Alloh va Uning Rosulidan yuz o'git!  17-o'git: Yomon gumondan chetlaning!

Alloh taolo shunday marhamat qilgan: “ Ey, mo'minlar, ko'p gumon(lar)dan chetlaninglar! Chunki ba'zi gumon(lar) gunohdir! (Hujurot surasi 12-oyat)

Abu Hurayra roziyallohu anhudan rivoyat qilingan bir hadisda shunday jumlalar keladi: «Rasululloh sollallohu alayhi vasallam: «Badgumonlikdan saqlaning. Albatta, badgumonlik eng yomon yolg'onchilikdir.....  dedilar». (To'rtovlari rivoyat qilgan)

         Hulosa:

1. Hitob xossatan mo'minlarga bo'lmoqda. Ushbu xitob orqali Alloh taolo O'ziga iymon keltirgan kishilarni yana bir jirkanch amalni tark qilishlikka buyurmoqda.
2. Gumondan murod badgumonlik, ya'ni, kishilar yoki ularning amallari, gap so'zlari va boshqa holatlari haqida aniq ma'lumotga, arzirli asosga ega bo'lmagan holda shubhalanish, hadiksirashdir.
3. Alloh taolo bizni aynan shu narsadan qaytarmoqda. Chunki, badgumonlik sababli bir kishiga yoki jamiyatga nisbatan tuhmat, ig'vo va hasad kabi boshqa illatlar paydo bo'ladi. Bu esa musulmonlar orasida hamjihatlik va birdamlikni yo'qolishiga, o'zaro ishonchsizlik va tafriqalanishga sabab bo'ladi.
4. Shu va shu kabi boshqa illatlarning paydo bo'lishligiga sabab bo'lgani uchun yomon gumon qilishning o'zi ham gunohdir.
5. Rosululloh sollallohu alayhi vasallam badgumonlikni yolg'onning eng yomonidir dedilar. Chunki, gumonda aniq asos bo'lmaydi. Asosi yo'q har qanday gapni gapirish, hox eshitgani bo'lsin, hox u qalbidagi o'y hayol bo'lsin, yolg'on deyiladi va bunday so'zga ishonishlik, o'zgalarga etkazishlik hamda xulosa qilishlik mumkin emas.
6. Din faqat aniq asoslarga, faktlarga suyanadi. Har xil dedi-dedi, mish-mish yoki kishining qalbidagi gumoni sabab hech kimga xulosa yoki jazo bermaydi. Aksincha, har qanday mujmallikni qoralaydi.

Alloh taolo qalbimizni salomat qilsin. Musulmon birodarlarimizga nisbatan yomon gumonda bo'lishlikdan, gumon sababli kimnidir yomon ko'rishdan, o'zgalarga shubha bilan qarashdan O'zi asrasin!

Olmazor tumanidagi

“Mevazor” masjidi imom noibi:

Yorbek Islom