HAYoTBAHSh O'GITLAR
Oiz Qaraniyning “Mahzun bo'lma” nomli kitobida quyidagi tavsiyalar keltirilgan:
1. Iymon bilan yaxshi ishlar pok hayot siridir. Bu ikkovini qo'lga kiritish uchun harakat qiling.
2. Ilm-ma'rifat talabida bo'lib, hamisha kitob o'qishni yo'lga qo'ying. Chunki kitob mutolaasi g'am-tashvishni ketkazadi.
3. Odamlarga yaxshilikning hamma turini ravo ko'ring, ezgulik ulashishda bardavom bo'ling. Shunda ko'nglingiz shod bo'ladi.
4. Shijoatli bo'ling, jur'atsizlik, qo'rqoqlikni tark eting. G'ayratli bo'lish qalbga rohat bag'ishlaydi.
5. Qalbingizni hasad, gina-kudurat, axloqsizlik, g'irromlik kabi illatlardan poklang.
6. Nazar solish, gapirish, eshitish, odamlarga aralashish, eyish-ichishda me'yor buzilishiga yo'l qo'ymang.
7. Samarali ishlar bilan band bo'ling. Shunda xafalikni unutasiz.
8. Bugungi kun hududida yashang, o'tib ketgan yoki endi keladigan kunlarni unuting.
9. Ko'rinishi, rizqi, salomatligi, boyligi, ilmi o'zingizdan pastdagilarga qarang, ulardan ibrat oling.
10. E'tiboringizni qo'rqinchli xayollarga, yomon fikrlarga qaratmang, ularga bog'lanib qolmang.
11. G'azab qilmang, sabrli bo'ling, g'azabingizni ichingizga yuting, halim, bag'rikeng bo'ling. Chunki inson umri juda qisqa.
12. Ne'matlar ketishidan, balo-ofatlar kelishidan aslo cho'chimang, balki Allohga tavakkal qiling.
13. Hayotingizni soddalashtiring, dabdabali yashashdan chetlaning. Chunki dabdabali hayot ruh uchun azobdir.
14. Siz haqingizda aytilgan yomon so'zlar hech qachon sizga zarar bermaydi, balki o'sha so'zni aytgan kishiga ziyon etadi.
15. Biron kishidan rahmat kutmang, yaxshilikni Alloh roziligi uchun qiling.
16. Foydali rejalar tuzing, g'amingizni unutish uchun o'sha reja bilan mashg'ul bo'lib, fikr yuriting.
17. Har qanday ishni o'sha zahoti bitirishni o'rganing, bugungi ishni ertaga qo'ymang.
18. O'zingizga munosib foydali amalni o'rganing, o'zingiz rohat oladigan ishni bajaring.
19. Birovning xatosiga, mish-mishlarga, turli gap-so'zlarga e'tibor beravermang.
20. Piyoda yuring, sport bilan shug'ullaning, sog'lig'ingizga ahamiyat bering, chunki sog' tanda sog'lom aql bo'ladi.
21. Tanqidlardan sarosimaga tushmang, bardam bo'ling. Shuni biling: tanqidlar qiymatingizni o'lchaydigan mezondir.
22. Hamma narsa Allohning taqdiri bilan bo'ladi. Shuni aslo yoddan chiqarmang.
23. Yomon tasodiflar ro'y berib qolishiga shay turing. Balki sizda sodir bo'layotgan narsalar yaxshilik bo'lib chiqar.
24. Musibatlar ko'zga malham, qalbga quvvatdir.
25. Albatta, qiyinchilik bilan birga engillik ham bor.
26. Jiddiy, samara beradigan ishlarni o'zingizga vazifa qilib oling, bekorchilikdan chetlaning.
27. Qasos olishga bo'lgan urinishingiz, birovlarga nisbatan adovatingiz xusumatchingiz bir chetda qolib, faqat o'zingizga zarar keltiradi.
28. Sizga etadigan barcha musibatlar sabab gunohlaringiz kechiriladi.
"Baxtli hayot sari" kitobidan.
Iordaniyada O‘zbekiston mustaqilligi bayrami munosabati bilan tadbir o‘tkazildi
Iordaniya poytaxtida O‘zbekiston mustaqilligining 35 yilligi munosabati bilan bayram tadbiri bo‘lib o‘tdi, deb xabar bermoqda “Dunyo” AA.
Tadbir O‘zbekistonning Ar-Riyoddagi elchixonasi tomonidan mamlakatimizning Iordaniyadagi faxriy konsuli Lauy Abug‘azaliy ko‘magida tashkil etildi.
Bayram tantanasida diplomatik korpus, Iordaniyaning davlat va jamoat tashkilotlari vakillari, taniqli ishbilarmonlar, yetakchi ommaviy axborot vositalari hamda o‘zbek diasporasi vakillari ishtirok etdi.
Uchrashuvda mehmonlar O‘zbekistonning mustaqillik yillarida erishgan yutuqlari, Prezident Shavkat Mirziyoyev rahbarligida amalga oshirilayotgan keng ko‘lamli islohotlar va zamonaviy ijtimoiy-iqtisodiy o‘zgarishlar natijalari bilan tanishtirildi.
Xalqaro hamkorlikni kengaytirish va O‘zbekistonning sarmoyaviy imkoniyatlariga alohida e’tibor qaratildi. Shu bilan birga, mamlakatimizning investitsion salohiyati, turizmni rivojlantirish, boy tarixiy-madaniy merosi hamda Islom sivilizatsiyasi markazi faoliyatiga bag‘ishlangan videoroliklar namoyish etildi.
Ishtirokchilar O‘zbekiston va Iordaniya o‘rtasidagi sayyohlik va gumanitar aloqalarni yanada rivojlantirishga xizmat qiladigan turizm imkoniyatlari, qadimiy shaharlar va madaniy obidalar bilan tanishish imkoniga ega bo‘ldi.
Eslatib o‘tamiz, 2025 yil 2 iyun kuni O‘zbekistonning qarorgohi Ar-Riyod shahrida bo‘lgan Iordaniyadagi elchisi Nodirjon Turg‘unov Qirol Abdulla II ibn al-Husaynga ishonch yorliqlarini topshirgandi.
O‘zbekiston musulmonlari idorasi Matbuot xizmati
