Shavkat Mirziyoev va Anvar Ibrohim ikki mamlakat rasmiy delegatsiyalari ishtirokida muzokara o'tkazdilar.

Shavkat Mirziyoev Malayziya bosh vaziri Anvar Ibrohim bilan ziyorat turizmi bo'yicha qo'shma dasturlarni amalga oshirish, shu jumladan, “Umra plyus” loyihasini ilgari surish choralarini muhokama qildi.

Bugun malayziyalik mehmon Toshkentga etib keldi. U Ko'ksaroy qarorgohida rasmiy kutib olindi. Shavkat Mirziyoev va Anvar Ibrohim ikki mamlakat rasmiy delegatsiyalari ishtirokida muzokara o'tkazdilar.

– Malayziya nafaqat Janubi-Sharqiy Osiyo mintaqasida, balki jahon miqyosida katta salohiyatga ega bo'lgan, jadal o'sib borayotgan davlatdir. Mamlakatingiz bilan aloqalarni sifat jihatidan yangi bosqichga ko'tarish asosiy maqsadimiz hisoblanadi, – dedi O'zbekiston prezidenti.

Muzokarada:

 • Siyosiy muloqot va parlamentlararo aloqalarni yanada mustahkamlash;
 • xalqaro tashkilotlar doirasida o'zaro qo'llab-quvvatlashni davom ettirish;
 • gumanitar va ta'lim dasturlarini amalga oshirish;
 • turizm va madaniy almashinuvni faollashtirish;
 • savdo-iqtisodiy va investitsiya sohalarida amaliy hamkorlik qilish;
 • O'zbekiston-Malayziya sanoat zonasini tashkil etish;
 • suvni tejash texnologiyalarini joriy etish;
 • meva-sabzavot mahsulotlarini etishtirish va qayta ishlash;
 • "Halol" standartlari bo'yicha sertifikatlashtirish masalalari bo'yicha hamkorlik;
 • axborot texnologiyalari, kambag'allikni qisqartirish va transport bog'liqligini kengaytirish sohasidagi sheriklik masalalari muhokama qilindi.

Shuningdek, "Markaziy Osiyo + ASYeAN" formatida tashqi ishlar vazirlari muloqotini tuzish taklifini ko'rib chiqish tashabbusi bildirildi.

Muzokaralar yakunlari bo'yicha O'zbekiston prezidenti va Malayziya bosh vaziri ko'p qirrali hamkorlikni chuqurlashtirish to'g'risidagi qo'shma bayonotni imzoladilar.

Ma'lumot o'rnida, "Umra plyus" loyihasida Saudiya Arabistoniga ziyoratga otlangan sayyohlar avval O'zbekistonga kelib, Imom al-Buxoriyni ziyorat qiladilar.