Saudiya Arabistonining imomlarning kibermakondagi faoliyatini kuzatishdagi qat'iyati
“Masjid al-Harom” va “Masjid an-Nabaviy” ishlari boshqarmasi ijtimoiy tarmoqlarda ushbu ikki muqaddas masjidning imom-xatiblari va mashhur voizlari nomidan faoliyat yurituvchi akkauntlarga qarshi qat'iy ekanini bildirdi.
“IQNA” saytining “Al-Khaleej” ga tayanib xabar berishicha, “Masjid al-Harom” va “Masjid an-Nabaviy”ishlari boshqarmasi ushbu ikki muqaddas masjidning imomlari va mashhur notiqlari nomidan ijtimoiy tarmoqlarda faoliyat yurituvchi akkauntlarga qarshi kurashda qat'iy qaror qilganini ma'lum qildi.
“Masjid al-Harom” ishlari boshqarmasining diniy ishlar bo'yicha o'rinbosari Badr ash-Shayx, “Masjid al-Harom” va “Masjid an-Nabaviy” ning imomlari va muazzinlarining ijtimoiy tarmoqlarda hech qanday akkauntlari yo'qligi va ularning nomi ostidagi akkauntlarda qanday mavzular e'lon qilinganini tushuntirdi, ularning shayxlarga hech qanday aloqasi yo'qligini aytdi. Bu akkauntlar soxta bo'lib, ularning egalariga vakolatli organlar tomonidan qattiq choralar ko'riladi, dedi u.
Yakunda, shuningdek, barcha ijtimoiy tarmoq foydalanuvchilariga ushbu akkauntlarga obuna bo'lishdan tiyilib, muqaddas qadamjolar va boshqa tegishli masalalarga oid har qanday ma'lumotni faqat “Masjid al-Harom” va “Masjid an-Nabaviy” ishlari boshqarmasining rasmiy akkauntlari orqali olishlarini tavsiya qildi. Bu bayonot “Masjid al-Haromda faoliyat olib boruvchi imomlar va muazzinlar nomi ostidagi akkauntlarda yaqinda noaniq hadislar e'lon qilingani va ijtimoiy tarmoq foydalanuvchilarining keng qarshiligiga sabab bo'lganidan so'ng paydo bo'ldi.
“Masjid al-Harom” va “Masjid an-Nabaviy” idorasining so'nggi bayonotida: “Masjid imomlari va ikki muqaddas joy muazzinlarining ijtimoiy tarmoqlarda maxsus akkauntlari yo'q”, - deyilgan.
Saudiya Arabistonida Tvitter, Feysbuk va Instagram juda mashhur, biroq bu tarmoqlardagi saudiyalik foydalanuvchilarning faolligi mamlakat xavfsizlik organlari tomonidan qattiq nazorat qilinadi. Shuningdek, saudiyaliklar Tvitterning eng muhim aktsiyadorlaridan biri bo'lganligi sababli ular foydalanuvchi ma'lumotlariga, ayniqsa, uydirma nomlar ostida faoliyat yurituvchi foydalanuvchilarga keng foydalanish imkoniyatiga ega ekani xabar qilingan.
O'zbekiston musulmonlari idorasi Matbuot xizmati
Hijriy yangi yilingiz muborak bo‘lsin!
2025 yilning 26 iyun kuni – yangi 1447 hijriy yil – Muharram oyi boshlanishining 1 kunidir. Ashuro kuni 2025 yilning 5 iyul, shanba kuniga to‘g‘ri keladi.
Muharram oyi qanday oy?
Muharram oyi – musulmonlar taqvimining birinchi oyidir. Bu oy Alloh taolo urush, qon to‘kishni harom qilgan (Zulhijja, Zulqa’da, Muharram, Rajab) to‘rt oyning biri bo‘lib, uning o‘ninchi kuni ya’ni, ashuro kuni alohida fazilatlarga ega.
Ashuro qanday kun?
Bu kun haqida Rasululloh sollallohu alayhi vasallam: “Bu shunday yaxshi kundirki, bu kunda Alloh Bani Isroilni dushmanlaridan qutqargan. Shu bois Muso alayhissalom bu kunda ro‘za tutgan. Men Musoga ko‘proq (yaqin bo‘lishga) haqliroqman”, dedilar va u kunda ro‘za tutib, odamlarni ham uning ro‘zasini tutishga buyurdilar” (Imom Buxoriy rivoyati).
Ashuro kuni ro‘za tutish o‘tgan bir yillik gunohlarga kafforat bo‘ladi.
Bu haqda Rasululloh sollallohu alayhi vasallam: “Ashuro kunining ro‘zasi – Allohdan umid qilamanki – bir yil oldingi gunohlarga kafforat bo‘ladi”, deganlar (Imom Muslim rivoyati).
Bu kun yaqinlarga kengchilik qilish, bir yillik kengchilikka sabab bo‘ladi.
Abu Sa’d roziyallohu anhudan rivoyat qilinadi. Nabiy sollallohu alayhi vasallam: “Kim Ashuro kuni ahli ayoliga kenglik yaratsa, Alloh unga yil bo‘yi kenglik yaratadi”, dedilar (Imom Bayhaqiy rivoyati).
Sufyon ibn Uyayna rahmatullohi alayh: “Bu hadisni oltmish yil tajriba qildim va faqatgina yaxshilik ko‘rdim”, deganlar.
Ashuro kunini Rasululloh sollallohu alayhi vasallam qanday o‘tkazardilar?
Rasululloh sollallohu alayhi vasallam bu kunni o‘tkazib yubormaslik uchun qattiq harakat qilardilar, uning savobiga erishish uchun bu kunning kelishini intiqlik bilan kutardilar. Bu haqda Ibn Abbos roziyallohu anhu aytadilar: “Rasululloh sollallohu alayhi vasallamni Ashuro kuni ro‘zasini Ramazon oyi ro‘zasini kutib sog‘ingandek, boshqa kun va oy ro‘zasini kutganlarini ko‘rmadim” (Imom Buxoriy, Imom Muslim rivoyati).
Abdulloh ibn Abbos roziyallohu anhudan rivoyat qilinadi. Rasululloh sollallohu alayhi vasallam Ashuro kuni ro‘zasini tutib, odamlarni ham bu kunning ro‘zasini tutishga buyurganlarida, sahobalar: “Yo, Rasululloh! Bu kun yahudiy va nasroniylar ulug‘laydigan kun-ku!” deyishdi. Shunda Rasululloh sollallohu alayhi vasallam: “Alloh xohlasa kelasi yil to‘qqizinchi kuni ham tutamiz”, dedilar. Ammo, kelasi yil kelmasidan Rasululloh sollallohu alayhi vasallam vafot etdilar (Imom Muslim rivoyati).
Ulamolarimiz Rasululloh sollallohu alayhi vasallamning ushbu niyatlariga e’tiboran, Ashuro kuniga qo‘shib bir kun oldingi yoki bir kun keyingi kunda ham ro‘za tutmoq afzal deydilar.
Alloh taolo ushbu oyning fazilatlaridan barcha mo‘min-musulmonlarni to‘liq bahramand etsin. O‘zining roziligini topadigan amallarda bardavom qilsin.
O‘zbekiston musulmonlari idorasi
Matbuot xizmati
