Bismillahir Rohmanir Rohiym.
Alloh taologa bitmas-tuganmas hamdu sanolar bo'lsin.
Payg'ambarimizga mukammal va batamom salavotu durudlar bo'lsin.

Bugunning gapi

Son-sanoqsiz ne'matlar ichida insoniyatning boshqa maxluqotlardan ajralib, yuqori martabalarda turishiga sabab bo'ladigan ne'matlardan biri, shubhasiz, uning ilm sohibi bo'lishidir. Chunki ilm rag'bat qilingan narsalarning eng sharaflisi, orzu etilishidan tashqari, qo'lga kiritilishi uchun jiddu jahd qilishga undalgan narsalarning eng ustuni va erishilgan narsalarning eng foydasi ko'prog'idir.

2020 yil ulkan yo'qotishlar yili bo'lmoqda. kecha zabardast olim, ko'plab ulamolar ustozi Dovudxon domla, Qur'on hofizi, o'n xil qiroat sohibi, ustoz Zayniddin qori, avvalroq imom Hayrulloh domla, murabbiy, ustoz Olimxon domla, Alixon qori Zohidxon, bir necha imom domlalar, yoshgina qori yigitlar, dunyo miqyosida taniqli alloma, shayx, muhaddis Nuriddin Itr rahimahulloh va yana ko'plab olimlar, ulamolar birin-ketin bu yorug' olamni tark etib, oxirat sari ketmoqdalar. Mubashshir domla aytganidek, «Keyingi kunlarda ko'p olimlardan ayrilib qolyapmiz. Bu juda qo'rqinchli».

Ijtimoiy tarmoqlarda kunda-kunora ta'ziya e'lonlarini ko'raverib, to'g'risi internetni ochishdan cho'chib qoldi kishi. Yaxshi insonlar, solih kishilar, ustozlar tark etishyapti bizni. Yoshi ulug'lari ham, endigina 40 yoshni nari berisidagi yoshga kirganlari ham bor. Allohning taqdiri, qazosi. Uning qazoi qadarini rozilik ila qarshi olgan barcha yaqinlariga Alloh taolodan go'zal sabr tilaymiz.

Shu o'rinda ushbu hadis yodga keladi.

Abdulloh ibn Amr roziyallohu anhudan rivoyat qilinadi:

«Payg'ambar sollallohu alayhi vasallam: «Albatta, Alloh ilmni odamlardan bir sug'irish ila sug'irib olmaydi. Lekin ilmni ulamolarning (jonini) qabz qilish ila changallab oladi...».

Ikki Shayx va Termiziy rivoyat qilishgan.

O'zini bilgan har bir millat o'zidan etishib chiqqan ulamolarni e'zozlay oladi. Haqiqiy olimlaridan dinu-diyonat, iymon-e'tiqod, elu yurt foydasi uchun foydalana oladi. Chunki, bunday odamlarning borligi har bir xalq, har bir millat uchun katta baxtdir. Ular olamdan o'tishlari bilan bu baxt ham ketadi.

«Mavtul olimi - mavtul olami» (ya'ni, olimning o'limi-olamning o'limi) deyilgan. Shu bilan birga o'zini bilgan har bir millat doimo o'z ehtiyojlarini qondiradigan darajada, sifatda va sonda ulamolarni bo'lishi uchun qo'lidan kelgan har bir ishni qiladi.

Ilmning ko'tarilishi, ulamolarni vafotlari borasida Shayx Muhammad Avvoma hafizahulloh shunday deydilar: «Olim kishining o'limi Islom devoridagi bir yoriqdir. Tun-u kun o'zgarar ekan, uning o'rnini biror narsa berkita olmaydi». (Hasan Basriy).

Musulmonlar har kuni Islom devorida yangi yoriq paydo bo'layotganini guvohi bo'lishmoqda. Oralaridagi ilmiga amal qiladigan ulamolar bilan vidolashmoqdalar. Bugun musulmonlarning zimmasida bu bo'shliqni to'ldirish uchun Islomiy ilmlarga yuzlanishlari va doimo bu borada solih ulamolarning o'rnini to'ldira oladigan avlodni etishtirishni fikr qilmoqliklari lozimdir! Zero, musulmonlarning solihlar o'rnini to'ldira oladigan avlodni etishtirishni kechiktirishlari olimni yo'qotishdagi musibatlaridanda ko'ra og'ir musibatdir!

«Atrofimizdagi yaqinlarimiz o'taverib biz ham oxirat kishilariga aylanib qoldik. Alloh hammamizni hidoyatda muqim qilsin! Oxir amallarimiz solih va so'zlarimiz rost bo'lsin!» (Mubashshir Ahmad).

«Sabrlilarga xushxabar beringki, ular o'zlariga musibat etganda «Albatta, biz Allohnikimiz va albatta, biz Unga qaytuvchimiz», deganlardir».

Bobur Ahmad tayyorladi

Manba: https://islom.uz