Muftiy hazrat xalqaro onlayn anjumanda ishtirok etdilar
Shu yil 10 dekabr' kuni Halqaro musulmonlar forumi kotibiyati va Rossiya musulmonlari idorasi tashabbusi bilan Zoom platformasi orqali “Muloqot madaniyati: pandemiya davridagi diniy odob-axloq” mavzusidagi XVI xalqaro musulmonlar anjumani bo'lib o'tdi.
Unda xalqaro diniy tashkilotlar vakillari, Yevropa, Markaziy Osiyo MDHdagi davlatlarning diniy idoralar rahbarlari ishtirok etdi.
Forum Qur'oni karim tilovati va duolar bilan boshlandi.
Dastlab Rossiya musulmonlari idorasi raisi, muftiy Shayx Ravil Gaynuddin so'zga chiqib, koronavirus pandemiyasi davrida mo'min-musulmonlarning odob-ahloqi, yuzaga kelgan ruhiy va iqtisodiy qiyinchiliklarga bo'lgan sabr-bardoshlari tahsinga loyiq ekani to'g'risida nutq so'zladi.
Misr Arab Respublikasi muftiysi, professor Shavqiy Allom esa anjumanda mana shunday murakkab sharoitda musulmon ulamolari hamkorliklari mustahkamlanganligi, musulmon ummatini tashvishga solayotgan muammolarni birga echishga harakat qilingani, xususan vabo kabi kasalliklarga qarshi birgalikda kurashilgani to'g'risida so'z yuritdi.
Onlayn xalqaro anjumanda O'zbekiston musulmonlari idorasi raisi, muftiy Usmonxon Alimov hazratlari pandemiya davrida mamlakatimizda amalga oshirilgan ishlar va uning natijalari haqida so'zlab, O'zbekistonda koronavirus pandemiyasi davrida muhtaram Prezidentimiz tomonlaridan xalqimiz salomatligini saqlash borasida chora-tadbirlar amalga oshirilgani, MDH davlatlari orasida kasallik tarqalishining oldini olish bo'yicha eng yaxshi ko'rsatkich aynan yurtimizga to'g'ri kelgani, shuningdek pandemiya davrida Ulamolar Kengashi tomonidan mo'min-musulmonlar uchun bir qator murojaatlar va bayonotlar e'lon qilingani hamda ushbu sinovli kunlarda yaxshi kunlarga intilib yashash, yordamga muhtoj shaxslarga g'amxo'rlik qilish kabi yo'nalishlarda keng ko'lamli ishlari olib borilayotgani to'g'risida alohida to'xtaldilar.
Muftiy hazratlari musulmon dunyosi turli muammolarga duch kelayotgan bugungi murakkab sharoitda din peshvolari va Islom ulamolarining mana shunday hamjihatlikda ishlash har qachongidan ham dolzarb ekani, diniy idoralar o'rtasidagi birodarlik va hamkorlik aloqalari yangi bosqichga olib chiqish zarurligini alohida qayd etdilar.
Shuningdek, onlayn anjumanda Hamid Shahriyoriy – Islomiy tashkilotlarning birlashtirish xalqaro tashkiloti rahbari; Doktor Holid Eren – Halqaro IRSIKA tashkiloti rahbari; Muhammad Hofiz – Parij markaziy masjidi imom-xatibi; Naurizbay Taganuli – Qozog'iston musulmonlari idorasi raisi, Bosh muftiy; Doktor Ahmad al-Dubayan – Londondagi islom markazi rahbari; Saidmukarram Abduqodirzoda – Tojikiston Ulamolar kengashi raisi, muftiy; Maqsadbek Toxtamushev – Qirg'iziston musulmonlari idorasi raisi, muftiy; Abdulvoxid Niyazov – Yevropa musulmonlari Forumi rahbari; Rashad Aliyarli – Kavkaz musulmonlari idorasi raisi o'rinbosari; Murat Gul – Berlin islom birlashmasi rahbari; Aziz Hasanovich – Horvatiya islom uyushmasi rahbari, muftiy kabilar ham so'zga chiqdilar.
Mazkur so'zga chiqqan notiqlar tomonidan pandemiya davridagi diniy odob-axloqlar, bu borada xalqoro tashkilotlar va islomiy idoralarning murojaat, bayonot, fatvo va tavsiyalarning ta'siri hamda hamkorlik aloqalari natijalari to'g'risida muhim ma'lumotlar taqdim etildi. Shuningdek, islomiy tashkilotlarning kelgusidagi hamkorlik masalalari bo'yicha o'z fikr-mulohazalarini bildirdilar.
O'zbekiston musulmonlari idorasi Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »