Musulmon donishmandlari kengashining Qozog'istonda filiali ochildi
Joriy yilning 11 oktyabr' kuni Qozog'istonning Astana shahrida Musulmon donishmandlari kengashining O'rta Osiyo filiali ochildi.
Ushbu filialning ochilishiga sabab o'tgan 2022 yilning 14–15-sentyabr' kunlari Astana shahrida bo'lib o'tgan “Jahon va an'anaviy dinlar etakchilarining VII-qurultoyi”da ishtirok etgan Al-Azhar shayxi Ahmad Toyyib janoblariga Qozog'iston Respublikasi Prezidenti Qosim-Jumart To'qayev ushbu taklifni kiritgan edi.
Prezidentning taklifiga binoan bu yil ushbu kengashning O'rta Osiyo – musulmon donishmandlari kengashining ochilish marosimi Astana shahrida “Tinchlik va hamkorlik saroyida” bo'lib o'tdi. Mazkur kengashning qarorgohi ushbu saroyda joylashishi ta'kidlandi.
Ushbu marosimda Qozog'iston respubilikasi Senati raisi Ashimbayev Mavlan Sagatxan o'g'li, Al-Azhar universiteti qoshidagi Islom tadqiqotlar markazi direktori Naziyr Muhammad Ayad, Musulmon donishmandlari kengashi bosh kotibi Muhammad Abdussalom ishtirok etdi va nutq so'zlab, boshlangan ushbu xayrli ishga baraka tiladi.
Ma'lumot uchun, Musulmon donishmandlari kengashi xalqaro miqyosdagi mustaqil tashkilot bo'lib, unga 1435 hijriy sananing 21 Ramazon oyida, melodiy hisob bilan 2014 yil 19 iyulida asos solingan. Ushbu tashkilotning o'z oldiga qo'ygan yagona maqsadi musulmon jamiyatlarda tinchlik va barqarorlikni ta'minlashga ko'maklashishdan iboratdir. Ushbu kengash o'z atrofiga islom ummati ichidagi etuk ilmu hikmatga ega, adolat va mo'tadil qarashlari bilan tanilgan shaxsiyotlarni to'plagan.
Musulmon donishmandlari kengashining bosh qarorgohi Birlashgan Arab Amirliklarining poytaxti Abu Dabi shahrida bo'lib, u islom ummatini birlashtirish, uning parchalanishini oldini olish, insoniy qadriyatlar, islomning bag'rikenglik tamoyillariga tahdid solayotgan kuchlarga qarshi birlashishga chaqiruvchi uyushma sanaladi.
Musulmon donishmandlari kengashi raisi katta imom Al-Azhar shayxi Doktor Ahmad Muhammad Toyyib janoblari sanaladi. Musulmon donishmandlari kengashi bosh kotibi Muhammad Abdussalom.
O'zbekiston musulmonlari idorasi
Matbuot xizmati
Shavkat Mirziyoyev: Yoshlarimizning har bir muvaffaqiyati biz uchun kuch-qudrat
Bugun mamlakatimizda Yoshlar kuni keng nishonlanmoqda. Asosiy bayram tadbirlari Toshkentdagi Xalqaro kongress markazida bo‘lib o‘tmoqda.
O‘zbekiston yoshlarini tabriklash va qo‘llab-quvvatlash uchun bu yerga Prezident Shavkat Mirziyoyev tashrif buyurdi.
Kongress markaziga kiraverishda yoshlarning turli sohalardagi loyihalari, kashfiyot va yutuqlari taqdimot qilindi. Masalan, “Yosh innovatorlar” ko‘rgazmasida muhandislik, raqamli texnologiyalar, sun’iy intellekt, uchuvchisiz qurilmalar namoyish etilgan. “Yashil” tashabbuslar” maydonchasida ekologiya, muqobil energetika, qishloq xo‘jaligi kabi sohalarga oid ishlanmalar ko‘rsatilgan. “Kreativ loyihalar” bo‘limidan hunarmandlik, dizayn, tasviriy san’at, video va prodyuserlik faoliyatidagi yutuqlar o‘rin olgan. “Yoshlar tadbirkorligi va startaplar” maydonchasida ushbu yo‘nalishdagi muvaffaqiyatli loyihalar haqida ma’lumot berilgan.
Jumladan, toshkentlik Rustam Hamdamovning “Billz” dasturi kichik va o‘rta biznesni avtomatlashtirishga yordam beradi. Hozirgacha bu loyihaga Buyuk Britaniya, Singapur, Turkiya ishbilarmonlari 6 million 600 ming AQSH dollari miqdorida investitsiya kiritgan.
Qoraqalpog‘istonlik yosh fermer Sherzod Niyazimbetov organik pomidorlar yetishtirib, quyoshda quritib va qadoqlab, Italiya hamda Fransiya kabi davlatlarga eksport qilmoqda. Uning korxonasida 200 nafarga yaqin xodim ishlamoqda.
O‘zbekiston Prezidentining 2019 yildagi qarori bilan tashkil etilgan Yoshlar akademiyasi bugungi kunda 7 mingdan ziyod yosh olimlarni birlashtirgan. Ko‘rgazmada ular uchun keng o‘rin ajratilgan. Toshkentlik Sayfullo Qodirov ekin maydonlarini raqamli xaritalash va yuqoridan dori sepish imkonini beruvchi dronlar yasagan.
Olimlar orasida “Raqamli avlod qizlari” tanlovi g‘olibalari ko‘pligi ham diqqatga sazovor. Xorazmlik Lobar Abdullayeva onkologik kasalliklarga sun’iy intellekt orqali tashxis qo‘yishga mo‘ljallangan “AI Scan” dasturini ishlab chiqqan. Qoraqalpog‘istonlik Qumara Sagidullayeva quyosh energiyasida yuruvchi kichik traktor, toshkentlik Abdulloh Jamoliddinov bog‘ni avtomatik sug‘orish tizimini ixtiro qilgan.
Davlatimiz rahbari mazkur taqdimotlar bilan tanishib, ularning tashabbuskorlari bilan muloqot qildi.
– Yoshlarimizning har bir muvaffaqiyati biz uchun kuch-qudrat, mamlakatimiz kelajagiga tayanch. Bugun farzandlarimiz zamonaviy yo‘nalishlarni egallab, ancha ilgarilab ketyapti. Ularni qo‘llab-quvvatlasak, sifatli ta’lim berib, sharoit yaratsak, bundan ham katta natijalarga erishadi, – dedi Shavkat Mirziyoyev.
Mutasaddilarga ixtirochi yoshlarni tegishli vazirliklarga biriktirib, loyihalarini rivojlantirish bo‘yicha ko‘rsatma berildi.
Yurtimizda bunday iqtidorli o‘g‘il-qizlar ko‘p. Bu ta’lim sohasiga, ayniqsa, STEAM yo‘nalishlariga qaratilayotgan e’tibor natijasi. So‘nggi yillarda matematika, fizika, kimyo va axborot texnologiyalariga ixtisoslashgan ko‘plab maktablar tashkil etildi. “Bir million dasturchi” loyihasi doirasida 325 ming yigit-qiz o‘qitildi.
Yosh tadbirkorlar tashkil qilgan 261 ta korxonaning yillik aylanmasi 100 milliard so‘mdan oshgan. Startaplarni moliyalashtirishga 145 million dollar venchur sarmoya kiritilgan.
Bayram munosabati bilan o‘tgan uchrashuvda Prezidentimiz yoshlar uchun yanada keng imkoniyatlarni belgilab berdi.
Manba: https://president.uz
