Namozga niyat qilishda adashish
Cavol: Hufton namozida imomga iqtido qilib, shom namoziga niyat kilib qo'yibman. Boshqatdan o'qib olishim kerakmi?
Javob: Bismillahir Rohmanir Rohiym. Niyat namozning shartlaridan biri hisoblanadi. Bu niyatda qalbdagi niyat e'tiborli bo'ladi. Tilda boshqa namoz, qalbda boshqa namozni niyat qilsa, qalbdagi niyat hisobga o'tadi. Shunga ko'ra agar siz dilingizda xufton namozini o'qish niyati bo'lib, tilingizda shom namozini aytgan bo'lsangiz, buning zarari yo'q. Bu holatda namozni qayta o'qimaysiz. Agar dilingizda ham shom namozi deb niyat qilgan bo'lsangiz, u holda qayta o'qib olasiz. Bu borada fiqhiy manbalarimizda quyidagicha iboralar kelgan: “Niyatda e'tiborga olinadigan narsa bu bajarilayotgan ishni qalbning qasd qilishidir. Qalbdagi niyatga tildagi niyat zid bo'lsa, buning ahamiyati yo'q. Chunki tilda aytish qasd qilish emas, balki gapirishdir. Masalan, bir kishi peshin namozini o'qish uchun dilida peshinni niyat qildi, ammo adashib tili bilan asrni niyat qilib qo'ydi. Bunday niyat qilishi kifoya qiladi”(“Raddul muhtor” kitobi). Vallohu a'lam.
O'zbekiston musulmonlari idorasi Fatvo markazi
YUNЕSKO bilan O‘zbekiston mahalla tizimi tajribasini xalqaro darajada targ‘ib qilish masalasi muhokama qilindi
O‘zbekiston va YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibiyati vakillari o‘rtasida onlayn uchrashuv bo‘lib o‘tdi, deb xabar bermoqda “Dunyo” AA.
Mamlakatimizning YUNЕSKO huzuridagi Doimiy vakolatxonasi ko‘magida tashkil etilgan muloqotda mahalla bilan bog‘liq madaniy an’ana va urf-odatlar, ularni xalqaro darajada targ‘ib qilish istiqbollari muhokama qilindi.
YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibi Fumiko Oxinata va Osiyo-Tinch okeani mintaqasi uchun mas’ul dastur mutaxassisi Nikolas Tan mavzu yuzasidan o‘z fikr-mulohazalarini bayon etdi.
O‘zbekiston tomonidan Tashqi ishlar vazirligi, O‘zbekiston mahallalari uyushmasi hamda YUNЕSKO huzuridagi Doimiy vakolatxonasi vakillari mahallaning ko‘p asrlik tarixi, uning jamiyat hayotidagi alohida o‘rni va milliy an’analarni saqlashdagi ahamiyati haqida so‘z yuritdi.
Uchrashuvda mahalla O‘zbekiston xalqi turmush tarzining ajralmas qismi ekani ta’kidlandi. U insonlarni yaxshi qo‘shnichilik, o‘zaro yordam, hamjihatlik va katta avlod vakillariga hurmat tamoyillari asosida birlashtiradi.
YUNЕSKO Kotibiyati vakillari taqdim etilgan materiallarga katta qiziqish bildirdi. Ular O‘zbekistonda mahalla bilan bog‘liq shakllangan jamoat hayoti tartibining o‘ziga xos xususiyatlarini e’tirof etdi.
Suhbat davomida O‘zbekistonning nomoddiy madaniy merosni targ‘ib qilishdagi roli alohida qayd etildi. Shu nuqtayi nazardan, o‘zbek mahalla tizimi tajribasi YUNЕSKO Kotibiyati mutaxassislarida katta qiziqish uyg‘otdi.
O‘zbekiston musulmonlari idorasi Matbuot xizmati
