Joriy yilning 22 avgust kunidan boshlab, Buxoro shahri Gazli shossesi yo‘li yoqasida joylashgan «Sharq» bosh bekatidan soat 09-00 dan e’tiboran karantin talablari bo‘yicha belgilangan barcha sanitariya-gigiyena me’yorlarga amal qilgan holda «Buxoro shahri - Yetti pir ziyoratgohlari» yo‘nalishida transport qatnovi boshlanadi. Bu haqda O‘zbekiston Respublikasi Transport vazirligi Axborot xizmati xabar berdi.

Mazkur yo‘nalishda “ARK TRAVEL” MCHJ korxonasi o‘zining zamonaviy avtobus va mikroavtobuslarida qatnovlarni amalga oshiradi.

Ushbu yo‘nalishdagi qatnov O‘zbekiston Respublikasi Prezidenti Shavkat Mirziyoyevning 2019 yil 29-30 mart kunlari Buxoro viloyatiga tashrifi davomida viloyat faollari ishtirokida o‘tkazilgan yig‘ilish bayonining «Buxoro shahri – Yetti pir ziyoratgohlari» yo‘nalishida transport qatnovini yo‘lga qo‘yish to‘g‘risida berilgan topshiriq ijrosini ta’minlash, viloyatning turizm sohasini yanada rivojlantirish hamda sayyohlar va viloyat aholisiga sifatli transport xizmati ko‘rsatish maqsadida Buxoro viloyati transport boshqarmasi tomonidan yo‘lga qo‘yilmoqda.

http://xs.uz