“Vaqf” xayriya jamoat fondining “G'amxo'r bo'laylik!” xayriya aktsiyasi Qoraqalpog'istonning olis va chekka hududlarida o'tkazildi. Hayriya tadbirlari Orol dengizi atrofida yashaydigan yordamga muhtoj oilalarning holidan xabar olish va ularni moddiy-ma'naviy qo'llab-quvvatlash maqsadida amalga oshirildi.
2 dekabr' kuni Fond rahbari Yahyo domla Abdurahmanov Qoraqalpog'istonda bo'ldi. Safar davomida “G'amxo'r bo'laylik!” tadbiri doirasida Fondning zakot mablag'lari va Qoraqalpog'iston musulmonlari qoziyoti tomonidan homiylarni jalb qilgan holda 62,5 mln. so'mlik oziq-ovqat mahsulotlari 500 nafar moddiy yordamga muhtoj, kam ta'minlangan, nogiron, etim-esirlar va boquvchisini yo'qotgan oilalarga ulashildi.
“G'amxo'r bo'laylik!” tadbirini chekka hududlardan biri bo'lgan Mo'ynoq tumanida ham davom etdi. Yahyo Abdurahmanov ushbu tumanda yashovchi Hojabayev Azamatning xolidan xabar oldi. Ushbu fuqaroning uyiga o't ketib, yong'in oqibatida uy-ro'zg'or buyumlari va turar joyiga talofat etgan edi. Tabiiy ofatdan zarar ko'rgan oila a'zolariga turar joyni qayta ta'mirlash uchun Fond va qoziyot tomonidan 30 mln. so'mlik qurilish materiallari olib berildi.
3 dekabr' kuni Fond rahbari Yahyo Abdurahmonov Nukus shahridagi Muhammad ibn Ahmad al Beruniy o'rta maxsus islom bilim yurtida bo'ldi. “Vaqf” xayriya jamoat fondi a'zolari, bilim yurti o'qituvchilari va talabalar ishtirokida muloqot o'tkazildi. Unda “Vaqf” xayriya jamoat fondi tamonidan yurtimizda amalga oshirilayotgan xayriya tadbirlari haqida ishtirokchilarga ma'lumot berildi. Fond tomonidan bilim yurtidagi axborot resurs markazini boyitish maqsadida, 30 turdagi 700 ga yaqin kitob taqdim etildi.
Bilim yurti mudiri Sh.Bauatdinov mehmonlarga yaratilgan shart-sharoitlar, o'quv xonalari, kutubxona, oshxona va sport zallari bilan tanishtirdi. Fond rahbari shunday keng imkoniyatlarga ega bo'lgan va barcha qulayliklar yaratilgan mazkur madrasa faoliyati bilan tanishar ekan, avvalo bu ne'matlarga shukronalik bildirish kerakligini ta'kidladi. Kelajakda ushbu maskandan ilmiga rioya qiladigan, yurtiga, xalqiga, diniga manfaat keltiradigan Imom Buxoriy, Imom Termiziy, Imom Moturudiy singari ajdodlarimizga munosib tolibi ilmlar etishib chiqishini tilab, Alloh taologa duo qildi.
Shu kuni “Vaqf” fondi va Qoraqalpog'iston musulmonlari qoziyoti vakillari Ho'jayli va Chimboy tumanlarida bo'lishdi. Tumanda yashovchi aholining kundalik hayoti bilan tanishib, homiylarni jalb qilgan holda xayriyalar qilindi. Hususan, Ho'jayli tumanidagi tabiiy gaz bosimi past hududdagi bir nechta xonadonlarga 5 mln. so'mlik o'tin va 9 tonna toshko'mir olib berildi. Shuningdek, xalqaro nogironlar kuni munosabati bilan Chimboy tumanidagi 10 nafar nogironligi bo'lgan fuqarolarga 3 mln. so'm, 20 nafar kam ta'minlangan, yordamga muhtoj oilalarga 4 mln. so'm miqdoridagi oziq-ovqat mahsulotlari berildi.

Qilingan xayru ehsonlarni Alloh O'z dargohida qabul qilsin.

“Vaqf” xayriya jamoat fondi matbuot xizmati