Otinoyilar mas'uliyati oshirilmoqda
O'zbekiston musulmonlari idorasi Hotin-qizlar masalalari bo'yicha bo'lim mas'ul xodimlari Mohira Zufarova va Munira Abubakirova o'z safarlarini Farg'ona viloyatida davom ettirmoqda.
Tashrif davomida viloyatdagi otinoyilar bilan uchrashuvda Din ishlari bo'yicha qo'mitaning viloyatdagi bosh mutaxassisi D.G'ofurova, Farg'ona viloyati bosh imom-xatibining Hotin-qizlar masalalari bo'yicha yordamchisi H.Komilova, tuman-shahar bosh otinoyilari va mahalla otinoyilar qatnashdi.
Mazkur muloqotda soha vakillari otinoyilik mas'uliyati, ularning yutuq va kamchiliklari bilan birga faoliyatni yanada rivojlantirish bo'yicha tavsiya va takliflarini berish hamda viloyatda avj olayotgan dinimizda asosi yo'q turli bid'at-xurofotlarni oldini olish borasida ma'ruzalar qilishdi.
O'zbekiston musulmonlari idorasi
Matbuot xizmati
Sayyid Yahyo Bokuviy merosiga bag‘ishlangan xalqaro konferensiya bo‘lib o‘tmoqda
Boku shahrida Turkiy davlatlar muftiylari yig‘ilishi doirasida ulug‘ mutafakkir, tasavvuf olimi Sayyid Yahyo Bokuviy merosiga bag‘ishlangan xalqaro konferensiya o‘z ishini boshladi.
Ushbu nufuzli tadbirda Turkiy davlatlar tashkiloti, Butunjahon musulmon donishmandlar kengashi, IRCICA, ICESCO, Al-Azhar ulamolar kengashi vakillari hamda yetuk sharqshunos va islomshunos olimlar ishtirok etmoqda.
Anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ma’ruza qildilar.
Muftiy hazratlari Sayyid Yahyo Bokuviyning tasavvuf tarixidagi maqomi va uning ta’limoti haqida to‘xtaldilar. Shuningdek, nutqda alloma nafaqat tasavvuf, balki diniy ilmlar, tabiiy va aniq fanlarni egallagan qomusiy olim bo‘lgani, o‘ttizga yaqin asarlari inson nafsini tarbiyalashda muhim qo‘llanma ekani ta’kidlandi.
Shayx Nuriddin Xoliqnazar hazratlari Qur’oni karim va hadisi shariflarga tayangan holda qalb salomatligi va pokligi inson hayotining bosh mezoni ekanini bayon etib, turkiy xalqlarni bog‘lab turgan umumma’naviy ildizlarga alohida urg‘u berdilar:
«Hazrat Ahmad Yassaviy, Bahouddin Naqshband va Sayyid Yahyo Bokuviy kabi buyuk zotlar ilgari surgan nafs tarbiyasi, insonparvarlik va yuksak axloq g‘oyalari bugun ham qardosh xalqlarimizni birlashtirib turuvchi mustahkam ma’naviy ko‘prikdir. Bunday ulug‘ siymolar merosini hamkorlikda o‘rganish xalqlarimizning ma’naviy birligini mustahkamlash va yoshlarimizni sog‘lom e’tiqod ruhida tarbiyalashga xizmat qiladi».
Uch kunlik anjuman davomida O‘zbekiston ilmiy jamoatchiligi ham ma’ruzalar bilan ishtirok etadi.
O‘zbekiston musulmonlari idorasi Matbuot xizmati
