Muftiy hazratlari Qashqadaryodagi masjidda juma namozini ado etdilar
Bugun, 27 noyabr' kuni O'zbekiston musulmonlari idorasi raisi, muftiy Usmonxon Alimov hazratlari, Din ishlari bo'yicha qo'mita raisi Abdug'ofur Ahmedov va “Vaqf” xayriya jamoat fondi rahbari Yahyo Abdurahmonov Qashqadaryo viloyati Shahrisabz shahrida joylashgan “Ho'jamurod baxshi” jome masjidi yangi binosi ochilishida qatnashdilar.
Alloh taologa shukrki, yurtimizda hukm surayotgan tinchlik-omonlik va dinimizga bo'lgan yuksak e'tibor sabab, masjidlarda bunyodkorlik va qayta qurish ishlari qizg'in davom etmoqda.
“Ho'jamurod baxshi” jome masjidi bir necha yillar avval hashar yo'li bilan qurilgan edi. O'tgan davr mobaynida masjid binosi eskirib, poydevorlari yaroqsiz holga kelib qoldi. Qolaversa, oxirgi paytlarda masjid jamoati sezilarli darajada ortib, xonaqoh torlik qilayotgandi.
Shu sababli mahalla ahli ezgu niyat bilan masjidni qayta qurish taklifini ilgari surishdi. Ushbu xayrli tashabbus O'zbekiston musulmonlari idorasi tomonidan qo'llab-quvvatlangach qayta qurish ishlari amalga oshirildi. Masjid milliy andozalar va zamonaviy talablar asosida barpo etilib, hovlisida bog' va atrofida avtoturargoh ham bunyod qilindi.
Bugun, 27 noyabr' kuni xizmat safarini davom ettirayotgan muftiy Usmonxon Alimov hazratlari “Ho'jamurod baxshi” jome masjidida namozxonlar ishtirokida juma namozini ado etdilar.
Muftiy hazratlari o'z mav'izalarida masjid ahlini ushbu Allohning uyi bilan tabrik qilib, jumladan shunday so'zlarni bildirdilar:
– Alloh taologa hamdu sanolar bo'lsinki, buyuk allomalar yurti bo'lmish yurtimizda so'nggi yillarda masjid-madrasalar qurish odatiy jarayonga aylanib bormoqda. Har kuni yurtimizning turli viloyatlaridan yangi-yangi masjid qurilayotgani yoki qurib bitkazilib, ishga tushgani haqida xushxabarlar kelib turibdi, ko'plarida o'zimiz ham ishtirok qilyapmiz.
Endilikda mana shunday ko'rkam masjidlarda imom-domlalarimiz xalqimizga, ayniqsa, yoshlarimizga Islom dini ma'rifatini etkazish, ularning ta'lim-tarbiyasini yaxshilash va ezguliklar tarqatish ishida juda ham faol bo'lishlari zarur.
Muftiy hazratlari so'zlarining davomida Payg'ambarimiz Muhammad sollallohu alayhi vasallamning «Kim bir masjid qursa, Alloh unga jannatda shuning mislini qurib beradi», degan hadisi shariflarini keltirib, mazkur jomeni barpo etishga hissa qo'shgan barchaning haqqiga duolar qildilar. Ushbu fayzli juma namozida ulamolar, mahalla faollari, mo'ysafid otaxonlar va masjid qavmi ishtirok etdi.
Alloh taolo ushbu jome masjidni xalqimizga muborak aylasin!
O'zbekiston musulmonlari idorasi Matbuot xizmati
Prezident 35 yillik mustaqillik arafasida 852 nafar mahkumni afv etdi
Prezident Shavkat Mirziyoyev O‘zbekiston mustaqilligining 35 yilligi munosabati bilan 852 nafar jazo o‘tayotgan shaxsni afv etish to‘g‘risidagi farmonni imzoladi. Afv etilganlar orasida 7 nafar xorij fuqarosi, 375 nafar yoshlar, 49 nafar ayol va 60 yoshdan oshgan 37 nafar erkak bor, xabar bermoqda Batafsil.uz.
Afv etilgan 852 nafar shaxsdan 604 nafari jazoni to‘liq o‘tashdan ozod qilinadi. Yana 115 nafar shaxs jazoni o‘tashdan muddatidan ilgari shartli ravishda ozod etiladi.
52 nafar mahkumga tayinlangan jazo yengilroq jazo turiga almashtiriladi. 81 nafar shaxsning ozodlikdan mahrum qilish jazosi muddati esa qisqartiriladi.
Afv etilganlar orasida taqiqlangan tashkilotlar faoliyatida ishtirok etgan 63 nafar shaxs ham bor.
Prezident farmonida afv etishga asos sifatida mahkumlarning qilmishiga pushaymonligi va tuzalish yo‘liga qat’iy o‘tgani ko‘rsatilgan.
"O‘zbekiston 24" telekanali ma’lumotiga ko‘ra, Shavkat Mirziyoyev 2017 yildan buyon 31 ta afv etish to‘g‘risidagi hujjatni imzolagan. Ushbu hujjatlar jami 10 567 nafar jazo o‘tayotgan shaxsni qamrab olgan.
Xususan, Prezident Navro‘z va Ramazon hayiti arafasida ham 392 nafar mahkumni afv etgandi.
O‘zbekiston musulmonlari idorasi Matbuot xizmati
