Kaftdek ravon va tekis
Kechagina shodu xurramlik bilan kutib olgan muborak Ramazon oyi bugun nihoyalab qoldi. Bu xayr-saxovat va muruvvat oyida ko'plab ko'ngli o'ksik insonlar holidan xabar olinib, ularga hadyalar ulashildi.
Bu oyda qanday xayrli ish bo'lsa, hammasi amalga oshirildi. Hududlarni obodonlashtirish, ko'chat o'tqazish, gulu rayhonlar ekish.. hammasi uddalandi.
Ramazon hayitiga Bo'stonliq tumani Sobir Rahimov nomidagi mahalla fuqarolar yig'ini hududida joylashgan «Olimjon ota» jome masjidi imom-xatibi Elyorjon domla Erpo'latov tashabbusi bilan homiylar ko'magida mazkur mahallaning 144 metrli yo'liga asfal't qoplamasi yotqizilgani chinakam quvonchli voqYea bo'ldi. Bu xayrli ishga 139 million so'm homiylar mablag'i sarflangani mahalla ahlining uzog'ini yaqin qiladigan bo'ldi.
Rasululloh sollallohu alayhi va sallam: “Inson vafot etsa uchta amalining savobidan boshqa hammasi to'xtaydi. Ular – sadaqai joriya, foydali ilm va ota-ona haqqiga duo qiladigan solih farzand”, deb marhamat qilganlar.
Sadaqai joriya – oqib turadigan, ya'ni savobi mo'minga nafaqat bu dunyoda, balki qabrda ham manfaat berib turadigan go'zal ishlar majmuidir. Jumladan, jamiyat uchun o'ta manfaatli bo'lgan yo'llar va ko'priklarni qurish va ta'mirlash, maktab-madrasa va shifoxona kabilarni barpo etish ishlari ham ulamolarimiz tomonidan sadaqai joriya toifasidagi savobli ishlar, deb e'tirof etilgan.
Alloh taolo kaftdek ravon va tekis bunday yo'l qurilishiga, asfal't yotqizilishiga hissa qo'shgan barcha azizlarimizdan rozi bo'lsin.
Toshkent viloyati vakilligi
Matbuot xizmati
Turkiy davlatlar muftiylari Boku shahrida jamlanadi
Joriy yilning 13–16 sentyabr kunlari Ozarboyjon poytaxti Boku shahrida Turkiy davlatlar muftiylari kengashining navbatdagi VII yig‘ilishi hamda uning doirasidagi bir qator tadbirlar bo‘lib o‘tadi.
Yig‘inlarda turkiy dunyoning yetakchi din peshvolari – O‘zbekiston musulmonlari idorasi raisi, muftiy Shayx Nuriddin Xoliqnazar, Kavkaz musulmonlari idorasi raisi, Shayxulislom Allohshukur Poshshozoda, Turkiya Diyonat ishlari boshqarmasi raisi Safi Arpagush, Qozog‘iston musulmonlari diniy boshqarmasi raisi, bosh muftiy Navro‘zbay hoji Tag‘anuli, Qirg‘iziston musulmonlari diniy nazorati raisi, muftiy Abdulaziz qori Zakirov, Turkmaniston muftiyci Rahmon Qurbonmurodov kabilar boshchiligidagi turkiy davlatlar ulamolaridan iborat delegatsiyalar ishtirok etadi.
Mamlakatimiz delegatsiyasi safidan O‘zbekiston musulmonlari idorasi Ulamolar Kengashi, Fatvo markazi, hududiy vakilliklar hamda oliy diniy ta’lim muassasalaridan vakillar joy olgan.
Tadbirlar doirasida ulamolar musulmon ummati uchun muhim bo‘lgan shar’iy masalalar, zamonaviy fatvolar va mushtarak tashabbuslarni muhokama qilib, yakuniy hujjatlarni imzolaydilar. Shuningdek, ilmiy-amaliy anjuman, ikki tomonlama muzokaralar hamda tabarruk qadamjolar ziyorati ham rejalashtirilgan.
O‘zbekiston musulmonlari idorasi Matbuot xizmati
