Duo qilsangiz ijobat bo'lmaydi, agar...
بسم الله الرحمن الرحيم
الحمد لله رب العالمين و الصلاة و السلام على سيدنا محمد و على آله و أصحابه أجمعين
لا حول و لا قوة إلا بالله
Dinimizning asosiy yo'nalishi nasihatdan iboratdir. Bu haqda Tamim Doriy roziyallohu anhudan rivoyat qilingan hadisni ko'rishimiz mumkin. Rasululloh sallallohu alayhi va sallam: “Din nasihatdir”, dedilar. So'radilar: “Kim uchun?”. Nabiy alayhissalom: “Alloh uchun, U Zotning Kitobi uchun, U Zotning Rasuli uchun va musulmonlarning imomlari hamda ommalari uchun”, dedilar (Imom Buxoriy, Muslim, Abu Dovud, Termiziy va Nasoiy rivoyati).
Amri ma'ruf va nahyi munkar imkoni bor har qanday musulmonga farz. Huzayfa roziyallohu anhudan rivoyat qilingan hadisi sharifda Payg'ambarimiz sollallohu alayhi va sallam aytadilar: “Nafsim qo'lida bo'lgan zotga qasamki, albatta yaxshi ishga buyurasiz va, albatta munkar ishdan qaytarib turasizlar. Yoki bo'lmasa to'satdan Alloh ustingizga uqubat (jazo)ni yuboradiki, so'ngra duo qilsalaringiz ham ijobat bo'lmay qoladi” (Imom Termiziy rivoyati).
Mazkur nasihat avvalo oiladan boshlanishi kerak. Biroq oila boshlig'i bo'lmish otaning o'zida odob bo'lmasa, amal bo'lmasa, ilm va ma'rifat bo'lmasa, qandoq qilib ham nasihat qilsin?
Shuning uchun tarbiyani avvalo o'zimizdan boshlashimiz kerak. Biz o'zimizni isloh qilmas ekanmiz, boshqalarga nima ham deya olardik?
Oila boshlig'i bir erkak sifatida tirikchilik ishlarini ado qilib, oila uchun, bola tarbiyasi uchun ham vaqt ajratmas, ularning ustidan zimdan nazorat qilib turmas ekan, bunday oilada voyaga etgan farzanddan nimani kutish mumkin?
Keyingi navbat qarindosh-urug'larni ham vaqti-vaqti bilan tartibga solib turishdir. Zero, ularning javobgarligi ham bizning zimmamizdan soqit emasligini unutmaslik kerak. Rasululloh sollallohu alayhi vasallam butun bashariyatga, nainki bashariyatga, balki jinlarga ham payg'ambar bo'lib yuborilgan bo'lsalar-da, Alloh taolo u zotga xitob qilib qarindoshlarni ogohlantirishni alohida ta'kidlagan: “Yaqin qarindoshlaringni ogohlantir” (Shu'aro, 214).
Ana endi navbat butun jamiyat a'zolariga keladi. Shu yurtdagi, shu zamindagi, shu jamiyatdagi bolalar tarbiyasi uchun ham mas'ulmiz. Bu masalaga shariatimiz ko'rsatmalarida e'tibor yuqori bo'lgan.
Shahobiddin PARPIYeV,
Asaka tumanidagi “Muhammadsolih” jome masjidi imom-xatibi.
Saudiya Arabistonida o‘tkazilayotgan xalqaro Qur’on tanlovida 133 davlat vakillari ishtirok etmoqda
Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi 7 avgust kuni Makka shahridagi musobaqalar o‘tkaziladigan joyda 133 davlatdan 334 nafar ishtirokchi (erkak va ayollar) ishtirokida boshlandi.
IQNA "Minbar" gazetasiga tayanib xabar berishicha, Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi bir kun avval Makkadagi musobaqalar o‘tkaziladigan joyda boshlangan va final bosqichini Masjidul Haromda o‘tkazish uchun zamin tayyorlagan.
Saudiya Arabistoni Islom ishlari, da’vat va hidoyat vazirligi tomonidan tashkil etilgan ushbu tadbirning saralash bosqichida hakamlar hay’atlari eng yuqori aniqlik va shaffoflik standartlariga rioya qilgan holda, Qur’on tilovati uslublari va qoidalariga ixtisoslashgan taniqli xalqaro hakamlar guruhi nazorati ostida erkak va ayol ishtirokchilarning chiqishlarini tinglab, final bosqichiga kimlar o‘tishini aniqladi.
Tanlovning joriy bosqichi 133 mamlakatdan 334 nafar ishtirokchi (erkak va ayollar) ishtirokida o‘tkazilmoqda, ular besh toifa: "Shatibiya" usuli bo‘yicha yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Vazirlik ushbu global qur’oniy tadbirning muvaffaqiyatini ta’minlash uchun elektron hakamlik tizimini joriy etish, ishtirokchilarni baholashda adolat va aniqlikni ta’minlash uchun tashkiliy va keng qamrovli platformani yaratish, shuningdek, ularga turli xil xizmatlarni taqdim etish kabi barcha imkoniyatlarini ishga solishda davom etadi.
Qirol Abdulaziz nomidagi xalqaro musobaqa dunyodagi eng yirik Qur’on musobaqalaridan biri hisoblanib, uning umumiy pul mukofotlari miqdori 10 million saudiya rialidan oshadi.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
