Dunyodagi eng shimoliy masjid
Masjid musulmonlar hayotining ajralmas qismidir. Uning musulmon jamiyati hayotidagi rolini ortiqcha baholab bo'lmaydi, deb xabar beradi “Islamic Capital” nashri. Bu musulmonlar uchun ma'naviy, tashkiliy va ma'rifiy markazdir. Umumiy funktsiyalariga qaramay, har bir masjidning o'ziga xos tarixi va xususiyati bor.
Shunday qilib, dunyodagi eng chekka shimoliy nuqtaga barpo etilgan masjid Norilskdagi “Nurd-Kamol” masjidi bo'lib, Ginnesning rekordlar kitobiga kiritilgan. U norilsklik tadbirkor, millati tatar Mixad Bikmayev hisobidan qurilgan bo'lib, unga ota-onasi - otasi Nuritdin va onasi G'aynikamal sharafiga nom bergan.
Qurilish 1993 yilda boshlangan. Ba'zi me'moriy va muhandislik echimlari og'ir mahalliy iqlim sharoitlarini hisobga olgan holda amalga oshirildi: devorlarning kamroq muzlashi va shamollarga ko'proq qarshilik ko'rsatish uchun minoraning ko'ndalang kesimi kvadrat shaklida (odatda ishlatiladigan doira o'rniga) qilingan, kuchli qor yog'ishi sababli masjid gumbazi qiyaroq.
Ushbu loyiha (arxitektor Ye. Solnyshkin) Moskvadagi Arxitektorlar ittifoqining xalqaro biyennalesida uchinchi darajali diplom oldi.
Masjid 1998 yil 19 sentyabrda ochilgan va hozirda Norilskning barcha musulmonlarini – tatarlar, boshqirdlar, ozarbayjonlar va boshqalarni birlashtiradi.
O'zbekiston musulmonlari idorasi
Matbuot xizmati
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati
- «
- »