O'zbekiston musulmonlari idorasi raisi, muftiy Usmonxon Alimov hazratlari va Din ishlari bo'yicha qo'mita raisi Abdug'ofur Ahmedov Surxondaryo viloyati Sho'rchi tumanida yangi ochilayotgan “Mengto'ra hoji bobo” jome masjidi bilan mahalliy aholi vakillarini qutladilar.
Allohga shukrki, yurtimizdagi ikki mingdan ziyod masjidlar kundan-kunga obod bo'lmoqda. Yangidan-yangi masjidlar ochilmoqda, mavjudlari qaytadan ta'mirlanib, chiroyli holatga keltirilmoqda.
Mana shunday masjidlardan biri Surxondaryo viloyati Sho'rchi tumani “Oftobmakon” mahallasida yangi ochilayotgan “Mengto'ra hoji bobo” jome masjidi qurilishi ham mahalliy aholi sa'y-harakatlari bilan 2019 yilda boshlanib, 2020 yil fevral' oyida yakunlandi.
Saxovatpesha insonlar ko'magi va hashar yo'li bilan bunyod etilgan jome masjid sig'imi 700 nafar namozxonga mo'ljallangan. Masjid isitish qurilmalari, issiq pol, sun'iy iqlim hosil qiluvchi anjomlar bilan jihozlangan.
O'ttiz uch metrli minora masjidga o'zgacha fayz bag'ishlab turibdi. Masjid hovlisida ma'muriyat xonalari, imom-xatib, imom noibi va qorovulxona kabilar mavjud.
Yangi jome masjidi barpo etilishiga juda katta hissa qo'shgan insonlar, quruvchi-muhandislar, saxovatpesha kishilar va masjid qurish uchun joy ajratib bergan insonlarning haqlariga va ularning o'tgan marhumlarining ruhi pokiga Qur'oni karim oyatlari tilovat qilinib, muftiy hazratlari tomonlaridan ko'pdan-ko'p duolar qilindi.
Alloh taolo ushbu jome masjidni xalqimizga muborak aylashini nasib etsin!

O'zbekiston musulmonlari idorasi Matbuot xizmati