Madrasalarda o'tkazilgan test sinovlari natijalari e'lon qilindi
Barchamizga ma'lumki pandemiya munosabati bilan mamlakatimizdagi barcha oliy va o'rta maxsus ta'lim muassasalarida 2020-2021 o'quv yili uchun qabul imtihonlarini ochiq maydonlarda o'tkazildi.
Koronavirus infektsiyasi tarqalishini oldini olish maqsadida abituriyentlar test sinovlari o'tkaziladigan joylarga karantin talablariga qat'iy amal qilgan holda tibbiy niqop va qo'lqop bilan antiseptik vositalardan foydalangan holda kiritildi.
O'zbekiston musulmonlari idorasi tasarrufidagi o'rta maxsus islom ta'lim muassasalarining qabul imtihonlari Davlat test markazi tomonidan o'tkazildi. Test sinovlarining shaffof, ochiq va oshkora o'tkazilishini ta'minlash maqsadida qabul imtihonlari o'tkaziladigan joylar kuzatuv kameralari bilan jihozlanib, Davlat test markazi jalb qilgan kuzatuvchilar tomonidan nazorat qilib borildi.
O'rta maxsus islom ta'lim muassasalari bo'yicha 2020-2021 o'quv yili uchun 2020 yil 16-17 sentyabr' kunlari o'tkazilgan test sinovlari natijalari 2020 yil 25 sentyabr' kuni O'zbekiston musulmonlari idorasining @mandat_muslim_uz_bot telegram boti orqali e'lon qilinadi.
Abituriyentlar mazkur botda shaxsiy DTM maxsus kodini kiritish orqali o'zining test sinovi natijalari bilishlari mumkin.
O'zbekiston musulmonlari idorasi
Ta'lim va ilmiy-tadqiqot bo'limi
“Associated Press of Pakistan” AA: I Xalqaro islom sivilizatsiyasi forumi ishtirokchilari O‘zbekiston Prezidentiga murojaat yo‘lladi
Pokistonning “Associated Press of Pakistan” axborot agentligida I Xalqaro islom sivilizatsiyasi forumi yakunlariga bag‘ishlangan maqola e’lon qilindi, deb xabar bermoqda “Dunyo” AA.
Maqolada shu yilning 7–11 iyul kunlari O‘zbekistonda Islom sivilizatsiyasi bo‘yicha birinchi xalqaro forum bo‘lib o‘tgani, anjuman yakunida forum ishtirokchilari Prezident Shavkat Mirziyoyev nomiga murojaat yo‘llagani ta’kidlangan.
Qayd etilganidek, murojaatda Prezident Shavkat Mirziyoyev tashabbusi va bevosita qo‘llab-quvvatlovi bilan tashkil etilgan ushbu forum nafaqat nufuzli ilmiy anjuman, balki insoniyatning umumiy ma’naviy va intellektual merosini asrashga qaratilgan global hamkorlikning yangi bosqichini boshlab bergan tarixiy voqea sifatida baholangan.
Murojaatda forumning Toshkent, Samarqand va Termiz kabi buyuk sivilizatsiya markazlarida o‘tkazilgani chuqur ramziy ahamiyatga ega ekani qayd etilib, aynan shu zaminda jahon ilm-fani taraqqiyotiga ulkan hissa qo‘shgan allomalar yetishib chiqqanligi alohida ta’kidlangan.
“Forum ishtirokchilari BMT Bosh Assambleyasining 72-sessiyasida Prezident Shavkat Mirziyoyev tomonidan ilgari surilgan O‘zbekistondagi Islom sivilizatsiyasi markazini tashkil etish tashabbusini so‘nggi o‘n yillikdagi eng muhim xalqaro gumanitar tashabbuslardan biri sifatida e’tirof etdi. Ular mazkur markaz kelgusida jahonning yetakchi olimlarini birlashtiruvchi yirik xalqaro ilmiy-ma’rifiy maskanga aylanishiga ishonch bildirdi”, — deya fikr yuritilgan materialda.
Maqolada yozilganidek, O‘zbekistonda tarixiy merosni asrash, fundamental ilm-fanni rivojlantirish va sivilizatsiyalar muloqotini mustahkamlash borasida amalga oshirilayotgan keng qamrovli islohotlar yuksak baholangan.
Xususan, O‘zbekistondagi Islom sivilizatsiyasi markazi, Imom Buxoriy yodgorlik majmuasi, Imom Buxoriy, Imom Moturidiy va Imom Termiziy xalqaro ilmiy-tadqiqot markazlari hamda Xalqaro islom akademiyasi faoliyati ushbu siyosatning yorqin namunasi sifatida qayd etilgan.
O‘zbekiston musulmonlari idorasi Matbuot xizmati
- «
- »