O'zbekiston Oliy Majlisi Senati Raisining birinchi o'rinbosari, Oksford Islom tadqiqotlari markazi (OITM) xalqaro akademik maslahat qo'mitasining a'zosi Sodiq Safoyev mazkur maslahat qo'mitasining videokonferentsaloqa shaklida bo'lib o'tgan navbatdagi yig'ilishida ishtirok etdi, deb xabar bermoqda «Dunyo» AA.
Senat Axborot xizmati xabariga ko'ra, yig'ilishida markaz faoliyatining asosiy yo'nalishlari, xalqaro hamkorlikning istiqboldagi ustuvor yo'nalishlari ko'rib chiqildi.
OITM rahbari, doktor F.Nizomiy raislik qilgan yig'ilishda musulmon mamlakatlarining qator taniqli siyosatchilari, olimlari va jamoat arboblari ishtirok etdi.
Tadbir ishtirokchilari tomonidan musulmonlar hamjamiyati hamda islom fani sohasidagi o'qitish va tadqiqot faoliyatining ustuvor yo'nalishlari muhokama qilindi. Jumladan, sog'liqni saqlash, fan va texnologiyalar bo'yicha loyihalar, stipendiyalar va grantlar ajratish, etakchilik dasturlari, xalqaro akademik hamkorlik va boshqa masalalar ko'rib chiqildi.
OITM va O'zbekiston Respublikasi o'rtasidagi munosabatlar 1992 yilda o'rnatilgan. Markaz mutaxassislari Ummon hukumati tomonidan Toshkentdagi Beruniy kutubxonasi loyihasini amalga oshirish uchun jalb qilindi.
O'zbekiston yosh tadqiqotchilari OITMda muntazam ravishda Markaziy Osiyo vakillari uchun yaratilgan Buxoriy va Termiziy nomli stipendiyalar asosida malaka oshiradi. Markaz tomonidan Toshkent davlat sharqshunoslik instituti, Toshkent Islom universiteti huzuridagi Islomshunoslik ilmiy-tadqiqot markazi, Imom Buxoriy xalqaro markazi, Islom tsivilizatsiyasi markazi va O'zbekistonning madaniy qadriyatlarini xorijda o'rganish markazi bilan hamkorlik to'g'risida memorandumlar imzolangan.
2018 yil mart oyida Islom tsivilizatsiyasi, Imom Buxoriy, Madaniy boyliklarni xorijda o'rganish markazlari va Toshkent islom universiteti qoshidagi Tadqiqot markazi xodimlaridan iborat O'zbekiston delegatsiyasi OITMga tashrif buyurgan edi. Tashrif yakunlari bo'yicha 2018-2022 yillarda O'zbekiston va Buyuk Britaniyaning ilmiy markazlari o'rtasidagi hamkorlik bo'yicha «yo'l xaritasi» tasdiqlangan.

O'zbekiston musulmonlari idorasi matbuot xizmati