عَنْ أَبِي هُرَيْرَةَ رَضِيَ اللهُ عَنْهُ، عَنِ النَّبِيِّ صلى الله عليه وسلم قَالَ: «خَيْرُ يَوْمٍ طَلَعَتْ عَلَيْهِ الشَّمْسُ يَوْمُ الْجُمُعَةِ، فِيهِ خُلِقَ آدَمُ، وَفِيهِ أُدْخِلَ الْجَنَّةَ، وَفِيهِ أُخْرِجَ مِنْهَا، وَلَا تَقُومُ السَّاعَةُ إِلَّا فِي يَوْمِ الْجُمُعَةِ». رَوَاهُ التِّرْمِذِيُّ.
وَزَادَ أَبُو دَاوُدَ : «وَفِيهِ تِيبَ عَلَيْهِ، وَفِيهِ مَاتَ، وَفِيهِ تَقُومُ السَّاعَةُ، وَمَا مِنْ دَابَّةٍ إِلَّا وَهِيَ مُسِيخَةٌ يَوْمَ الْجُمُعَةِ مِنْ حِينَ تُصْبِحُ حَتَّى تَطْلُعَ الشَّمْسُ شَفَقًا مِنَ السَّاعَةِ إِلَّا الْجِنَّ وَالْإِنْسَ».

Abu Hurayra roziyallohu anhudan rivoyat qilinadi:
«Nabiy sollallohu alayhi vasallam: «Quyosh chiqqan kunning eng yaxshisi juma kunidir. Odam shu kuni yaratildi. U shu kuni jannatga kiritildi. U shu kuni jannatdan chiqarildi. Qiyomat kuni ham faqatgina juma kuni qoim bo'lur», – dedilar».
Termiziy rivoyat qilgan.
Abu Dovud quyidagilarni ziyoda qilgan:
«Unda uning tavbasi qabul qilindi. Unda u vafot qildi. Unda qiyomat qoim bo'lur. Juma kuni hamma jonivorlar tong otgandan to quyosh chiqquncha (qiyomat) soatini qo'rqinch ila kutib tururlar. Faqat jin va ins bundan mustasno», – deyilgan.
Imom Iroqiy rahmatullohi alayh aytadilar: «Kunlarning eng yaxshisi deganda, juma – hafta kunlarining eng yaxshisidir. Ammo Arafa kuni to'g'risida kelgan hadislarda Arafa – yil kunlarining yaxshisidir, – deyilgan».
Boshqa olimlar juma kunini yilning barcha kunlari ichida eng yaxshisi, deb ham aytgan ekanlar.
Bu hadis Odam alayhissalom jannatda yaratilmaganiga, balki jannatdan tashqarida yaratilib, keyin unga kirgizilganiga dalolat qiladi.
Ulamolar aytadilar: «Ramazon oyida qadr kechasi yashirilgani kabi, juma kunida duo ijobat bo'ladigan vaqt ham yashirilgandir».

islom.uz