Ta'lim, fan va madaniyat masalalari bo'yicha Islom tashkiloti – AYSYeSKO tomonidan 2020 yil Buxoro “Islom olami madaniyati poytaxti” deb e'lon qilinishi munosabati bilan viloyatda, xususan Yetti pir ziyoratgohlarida keng ko'lamda qurilish-bunyodkorlik ishlari amalga oshirilmoqda.

O'zbeksiton Respublikasi Prezidenti Administratsiyasining joriy yil 7 sentyabrdagi “Buxoro viloyatidagi Yetti pir ziyoratgohlari faoliyatini takomillashtirish bo'yicha chora-tadbirlar rejasi”ga muvofiq, viloyat hokimligi tomonidan barcha Yetti pir silsilasiga kiruvchi ziyoratgohlarda infokiosklar o'rnatildi.

Infokiosklar orqali endilikda sayyohlar mazkur ziyoratgohlardagi me'moriy majmualarni tomosha qilish, pirlarning hayoti va ijodi, ularning asarlari bilan bevosita tanishish imkoniyatiga ham ega bo'ldi. Shu bilan birgalikda har bir ziyoratgohda mazkur infokioskdagi axborotlar jamlangan QR kodlar ham o'rnatilgan bo'lib, bu orqali ziyoratchilar ushbu ma'lumotlarni qo'l telefonlariga yuklab olishi mumkin.

–Mazkur chora-tadbirlar rejasiga muvofiq, olimlar hamda Abu Rayhon Beruniy nomidagi Sharqshunoslik instituti tadqiqotchilari tomonidan Yetti pir allomalari ma'naviy merosiga bag'ishlangan 20 nomdan ortiq adabiyotlar nashrga tayyorlandi, – deydi viloyat hokimligi apparati jamoat va diniy tashkilotlar bilan aloqalar kotibiyati mudiri Akbar Rustamov. – Shu bilan birga barcha ziyoratgohlar hududida kutubxonalar ham tashkil etilmoqda.

Zarif Komilov, O'zA