G'arb davlatlarining birida g'aroyib an'ana bor ekan. Unga ko'ra, ko'chalardagi afishalarga, e'lonlar osiladigan joylarga “Haqiqiy sevgi hali oldinda” degan yozuvlar yopishtirib qo'yilarkan. Bu yozuvlar katta hayotga endi qadam bosayotgan yosh qizlarga qaratilgan bo'lar ekan. Ya'ni ularni iffatlarini saqlashga, iboli, hayoli bo'lishga chaqiriq hisoblanarkan. Chunki ko'pgina qizlar hali etarlicha hayotni anglaydigan, yaxshi bilan yomonni ajrata oladigan yoshga etmasdan aldoqchi yigitlarning yolg'on va'daliriga ishonib hayotlarini barbod qilishadi.

Sevgi-muhabbat munosabatlariga erta kirishish oqibatida yosh qizlarning xayoli keraksiz narsalar bilan band bo'lishi, ularning ongida ilm olishga bo'lgan ishtiyoq so'nib qolishi, ertayu kech o'tkinchi hoyu havaslarning domiga asir bo'lishlari oqibati yaxshilik bilan tugamasligi kundek ravshan va ko'pgina hayot tajribalarida ham isbotlangan haqiqatdir.

Qizlarni ogohlikka chaqirishda katta yozuvli e'lonlardan tashqari ishqiy munosabatlarni erta boshlab, hayotda pand egan ba'zi ayollar tarafidan yosh qizlarga barvaqt boshlangan sevgi boshga balo bo'lishi haqida tushuntirish ishlari ham olib borilar ekan.

O'sha suhbatlarda ayollar bunday munosabatlar yoshlikni zoye qilishini, ilm oladigan, katta-katta ishlarni amalga oshiradigan davrda arzimas o'yin-kulgu bilan vaqtni o'tkazib yuborilishi, qolaversa, bu ishlarning oqibatida iffatning buzilishi, nomusning toptalishi, qalb xotirjamligining yo'qolishi, hattoki erga tekkandan keyin ham bu narsa davom etishi haqida gapirib, qizlarga “Haqiqiy muhabbat hali oldinda” degan yozuv bitilgan bilakuzuklar hadya qilishar ekan.

Qiz bola har safar biror yigit bilan shunday munosabtga kirishmoqchi bo'lganda shu yozuvga ko'zi tushib bu yo'ldan qaytishi, bu yo'lning oxiri voy bo'lishini eslashi uchun shunday odat yo'lga qo'yilgan ekan.

Bugungi kunda biz musulmonlar bu kabi xayrli tadbirlarni amalga oishirishga har qachongidan ko'ra muhtojmiz. Zero, millatning, xalqning yuksalishi ayollarning islohi ila amalga oshiriladi. Agar ayol gul bo'lsa, millat ham guldek o'sib yashnaydi. Millat o'z gullarining, gulzorlarining payhon qilinishiga yo'l qo'yib bergan kuni kafanga o'ralgan kuni bo'ladi.

Doktor Abdulloh Muhammad Abdulmu'tining
"Farzand tarbiyasida 700 ta saboq" kitobidan
G'iyosiddin Habibulloh, Kamronbek Islom tarjimasi.