Oliy ma'hadning yana bir ustoziga dotsent unvoni berildi
Toshkent islom instituti Kengashi tavsiyasiga binoan O'zbekiston Respublikasi Oliy Attestatsiya komissiyasi institut o'qituvchilariga dotsent ilmiy unvoni berish yo'lga qo'yildi.
Institut Kengashi tavsiyasiga binoan dotsent ilmiy unvoni olgan ikkinchi o'qituvchi, Ilmiy ishlar va fan bo'yicha prorektor Primov Soatmurot Uralovich bo'ldi.
Shu munosabat bilan professor-o'qituvchilar va ilmiy xodimlar ishtirokida tadbir o'tkazildi. O'zbekiston musulmonlari idorasi raisining o'rinbosari, institut rektori, professor Muhammadolim Muhammadsiddiqov yurtimizda olib borilayotgan diniy-ma'rifiy islohotlar, masjidlar va diniy ta'lim muassasalari tashkil etilayotgani, magistratura va doktorantura bosqichlari ochilishi, imom-xatib va ustozlarning dissertatsiya himoyalari jadallashgani borasida so'z yuritib, institut o'qituvchi va ilmiy xodimlarini ilmiy-tadqiqot yo'nalishidagi faoliyatlari bo'yicha tavsiyalar berdi. Ilmiy daraja olib, unvonli o'qituvchilar safi kengayishining samaralari haqida to'xtaldi.
Shundan so'ng professor Muhammadolim domla “24.00.03 – Fiqh, kalom ilmi. Ilohiyot” ixtisosligi bo'yicha dotsent ilmiy unvoni guvohnomasini Soatmurot domla Primovga topshirdi.
Primov Soatmurot Uralovich 2003 yilda Imom Buxoriy nomidagi Toshkent islom institutida bakalavriat, 2008 yili Toshkent islom universiteti magistratura bosqichini tomomlagan. Toshkent islom institutida qariyb 20 yildan buyon faoliyat yuritib, “Aqoid va fiqhiy fanlar” kafedrasida o'qituvchi, kafedra mudiri bo'lib, Ilmiy ishlar va fan bo'yicha prorektor lavozimida mehnat qilmoqda.
S.Primov 2021 yilda O'zbekiston xalqaro islom akademiyasi huzuridagi ilmiy darajalar beruvchi Ilmiy Kengashda “Abu Shakur Keshiy “Tamhid” asarining moturidiya ta'limoti rivojida tutgan o'rni” mavzusida Islomshunoslik fanlari bo'yicha falsafa doktori (PhD) dissertatsiyasini himoya qildi.
Ma'lumot o'rnida, Imom Buxoriy nomidagi Toshkent islom institutining Kengashida taqdimnomasiga binoan institut tarixida ilk bor “Ijtimoiy fanlar” kafedrasi katta o'qituvchisi Irgash Daminovga dotsent unvoni berilgan edi.
Tadbir so'ngida Haq taolodan Soatmurot domla Primovga kelajakdagi ilmiy faoliyatiga ulkan zafarlar va Toshkent islom institutining ilmiy salohiyati yanada rivojlanishini so'rab duolar qilindi.
O'zbekiston musulmonlari idorasi
Matbuot xizmati
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »