqin hamkorlaridan biri sanaladi.
Har ikki ilmiy muassasa o'rtasida erishilgan kelishuvlarga ko'ra ilmiy tadqiqotchilar mazkur ilm maskanlarida tashkil etilayotgan seminarlar, konferentsiyalarda faol ishtirok etib kelmoqda.
Kurs davomida markazning etakchi ilmiy xodimlari tomonidan «Movarounnahr kalom ilmi tarixida moturidiya ta'limoti», «Markaziy Osiyo kutubxonalari tarixi», «Hadis ilmi rivojida Movarounnahr muhaddislarining o'rni», «Fiqhga oid manbalar tahlili», «Imom Termiziy ilmiy merosi tadqiqotchilar nigohida» singari mavzularda ma'ruzalar o'qildi.
O'quv kursining yakunida Imom Buxoriy xalqaro ilmiy-tadqiqot markazi va Bulg'or islom akademiyasi rahbarlarining onlayn muloqoti bo'lib o'tdi.
Bulg'or islom akademiyasi rektori Doniyor Abdrahmonov ikki muassasa o'rtasida imzolangan o'zaro anglashuv memorandumiga muvofiq tashkil etilgan mazkur tadbir muqaddas islom dini rivojida Movarounnahrda kamol topgan buyuk alloma va muhaddislar, diniy ulamolar ilmiy merosining o'rni va ahamiyatini chuqur tadqiq etishda muhim o'rin tutishini ta'kidladi. Buning uchun Imom Buxoriy xalqaro ilmiy-tadqiqot markazi direktori va jamoasiga minnatdorlik bildirdi.
Suhbat davomida ikki muassasa o'rtasida hamkorlikka oid imzolangan memorandumda belgilangan vazifalarni birgalikda amalga oshirish masalalari muhokama qilindi. Shuningdek, ilmiy xodimlarning maqolalarini nashr etish, malaka oshirish kurslarini tashkil qilish, konferentsiya va davra suhbatlari o'tkazish, bu borada hamkorlikni yanada kuchaytirish masalalariga e'tibor qaratildi.

O'zbekiston musulmonlari idorasi matbuot xizmati