Nurafshon va salobatli maskan ta'rifi
Misrning 1875 yildan buyon nashr etilayotgan “Al-Ahram” (gate.ahram) gazetasida Samarqanddagi buyuk muhaddis Imom al-Buxoriy yodgorlik majmuasi qayta qurilayotgani va ochilish marosimiga hozirlik ko'rilayotgani haqida maqola e'lon qilindi.
Maqolada tabarruk ziyoratgoh, islom olami uchun qimmatli manzil sanalgan Imom al-Buxoriy majmuasida, qariyb, 10 ming namozxonga mo'ljallangan masjid, to'rtta minora, ayvonlar barpo etilayotgani, mehmonxona, avtomobil' turar joyi, bekat, oshxona, savdo rastalari, tahoratxona qurilayotgani batafsil yoritilgan.
Imom al-Buxoriy xalqaro ilmiy-tadqiqot markazi qo'lyozmalar bo'limi rahbari Tohir Ibodullayev “Yaqin Sharq” axborot agentligiga ma'lum qilishicha, majmuada buyuk alloma hadislaridan hikoya qiluvchi yirik muzey barpo etilyapti. Mutaxassis ushbu markazni tashkil etishdan ko'zlangan maqsad Imom al-Buxoriy, Imom at-Termiziy, Imom Abu al-Mansur al-Moturudiy kabi mo''tabar musulmon ulamolari merosini o'rganish ekanligiga to'xtalib, islom ilmi rivojiga ulkan hissa qo'shgan olimlar xazinasidan butun dunyo ahli bahramand bo'lishi lozimligini ta'kidladi. Muallif majmuada Al-Azhar universiteti olimlari boshchiligida dunyoning barcha davlatlaridan mashhur mutaxassislar ishtirokida xalqaro konferentsiya va ilmiy ma'ruzalar tashkil etish rejalashtirilganiga ham e'tibor qaratgan.
Qo'lyozmalar bo'limi tomonidan “Sahih al-Buxoriy”ni o'zbek tilida nashr etish jarayoni nihoyasiga etkazilib, yana 100 ga yaqin kitob arab tilidan o'zbekchaga o'girilgan.
– Hozir dunyoning barcha kutubxonalaridan “Sahih al-Buxoriy” qo'lyozmalari to'planyapti, – deydi T.Ibodullayev. – Har oy Markaz va Al-Azhar olimlari o'rtasida tashkil etiladigan onlayn ma'ruzada Imom al-Buxoriy markazi ulamolarining savollariga javob berilyapti. Dastur doirasida tajriba almashish maqsadida markazning o'zbekistonlik tadqiqotchisi joriy yil Al-Azhar Ash-Sharifga tashrif buyurdi va Imom al-Buxoriy markazi tomonidan nashr etilgan asar taqdimotida ishtirok etdi.
Muharrama Pirmatova, O'zA
“Azzaman” gazetasi: Yangi O‘zbekistonda keng qamrovli islohotlar amalga oshirilmoqda
Iroqning “Azzaman” gazetasida “O‘zbekiston mustaqilligining o‘ttiz besh yilligi: Davlat barpo etishdan Uchinchi Renessans sari” nomli maqola e’lon qilindi, deb xabar bermoqda “Dunyo” AA.
Maqolada ta’kidlanishicha, O‘zbekistonning mustaqillik yillarida bosib o‘tgan taraqqiyot yo‘li, amalga oshirilgan keng ko‘lamli islohotlar hamda mamlakatning xalqaro maydondagi nufuzi tobora yuksalib bormoqda.
1991 yilda qo‘lga kiritilgan mustaqillik O‘zbekiston xalqi hayotida tarixiy burilish yasab, milliy davlatchilik asoslarini shakllantirish, iqtisodiy taraqqiyot poydevorini yaratish va ijtimoiy barqarorlikni ta’minlash jarayonini boshlab berdi.
2016 yildan boshlab Prezident Shavkat Mirziyoyev rahbarligida mamlakatda “Yangi O‘zbekiston” tamoyili asosida keng qamrovli islohotlar amalga oshirilmoqda. Ushbu jarayonda O‘zbekiston Markaziy Osiyoda izchil va muvozanatli rivojlanish yo‘lidan borayotgan davlat sifatida e’tirof etilmoqda.
Muallif O‘zbekistonda so‘nggi yillarda iqtisodiyotni liberallashtirish, investitsiyalarni jalb etish, savdo-iqtisodiy aloqalarni kengaytirish, infratuzilmani modernizatsiya qilish, raqamlashtirish va tadbirkorlik muhitini yaxshilash borasida amalga oshirilgan chora-tadbirlarga e’tibor qaratgan.
Maqolada aholini ijtimoiy himoya qilish tizimini takomillashtirish, ta’lim va sog‘liqni saqlash xizmatlari sifatini oshirish, yoshlar hamda xotin-qizlarning jamiyatdagi faolligini kuchaytirishga qaratilgan islohotlar haqida ham alohida fikr yuritilgan.
Nashrda Prezident Shavkat Mirziyoyev tomonidan ilgari surilgan “Uchinchi Renessans” g‘oyasi O‘zbekiston taraqqiyotining muhim strategik yo‘nalishlaridan biri sifatida baholangan. Unda Xorazmiy, Beruniy, Ibn Sino, Imom Buxoriy va Imom Termiziy kabi buyuk allomalar yetishib chiqqan yurt bugungi kunda ilm-fan, innovatsiya, texnologiya va inson kapitalini rivojlantirish orqali yangi uyg‘onish davrini yaratishga intilayotgani qayd etilgan.
Iroq matbuoti O‘zbekistonning islom sivilizatsiyasi tarixidagi o‘rniga ham to‘xtalib, mamlakatda boy ilmiy-ma’rifiy merosni o‘rganish va targ‘ib qilishga qaratilgan loyihalar amalga oshirilayotganini ta’kidlagan. Jumladan, Toshkent shahrida bunyod etilgan Islom sivilizatsiyasi markazi Movarounnahr allomalarining jahon tamadduniga qo‘shgan ulkan hissasini namoyish etuvchi muhim ilmiy-madaniy maskan sifatida qayd etilgan.
O‘zbekiston musulmonlari idorasi Matbuot xizmati
