O'zbekiston musulmonlari idorasi va Din ishlari bo'yicha qo'mitasi jamoasi qadrli ustoz, islomshunos olim, professor Ubaydulla Uvatovning vafoti munosabati bilan chuqur ta'ziya izhor etadi.
Ubaydulla Uvatov butun umrini ilm-ma'rifatga baxshida etgan, elu yurt mehrini qalbiga, siymosini ko'z qorachig'iga singdirgan zakovatli olim edi. Mo''tabar ustozning bir necha o'nlab kitoblari chop etilgan va matbuotda yuzlab ilmiy maqolalari e'lon qilingan.
Ubaydulla Uvatov Toshkent Davlat Sharqshunoslik instituti, Prezident Adminstratsiyasi, Din ishlari bo'yicha qo'mita, Amir Temur, “Oltin meros” jamg'armalari, Imom Buxoriy xalqaro markazi, Imom Termiziy xalqaro ilmiy-tadqiqot markazi va Halqaro islom akademiyasida faoliyat olib bordilar.
Ubaydulla Uvatov yurtimizdan etishib chiqqan allomalarning hayoti va ilmiy-ma'naviy merosini xalqning ma'naviy mulkiga aylantirish borasida salmoqli ishlarni amalga oshirdi.
Olimning mana shunday samarali mehnatlari munosib qadrlanib, 2017 yilda “O'zbekiston Respublikasida xizmat ko'rsatgan yoshlar murabbiysi” faxriy unvoni, "Mehnat shuhrati" ordeni va 2020 yilda “Fidokorona xizmatlari uchun” ordeni bilan taqdirlandilar.
Alloh taolo marhum olimni O'z mag'firatiga olsin, imonlarini salomat qilsin, solih amallarini o'zlariga hamroh etsin. Oxiratlarini obod etib, joylarini Firdavs jannatlaridan qilsin!
Haq taolo marhum olimning ahli oilasi, farzandu arjumandlari va yaqinlariga chiroyli sabr berib, bu musibatlarini yaxshiliklar ila to'ldirsin. Biz Buyuk Parvardigordan duo qilib so'raymizki, marhum olimni o'zining cheksiz rahmatiga olsin, jannat bog'lariga doxil etsin.

Innaa lillaahi va innaa ilayhi roji'uun.