Uqba ibn Omir roziyallohu anhu aytadilar: “Rasululloh sollallohu alayhi vasallamning tuyalarini etaklab borardim. U zot sollallohu alayhi vasallam menga: “Ey Uqba, eng yaxshi ikki surani senga o'rgatib qo'yaymi?” dedilarda “Qul a'uuzu birobbil falaq” va “Qul a'uuzu birobbin-naas”ni o'rgatdilar”.

Yana Uqba ibn Omir roziyallohu anhudan rivoyat qilinadi: “Kunlarning birida Rasululloh sollallohu alayhi vasallamni uchratib qoldim, u zotning qo'llarini ushlab: “Yo Allohning Rasuli, mo'minning najoti nimada?” dedim”.

U zot alayhissalom: “Tilingni tiy. Uyingga sig'. Gunohlaring uchun yig'la”, dedilar.

Boshqa safar Nabiy alayhissalom meni uchratib qoldilar va qo'limni ushlab: “Ey Uqba ibn Omir! Senga Tavrot, Injil, Zabur va Qur'ondagi uchta yaxshi surani aytaymi?” dedilar.

– Ha, ayting yo Rasululloh. Ota-onam Sizga fido bo'lsin! – dedim.

– U zot menga “Ixlos”, “Falaq”, “Nos”ni o'qib berdilar. Keyin: “Ey Uqba, ularni unutma, birorta tunni bu suralarni o'qimay o'tkazma!” dedilar.

– Men ushbu suralarni aslo unutmadim. Ularni o'qimay birorta tong ottirmadim.

Boshqa hadisda Uqba ibn Omir roziyallohu anhu bunday deganlar: “Rasululloh sollallohu alayhi vasallam menga har namozdan keyin “mu'avvizatayni” ya'ni “Falaq” va “Naas” suralarini o'qishni buyurdilar”.

Shuning uchun, kechasi uxlashga yotishdan avval hamda har namozdan keyin ushbu suralarni o'qishga odatlanish lozim.

Davron NURMUHAMMAD