Halqaro halol sanoat ko'rgazmasi o'tkaziladi
“Halol London – 2023” nomli ikkinchi xalqaro savdo ko'rgazmasi shu yil 10 va 11 dekabr' kunlari o'tkaziladi. Unda hukumatlar, sanoat va iste'molchilar vakillari ishtirok etadi.
Ko'rgazmada dunyodagi eng yirik va mashhur ishlab chiqaruvchi sanoat korxonalarining halol mahsulotlari turi namoyish etiladi. Uning doirasida “Halol iqtisodiyot anjumani – 2023” nomli xalqaro tadbir ham bo'lib o'tishi reja qilingan.
Anjumanda notiqlar xalqaro halol sanoat sohasidagi eng so'nggi ishlab chiqarish, g'oyalar va innovatsiyalarni taqdim etadi.
Ma'lumot uchun, ko'rgazmaning 2022 yilda birinchi sessiyasi o'tkazilgan edi. Unga 22 mamlakatdan 6000 nafar vakil tashrif buyurib, 150 dan ortiq eksponent ishtirokida yuzdan ortiq xalqaro va mahalliy ma'ruzachilar nutq so'zlagan edi.
E'tiborlisi, dunyo bo'yicha halol oziq-ovqat sanoatining qiymati bir trillion dollardan oshadi va bu ko'rsatkich kelajakda 20 foizga oshib, o'z sohasida eng gullab-yashnagan sanoatga aylanadi.
O'zbekiston musulmonlari idorasi
Matbuot xizmati
Kuala-Lumpurda “O‘zbekiston-Malayziya: kreativ va ziyorat turizmi” mavzusida fotoko‘rgazma tashkil etildi
Mamlakatimizning Malayziyadagi elchixonasi tomonidan Turizm qo‘mitasi hamda MARA Texnologiya universiteti (UiTM) bilan hamkorlikda O‘zbekistonning turistik salohiyati va boy madaniy merosiga bag‘ishlangan fotoko‘rgazma o‘tkazildi, deb xabar bermoqda “Dunyo” AA.
Kuala-Lumpur shahrida bo‘lib o‘tgan “O‘zbekiston-Malayziya: kreativ va ziyorat turizmi” nomli tadbirda Malayziya Turizm, san’at va madaniyat vaziri Tiong King Sing, Islom turizm markazi bosh direktori Mohammad Faisal, mahalliy siyosiy va ishbilarmon doiralar, vazirlik va idoralar, madaniyat hamda turizm sohasi vakillari, diplomatik korpus hamda OAV xodimlari ishtirok etdi.
Anjuman so‘nggi yillarda O‘zbekiston hududlarida barpo etilgan yangi ziyorat turizmi maskanlari hamda UiTMning San’at, dizayn va media fakulteti suratkash va dizaynerlaridan iborat ijodiy jamoasining shu yil 17–31 avgust kunlari Toshkent shahri, Samarqand, Buxoro va Xorazm viloyatlariga amalga oshirgan tashrifi yakunlariga bag‘ishlandi.
Ko‘rgazmaning ochilish marosimida O‘zbekiston elchisi Karomiddin Gadoyev so‘zga chiqib, mamlakatimizda turizm va madaniyat sohalarida amalga oshirilayotgan tizimli islohotlar, yangi sayyohlik yo‘nalishlari hamda investitsiyaviy imkoniyatlar haqida atroflicha ma’lumot berdi. U malayziyalik turoperator va investorlarni O‘zbekiston bilan hamkorlikni yanada kengaytirishga chaqirdi.
O‘z navbatida, Malayziya Islom turizm markazi bosh direktori Mohammad Faisal ikki mamlakat o‘rtasida ziyorat turizmi, madaniyat, oliy ta’lim va kreativ iqtisodiyot sohalaridagi aloqalarning kengayishi o‘zaro sayyohlar oqimini oshirishga xizmat qilayotganini ta’kidladi. U O‘zbekistonning madaniy, ziyorat va qishki turizm yo‘nalishlari Malayziyada tobora ommalashib borayotganini alohida qayd etdi.
O‘zbekiston musulmonlari idorasi Matbuot xizmati
