Bu yil Vatanimiz istiqlolga erishganiga 29 yil to'ldi. Alloh taolo bu saodatli va qutlug' ayyomni barchamizga muborak qilsin!

Mustaqillik ne'matini yaxshi anglab, qadriga etish uchun atrofga ibrat nazari bilan qarasak, ba'zi davlatlardagi notinchlik, etishmovchilik va tartibsizliklarni ko'rib, yurtimizdagi tinchlik-xotirjamlikka benihoya shukr aytamiz.  

Ulamolarimizning hikmatlarida: sog'lik qadrini bilmoqchi bo'lsang – kasalga boq, farzand qadrini bilmoqchi bo'lsang – farzandsiz insonga qara, tinchlik qadrini bilmoqchi bo'lsang – notinch yurtga e'tibor qil, deganlar. Mustaqillik – hurlik, ozodlik, o'z Vatani, tili va e'tiqodiga ega bo'lish demakdir.

Mustabid tuzumi davrida ajdodlarimizdan meros bo'lib qolgan qadriyatlar, imon-e'tiqodimiz, milliy urf-odatlarimizni xalqimiz ongi va shuuridan sidirib tashlash harakat qilishdi, buyuk madaniyatimiz, diniy e'tiqodimiz va keng dunyoqarashimizni yo'qqa chiqarmoqchi bo'lishdi, ne-ne olimlar, ma'rifatimizning buyuk siymolari ularning qo'llarida shahid bo'lishgani achchiq haqiqat.

Istiqloldan so'ng xalqimiz barcha sohada emin-erkin sa'y-harakat qilish imkoniga ega bo'lgani kabi dinimiz ko'rsatmalarini xotirjam ado etish baxtiga ham muyassar bo'ldi. Minglab masjidlar ochilib, mo'min-musulmonlar ixtiyoriga topshirildi, o'nlab diniy ta'lim muassasalari barpo qilinib, u erda yoshlar diniy va dunyoviy fanlardan tahsil olmoqdalar. Aziz avliyo, ulug' alloma va fozil insonlarning maqbara va ziyoratgohlari ta'mirlandi. Har yili davlat ko'magi bilan minglab vatandoshlarimiz muborak haj va umra ziyoratiga borib kelmoqdalar. Bularning hammasi, albatta, Allohning inoyati bilan bizga berilgan istiqlolimiz sababidandir.

Shuningdek, buyuk ajdodlarimizning bebaho asarlarini o'rganib, ularni ona tilimizga tarjima qilish imkoniga ega bo'ldik. O'tgan yillar davomida Qur'on, hadis, tafsir, fiqh, islom tarixi, madaniyati va falsafasiga oid ko'plab yirik tadqiqotlar amalga oshirildi. Turli mavzudagi diniy adabiyotlar, yurtimizda yashab, ijod qilgan buyuk allomalarimiz ilmiy merosi nashr etilib, keng ommaga taqdim qilinmoqda.    

Bundan tashqari, O'zbekiston xalqaro islom akademiyasi, Mir Arab oliy madrasasi, Imom Buxoriy va Imom Termiziy xalqaro ilmiy-tadqiqot markazlari, viloyatlarda kalom, hadis, fikh, aqida va tasavvuf ilmi maktablari ochilgani hamda O'zbekistondagi Islom tsivilizatsiyasi markazining tashkil etilgani diniy-ma'rifiy sohani rivojlantirishga bo'lgan e'tiborning yorqin namunasidir.

So'nggi yillarda davlatimiz rahbari boshchiligida yurtimizni yuksaltirish, xalq farovonligini oshirish kabi xayrli ishlar “Halq davlat idoralariga emas, davlat idoralari xalqqa xizmat qilishi kerak” degan shior ostida amalga oshirilmoqda. Natijada xalqning vatanga bo'lgan mehri-muhabbati tobora ortib bormoqda.

Ayniqsa, davlatimiz tomonidan O'zbekiston musulmonlari idorasi huzuridagi “Vaqf” xayriya jamoat fondiga 150 milliard so'm mablag' ajratilishi tarixiy voqea bo'ldi. Bu yurtimizda inson omiliga bo'lgan ijobiy munosabatning isbotidir.

Har yili mustaqillik bayrami arafasida alohida shior tanlab olinadi. Bu yil mustaqillikning 29 yillik bayrami “Sen – qudrat manbai, saodat maskani, jonajon O'zbekiston!” shiori ostida nishonlanmoqda. Ushbu shiorlar zamirida xalqni birlashtirish, insonni tug'ilib o'sgan, kindik qoni to'kilgan vataniga muhabbatini oshirish maqsad qilingan. Haqiqatan, xalq birlashsa, katta kuchga aylanadi.

Halqimizda “Vatan ostonadan boshlanadi” degan naql bor. Har bir inson uchun kindik qoni to'kilgan tuproq, eng kichik Vatan – uyi hisoblanadi.

Qur'oni karimda marhamat qilinadi: “Alloh sizga uylaringizni oromgoh qildi”(Nahl surasi, 80 oyat).

Uyimiz bizga omonlik, xotirjamlik maskani, tinchlik-osoyishtalik markazidir. Unda xotirjamlik bo'lishi uchun yurtda tinchlik qaror topishi lozim. Oqibatda jamiyatda har tomonlama yuksalish va rivojlanish ro'y beradi. Odamlarning o'zaro bir-biriga bo'lgan ishonch va sadoqati, mehr va muruvvatining samimiy bo'lishi ham asosan tinchlik va xotirjamlikka bog'liqdir.

Payg'ambarimiz sollallohu alayhi va sallam: “Alloh taolo bandaga kattami, kichikmi bir ne'mat bersa va banda uning shukronasi uchun “Allohga hamd bo'lsin”, desa, shunda u o'sha ne'matdan ham afzalroq narsaga erishgan bo'ladi” (Imom Ibn Moja rivoyati) deganlar.

Demak, mustaqillik, tinchlik, xotirjamlik va salomatlik kabi ne'matlar – Alloh tomonidan bizga ato qilingan ulug' ne'matdir. Hadisga muvofiq, biz shukr qilsak, bu ne'matlar qadriga etsakkina, ziyoda bo'ladi. Aks holda qiyomat kuni ne'matlar borasida so'ralishimizni ham unutmaslik lozim.

Alloh bizlarni har bir ne'matning qadriga etuvchi, unga shukr qiluvchi bandalaridan qilsin!

Ubaydulloh ABDULLAYeV,
Farg'ona viloyati bosh imom-xatibi