Tokio masjidiga keluvchi yaponlar soni ortmoqda
Tokio markaziy masjidi har yili minglab musulmon bo'lmagan yaponiyalik ziyoratchilarni qabul qiladi. Shu ma'noda mazkur masjid imom-xatibi Muhammed Chinar yaponlarning Islomga qiziqishi haqida o'z kuzatuvlari bilan o'rtoqlashdi.
Chinar domla o'z masjidiga Yaponiyaning Vaseda, Keio va Meiji kabi nufuzli universitetlarining talabalari muntazam kelayotgani va Yaponiya universitetlarida ko'proq aspirant va magistratura talabalari Islom diniga oid dissertatsiya mavzularini tanlayotganini aytdi.
Shu munosabat bilan Chinar domla Islomda zakot berish, nikoh va ajrashish, musulmonlar o'rtasidagi qardoshlik munosabatlari kabi mavzularda yapon tadqiqotchilari bilan tez-tez maslahatlashib turadi, deb yozadi “IslamNews” sayti “Daily Sabah” nashriga tayanib.
Tokio masjidiga har yili 50 mingga yaqin noislomiy yapon tashrif buyuradi.
Tokio munitsipaliteti xodimi Zumanning so'zlariga ko'ra, u masjidga qiziqish tufayli 4 marta tashrif buyurgan – diniy bino uning ish joyi yonida joylashgan. Unda masjid arxitekturasi katta taassurot qoldirgan. Shundan beri u ishdan tanaffus paytida tez-tez masjid hovlisida o'tiradi.
O'zbekiston musulmonlari idorasi
Matbuot xizmati
"Xo‘jamulki" mahallasida obodlik va mehr-saxovat
Qumqo‘rg‘on tumanidagi "Xo‘jamulki" mahallasida "Mahallada obodlik va mehr-saxovat oyligi" doirasida keng jamoatchilik va aholi vakillari ishtirokida qizg‘in obodonlashtirish va bunyodkorlik ishlari olib borilmoqda. Bu tashabbus mahalla hayotiga yangicha ruh baxsh etib, hamjihatlik va ezgulik muhitini yanada mustahkamlamoqda.
Azaliy qadriyatlarimizdan biri bo‘lgan hashar an’anasi asosida mahalla ahli bir yoqadan bosh chiqarib, o‘z hududini yanada obod, fayzli va ko‘rkam maskanga aylantirish yo‘lida fidokorona mehnat qilmoqda. Har bir fuqaroning qalbida Vatanga muhabbat, mahallaga ehtirom tuyg‘usi jo‘sh urib, ular bunyodkorlik ishlariga faol hissa qo‘shmoqdalar.
Xususan, mahalla hududidagi muqaddas qadamjolardan biri – "Xo‘jamulki ota" qabristonida keng ko‘lamli tozalash va obodonlashtirish ishlari amalga oshirilmoqda. Hashar ishtirokchilari tomonidan qabriston hududi begona o‘tlar va chiqindilardan puxta tozalanib, qabr ustilari tartibga keltirilmoqda. Shuningdek, ziyoratchilar uchun qulay sharoitlar yaratish borasida zarur ishlar olib borilib, ajdodlar xotirasiga chuqur ehtirom ko‘rsatilmoqda.
Bu kabi ezgu tashabbuslar mahallada obodlik va hamjihatlik muhitini mustahkamlash bilan birga, ajdodlarimiz xotirasiga bo‘lgan hurmatimizni namoyon etadi. Ayni paytda, yosh avlodga milliy qadriyatlarimizni singdirish, ularni Vatanga muhabbat va mehnatsevarlik ruhida tarbiyalashda beqiyos ahamiyatga egadir. Bugungi hashar – kelajak avlod uchun namuna, ertangi kun uchun mustahkam poydevordir.
O‘zbekiston musulmonlari idorasi
Surxondaryo viloyati vakilligi Matbuot xizmati
