Hadeb qasam ichaverma, rost gapirayotgan bo'lsang ham
Hadeb qasam ichaverma, garchi rost gapirayotgan bo'lsang ham
Alloh senga farz qilgan mol-mulkning zakotini xursand bo'lib, ichingdan xohlab ado et. Ro'zangni yolg'ondan va g'iybatdan saqla.
Qo'shnining, miskinning, qarindoshlarning haqqiga rioya qil, ahli-oilangga odob ber. Qo'l ostingdagilarga yumshoq munosabatda bo'l. Alloh senga buyurganidek faol shaxs bo'l. Yaxshilik qilishga imkoniyating bo'lsa uni tez qilib qol, sen uchun shubhali ko'ringan narsalarni tark et. Mo'minlarga mehribon bo'l, qayerda bo'lsang ham haq so'zla.
Hadeb qasam ichaverma, garchi rost gapirayotgan bo'lsang ham. Hohlagan gapingni gapirib tilingga erk beraverma, garchi so'zamol bo'lsang ham. Olim bo'lsang ham dinda takalluf qilma. Har bir gapingdan oldin ilmni muqaddam qo'y (doim bilib gapir).
Ibodatda mahkam bo'lsang ham, baribir Allohdan qo'rquvda tur (o'zingga juda ishonib yuborma). Dining salomat bo'lishi uchun odamlar bilan murosai-madora qil. Tilyog'lamalikdan tamoman saqlan.
Odamlar bilan chiroyli muomala qil. Bilmagan narsangni “Bilmadim, vallohu a'lam” deyishdan uyalma.
Gapingni eshitishni xohlamaydiganlar oldida gapirma, senga yomon ko'rsatadiganlar oldida diningni sarflama. Toqating etmaydigan musibatga parvo qilma, ko'p siqilma. Seni xorlaydiganlardan o'zingni baland tut. Hunuk xulqlarni o'zingga ep ko'rma. Faqat omonatdor odam bilangina do'st tutin. Sirlaringni hammaga ham aytaverma. Odamlarning holiga qarab muomala qil, aqli etmaydigan uslubda gapirmagin. Chaqirilmaganing ishga kirmagin (chaqirilmagan joyga bormagin).
Ulamolarning, hakim zotlarning qadrini bil. Senga qilingan yaxshilikni mukofotsiz qoldirma, yaxshilik bilan javob qaytar. Johillardan yuz o'gir, ahmoqlarga parvo qilma, ishingda Allohdan qo'rqqanlar bilan maslahatlash.
Birodaringga mazlum bo'lsa yordam ber, zolim bo'lsa uni haqqa qaytar, uning oldidagi o'z vazifangni bajar, lekin undan haqqingni talab qilma. Qarzdorga engillik qilib ber, bevalarga, etimlarga mehr ko'rsat, sabrli kambag'allarni ikrom qil, musibatga uchragan boylarga rahmdil bo'l, hech kimga hasad qilma.
Hech kimni g'iybat qilma, oxiratda so'roqqa tutilishdan qo'rqqan holda yomon gumon qilish eshigini butunlay yopib, yaxshi gumon eshigini och. Boshqalarning berishidan umidingni uzib, tamagirlik eshigini yop, qanoat birla boylik, behojatlik eshigini och. Allohning ismini unga yomon narsalarni nisbat berishdan polka.
Vaqtingdan unumli foydalan, tun-u kuning qanday o'tayotganiga qara.
Doimo tavbangni yangilab tur, vaqtingni uch qismga bo'l: ilm uchun, amal uchun, o'z haqlaring va zimmangdagi vazifalaring uchun. O'tgan hodisalardan ibrat ol, ikki toifa – ya'ni, Allohning rizosi bilan jannatga boradigan toifa va Allohning g'azabiga duchor bo'lib jahannamga yo'l oladigan toifa – Allohning huzurida qanday turishi haqida tafakkur qil. Allohning senga yaqinligini bil va yozib turuvchi farishtalarni ikrom qil.
Allohning ne'matlaridan fahm bilan foydalan va sano, shukr bilan javob qaytar.
Nafsning “Turli maqom-darajalarga erishding”, degan yolg'onidan, odamlarni mensimay haqni ko'rmaslikka olishdan ogoh bo'l, chunki bu o'ldiradigan o'qdir. Odamlar seni yomon ko'rishidan, ularning nazaridan tushib qolishdan qo'rqma. Ajal yaqinligini eslab faqirlik qo'rquvidan voz kech. Solih amallaringni imkoning boricha yashir.
Sendan maslahat so'ralsa bor imkoningni ishlat, Alloh uchun yaxshi ko'r va Alloh uchun (yomon odamlar bilan) aloqani qat'iy uz. Faqat taqvodor olim bilangina do'st bo'l, qalb ko'zi ochiq oqil inson bilangina birga bo'l. O'zingdan oldingi imomlarga ergash, o'zingdan keyingilarga muallim bo'l. Taqvodorlarga peshvo bo'l, hidoyat izlovchilarga panoh bo'l.
Doktor Hasson Shamsi Poshoning “Metin qoyalar” kitobidan
G'iyosiddin Habibulloh, Ne'matulloh Isomov tarjimasi.
Saudiya Arabistoni xalqaro qorilar tanlovining ikkinchi kunida 33 nafar ishtirokchi o‘zaro bellashdi
Makkada bo‘lib o‘tayotgan 46-Saudiya xalqaro qorilar musobaqasining ikkinchi kunida 28 mamlakatdan 33 nafar erkak va ayol musobaqa qatnashchilari o‘zaro bellashdi.
IQNA "Saudiya axborot agentligi"ga tayanib xabar berishicha, Makkada Saudiya Arabistoni Islom ishlari, da’vat va hidoyat vazirligi shafeligida o‘tkazilgan tanlovning final bosqichi turli mamlakatlardan kelgan erkaklar va ayollar ishtirokida davom etdi.
Tadbirning ikkinchi kunida erkaklar va ayollardan iborat hakamlar hay’ati 28 mamlakatdan 33 nafar erkak va ayol ishtirokchining Qur’on tilovatiga baho berdi.
Ikki bosqichda, ertalab va kechqurun o‘tkazilgan hakamlar hay’ati Katta masjid hovlisida 17 nafar erkak va tanlov o‘tkaziladigan joydagi ayollar bo‘limida 16 nafar ayolni o‘z ichiga oldi. Shunday qilib, birinchi va ikkinchi kunlarda erkaklar va ayollar hay’ati oldida yangragan chiqishlarning umumiy soni 40 dan ortiq mamlakatdan 66 taga yetdi.
Tadbir kelasi payshanbagacha (2026 yil 20 avgust) davom etadi, bu ishtirokchilarning Saudiya Arabistonidan jo‘nab ketish kuni bo‘ladi. Qur’on ilmlari, qiroat va qiroat qoidalari bo‘yicha erkak va ayol mutaxassislardan iborat hakamlar guruhi elektron hakamlik tizimidan foydalangan holda chiqishlar, qorilar va matnni yod olgan ijrochilarni baholaydi, bu esa baholashning aniqligini oshiradi va turli yo‘nalishlarda adolatni ta’minlaydi.
Ayni paytda 133 mamlakatdan 334 nafar erkak va ayol besh yo‘nalishda, jumladan, yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Tadbir 6 avgust kuni boshlangan bo‘lib, uning maqsadi yosh musulmonlarni Qur’onni yodlash va tushunishga, oyati karimalar ustida mulohaza yuritishga va halol raqobatni yaratishga undashdir.
Ushbu musobaqada u boshlanganidan beri rekord darajadagi ishtirokchilar - 133 mamlakatdan 334 kishi ishtirok etdi va umumiy sovrin jamg‘armasi 10 260 000 saudiya rialini tashkil etdi, bu musobaqa boshlanganidan beri eng yuqori miqdordir.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
