Qalbingizni salavot bilan ziynatlang!
Nabiy sollallohu alayhi va sallamning Azbo nomli tuyalari o'tlayotgan bo'lsa, o't-o'lanlar unga talpinar, yirtqich hayvonlar esa: “Sen Muhammadnikisan” deya undan yiroqlashardi. Rasulullohning vafotlaridan keyin shu tuyalari emay, ichmay qo'yadi...
Oysha roziyallohu anhodan rivoyat qilinadi: «Rasululloh alayhissalom: “Jabroil alayhissalom menga risolatni olib kelganida, qaysi tosh yoki daraxt yonidan o'tmayin: “Assalomu alayka, ya Rasulalloh!” der edi», deganlar (Imom Bazzor rivoyati).
Jobir roziyallohu anhu aytadi: “Masjid xurmoning g'o'lalaridan bino qilingandi. Nabiy alayhissalom xutba qilsalar, ana shu g'o'lalardan birining ustiga chiqar edilar. U zot alayhissalomga minbar yasab berilgach, o'sha g'o'laning o'n oylik bo'taloqdek ingraganini eshitdik”.
“Al-fiqhul akbar” asaridagi Ibn Abbosning “Muhammad alayhissalomning ashobini so'kmanglar. Ulardan har birining maqomi soat sayin yuksalgan, ya'ni Payg'ambar alayhissalom bilan bir soat birga bo'lish sizlarning qirq yillik amalingizdan yaxshiroqdir”, deganlarini eslasak, Payg'ambarimiz sollallohu alayhi va sallamning: “Sahobalarim yo'lchi yulduz kabidirlar. Ulardan qay biriga ergashsangiz, hidoyat topasiz” (Imom Doraqutniy rivoyati) hadisidagi mohiyatni yanada teranroq anglaymiz.
Sa'diy Sheroziyning hikoyatini o'qisak, buni yanada yaqqolroq his qilamiz:
“Hushbo'y sovunning hidiga mahliyo bo'lgan shoir farazan undan so'rabdi:
– Buncha xushbo'ylikni qayerdan olding?
– Aslida, men mushk ham, anbar ham bo'lmagan oddiy tuproqman. Bir muddat gulga hamrohu hamsuhbat bo'ldim. Atirgul butasi ostida bo'lganim tufayli uning kurtaklaridan oqib tushgan shudring tomchilari bilan namlandim. Shundan so'ng uning hidi menga o'rnashdi. Qalbingizni yayratgan bu ifor aslida atirguldan!..”.
Biz ham Rasululloh sollallohu alayhi va sallamga muntazam ravishda salavotlar aytib, salomlar yo'llasak, atirgulning ifori kabi ma'naviy olamimiz ziynatlanib boraveradi.
Mavjuda ABDULLOH qizi
Toshkentda Malayziya xalqaro Halal Fest ko‘rgazmasi o‘kazilishi rejalashtirilmoqda
O‘zbekiston va Malayziya o‘rtasida halol sanoati yo‘nalishidagi hamkorlik yangi bosqichga chiqmoqda. Qishloq xo‘jaligi vazirligida bo‘lib o‘tgan uchrashuvda ikki mamlakat vakillari “Malaysia–Uzbekistan International Halal Fest 2027” xalqaro forumi va ko‘rgazmasini Toshkent shahrida o‘tkazish istiqbollarini muhokama qildilar.
Malayziyaning TWOJ CREATIVE SDN BHD kompaniyasi delegatsiyasi tomonidan taqdim etilgan loyiha halol sanoati ekotizimini rivojlantirish, xalqaro biznes aloqalarini mustahkamlash hamda yangi investitsiya loyihalarini shakllantirishga qaratilgani bilan ahamiyatlidir.
Rejalashtirilayotgan festival doirasida xalqaro ko‘rgazma, biznes-forum va B2B uchrashuvlari, halol oziq-ovqat, turizm, moliya hamda ishlab chiqarish yo‘nalishlariga bag‘ishlangan maxsus ekspozitsiyalar, investitsiya sessiyalari, madaniy dasturlar va mahsulotlar taqdimotlarini tashkil etish ko‘zda tutilmoqda. Ushbu tadbir O‘zbekistonning halol mahsulotlar bozoridagi salohiyatini namoyish etish va mahalliy ishlab chiqaruvchilar uchun yangi eksport imkoniyatlarini yaratishga xizmat qilishi kutilmoqda.
Muzokaralar davomida JAKIM standartlari asosida halol sertifikatlashtirish tizimini rivojlantirish, mahalliy ishlab chiqaruvchilarni xalqaro bozorlarga olib chiqish, fermer va tadbirkorlar uchun o‘quv-seminarlar hamda malaka oshirish dasturlarini tashkil etish masalalari ham muhokama qilindi.
Tomonlar festivalni yuqori saviyada tashkil etish maqsadida tegishli vazirlik va idoralar, oliy ta’lim muassasalari, biznes hamjamiyati hamda tarmoq uyushmalarini jalb etgan holda qo‘shma “Yo‘l xaritasi”ni ishlab chiqishga kelishib oldilar.
Mutaxassislarning fikricha, “Malaysia–Uzbekistan International Halal Fest 2027” nafaqat ikki mamlakat o‘rtasidagi savdo-iqtisodiy aloqalarni mustahkamlaydi, balki investitsiyalarni jalb etish, halol sanoati infratuzilmasini rivojlantirish va oziq-ovqat xavfsizligini ta’minlash yo‘nalishidagi hamkorlikni yangi bosqichga olib chiqadigan muhim xalqaro maydonga aylanishi kutilmoqda.
O‘zbekiston musulmonlari idorasi Matbuot xizmati
