Hushxabar: “Masjid odoblari” kitobi nashr etildi
Ayni kunlarda xalqimiz e'tiboriga Alloh taoloning Yer yuzidagi uylari bo'lgan masjidlarda mo'min-musulmon kishi o'zini qanday tutishiga oid ko'plab foydali ma'lumotlarni o'z ichiga olgan “Masjid odoblari” nomli kitob taqdim etildi.
Mazkur mo''jazgina kitobda Yer yuzidagi ilk masjid, ziyorat uchun boriladigan uch masjid, Masjidul Harom va Masjidun Nabaviy fazilatlariga doir qiziqarli ma'lumotlarning ham berilishi uning o'qishliligini yanada oshiradi.
Shu bilan birga, unda masjidga oid bugungi kunda muhim bo'lgan savollarga soha mutaxassislarini muxtasar va aniq javoblari bilan ham tanishishingiz mumkin.
Ushbu kitobda mavzuga doirasidagi hikmatlar ham berilgan. Unda Hazrati Aliy roziyallohu anhudan keltirilgan hikmatda bunday deyiladi: “Agarda menga masjid va jannat ikkovidan birini tanlash ixtiyori berilsa, masjidni tanlagan bo'lardim. Chunki masjid Allohning haqqidir, jannat esa nafsning nasibasidir”.
Muzaffar domla Kamolov qalamiga mansub risolaga O'zbekiston musulmonlari idorasi raisi, muftiy Shayx Nuriddin Holiqnazar hazratlari so'z boshi yozib xayrli duo berganlar.
Alloh taolo ushbu kitobni xalqimizga muborak va manfaatli qilsin, xolis O'zining roziligi uchun qilingan amallar qatorida qabul etsin.
O'zbekiston musulmonlari idorasi
Matbuot xizmati
Turkiy davlatlar muftiylari 10 ga yaqin muhim bayonot va fatvolarni imzoladilar
Xabar berganimizdek, Ozarbayjon poytaxti Boku shahrida Turkiy davlatlar muftiylari kengashining navbatdagi VII yig‘ilishi bo‘lib o‘tdi.
Yig‘ilish yakunida O‘zbekiston, Turkiya, Ozarbayjon, Qozog‘iston va Qirg‘iziston muftiylari muhim yo‘nalishlarda 3 ta bayonot va zamonaviy masalalarga oid 6 ta yirik fatvoni imzolashdi.
Jumladan, «Islomning ilm-fan va texnologiyaga yondashuvi» mavzusidagi bayonotda Islom dinida insoniyat farovonligiga xizmat qiluvchi barcha ilmiy va texnologik yutuqlar qo‘llab-quvvatlanishi bilan birga, ular yuksak axloqiy mezonlar, adolat va mas’uliyat tamoyillari asosida rivojlanishi shartligi ta’kidlandi.
«Musulmonligi ma’lum bo‘lgan shaxsni kofirga chiqarishning hukmi» to‘g‘risidagi bayonotda Islom ta’limotiga ko‘ra, kalimai shahodat keltirib, qibla ahlidan bo‘lgan har qanday shaxs musulmon hisoblanishi hamda qilgan gunohi yoki amaldagi nuqsoni tufayli uni kufrda ayblash (takfir qilish) qat’iyan man etilishi aytildi. Shuningdek, Turkiy davlatlar ulamolari ushbu bayonotda jamiyatda fitna, qon to‘kilishi va nizolarga sabab bo‘luvchi takfirchilik oqimlariga qarshi ilmiy-ma’rifiy kurashni kuchaytirish, ummat birdamligini mustahkamlash zarurligiga e’tibor qaratishdi.
«Oila qurishga targ‘ib qilish, uni muhofaza qilish va mustahkamlashga doir umumiy mas’uliyat» bayonotida Islom ta’limotiga ko‘ra, oila nikoh asosiga quriladigan, sog‘lom avlod va jamiyat davomiyligini ta’minlovchi, insonga ruhiy xotirjamlik hamda axloqiy tarbiya beruvchi muqaddas muassasa ekaniga urg‘u qaratildi. Muftiylar oila institutini himoya qilish, yoshlarni oilaga tayyorlash va milliy-ma’naviy qadriyatlarni mustahkamlashda birdamlikka chaqirdilar.
Shuningdek, muftiylar tomonidan «Bitta qabrga birdan ortiq mayyitni dafn etishning hukmi», «Ijaraga berilgan dehqonchilik yerlarining ushri», «Fatvo so‘rash va fatvo berishda sun’iy idrokdan foydalanish masalasi», «Juma namozi durust bo‘lishining shartlari», hijriy oy boshlanishini aniqlash mezonlari va takfir masalasiga doir 6 ta fatvo matni imzolandi.
O‘zbekiston musulmonlari idorasi Matbuot xizmati
