Saudiya nashri: O'zbekistonlik hojilarning ibodati mukammal bo'lishi uchun qanday xizmatlar ko'rsatilmoqda?!
O'zbekiston musulmonlari idorasi raisi muftiy, Shayx Nuriddin Holiqnazar hazratlari ikki mamlakat o'rtasidagi turli sohalardagi aloqalar rivojlanib borayotganini alohida ta'kidladilar. Hususan, Saudiya Arabistoni hojilarning ulug' ibodatni oson va qulay suratda bajarishiga ko'maklashish borasidagi xizmatlarni takomillashtirishga katta ahamiyat qarayotganini e'tirof etdi.
Muftiy hazratlari haj ziyoratchilariga ibodatlarini bajarish uchun ko'rsatilayotgan xizmatlar xilma-xilligiga e'tibor qaratib, ularning Makka va Madinaga safarlarini ko'plab dastur va tashabbuslar bilan boyitilgani haqida bunday dedi: "Allohning mehmonlariga ko'rsatiladigan xizmatlar natijasida taraqqiyot, farovonlik va rivojlanishga erishilmoqda".
Shayx hazratlari hojilar va ular uchun mas'ul bo'lganlarga har yili barcha hududlarda ko'plab xizmat, imkoniyat, loyiha va qulayliklarni ko'rib, xursand bo'layotganini qo'shimcha qildilar.
Diniy idora raisi o'ziga hamrohlik qilgan delegatsiya bilan o'zbekistonlik hojilarning Mino va Arafotdagi manzilgohlariga amalga oshirgan tashriflaridagi suhbatida Saudiya Arabistoni Podshohligi rahbariyati va mutasaddilarga hojilarning osoyishtaligini ta'minlash, ularga toat-ibodatlarini iymon va ixlos bilan mukammal bajarishlarida ko'rsatayotgan xizmatlari uchun tashakkur va minnatdorchiligini izhor etdilar.
O'zbekiston musulmonlari idorasi raisi o'rinbosari, Toshkent islom universiteti rektori, professor Muhammadolim Muhammadsiddiq barcha delegatsiyasi a'zolari ibodatlarini tinch va xotirjam ado etish uchun hojilarga qulaylik yaratish maqsadida yuqori darajadagi tayyorgarlik va barcha yordam ko'rsatish vositalaridan mamnun bo'lganini ta'kidladi.
Makkai mukarrama va muqaddas qadamjolarda xizmat ko'rsatish va infratuzilmaning barqaror rivojlanayotganini nazarda tutib: “Bu yil bilan o'tgan yil orasida turarjoy, yashash, transport va yo'llar bo'yicha katta farqni sezdik. Shuningdek, hojilarimiz uchun so'ragandan ham ko'p xizmatlarni ko'rdik. Buning uchun Saudiya hukumatiga Allohning mehmonlari va islom ummatiga ko'rsatayotgan xizmatlari uchun minnatdorchilik bildiramiz”, deya qo'shimcha qildi”.
Bu yil O'zbekistondan haj ibodatini ado etuvchilar soni 15 ming nafarga etgani, O'zbekistondan hojilar kelish adadi yil sayin muttasil ortib borayotgani va kelgusida ularning adadi ko'payishini ma'lum qildi.
Professor Muhammadolim Muhammadsiddiq ikki davlat o'rtasidagi rivojlangan aloqalarga to'xtalib, mamlakati saudiyaliklarga Buxoro, Samarqand, Hiva va Toshkent singari tarixiy shaharlardagi sayyohlik hududlarini ziyorat qilishi uchun 90 kun muddatga vizasiz ruxsat berayotgani va o'z navbatida O'zbekistondan kelgan haj va umra ziyoratchilarining Saudiya Arabistoniga kirish vizasi juda oson kechayotganini ta'kidladi.
“Ash-Sharq al-Avsat” gazetasi asosida
Ilyosxon domla Ahmedov tayyorladi
Muhimi qalbdagi narsa, cho‘ntakdagi emas
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Bir kishi Nabiy sollallohu alayhi vasallamga kelib: «Men qiynalgan kishiman», dedi. Ya’ni, och ekanini bildirdi.
Nabiy sollallohu alayhi vasallam xotinlaridan biriga ovqat so‘rab odam yubordilar. «U zotni haq ila jo‘natgan zotga qasam ichib aytamanki, uyimda suvdan boshqa hech narsa yo‘q!» dedi u.
Xuddi shunday qilib barcha xotinlariga ovqat so‘rab odam jo‘natdilar. Ularning bari yuqoridagidek javob berdi. Shunda Rasululloh sollallohu alayhi vasallam: «Bu kecha bu odamni kim mehmon qiladi, Alloh unga rahm qilsin», dedilar. Shunda ansorlardan bir kishi turib: «Yo Allohning Rasuli! Uni men mehmon qilaman», dedi. So‘ngra uni uyiga olib ketdi. Borib xotiniga bunday dedi:
— Bu odam Rasululloh sollallohu alayhi vasallamning mehmonlari. Unga taom hozirla!
Xotin dedi:
— Bolalarimizning ovqatidan boshqa ovqat yo‘q.
Er dedi:
Bolalaringni uxlatib ovqatni olib kel. Mehmon ovqatga qo‘l uzatganida chiroqni o‘chirib qo‘y. Biz qorong‘ida o‘zimizni ovqat yeyayotgandek ko‘rsatamiz. Ammo yemaymiz. Mehmon shunda ozgina ovqatga to‘yadi.
Ular shunday qilib och uxlashdi. Mehmon to‘ydi. Ertalab ular Rasululloh sollallohu alayhi vasallamning huzurlariga borishgach, u zot dedilar:
— Alloh taolo sizning ishingizdan ajablandi. Siz haqingizda Qur’on nozil qildi:
«Garchi o‘zlarining hojatlari bo‘lsa ham (boshqalarni) o‘zlaridan ustun ko‘radilar. Kim o‘z nafsining baxilligidan saqlansa, unday kishilar ha, ana o‘shalar najot topguvchilardir» (Hashr surasi, 9-oyat).
Dunyo charxpalakdir. Zamon aylanib turadi. Bugun puling bor. Ertaga yo‘q, ishing orqaga ketadi. Bugun faqirsan, ammo ertaga boyib ketishing mumkin. Faqirlik ayb emas, boylik fazilat emas.
Muhimi qalbdagi narsadir, cho‘ntakdagi emas. Muhimi insonning boylik va faqirlik paytidagi axloqidir.
Tasavvur qilyapsizmi, Rasululloh sollallohu alayhi vasallamning hech bir ayollari uyidan ovqat topilmayapti! U kishi Allohning Rasuli bo‘lish bilan birga davlat rahbari ham edilar. Uylarida suvdan boshqa hech vaqo yo‘g‘-a?!
Faqirlikni uqubat, boylikni esa mukofot deb o‘ylashdan ehtiyot bo‘ling. Dunyo bor-yo‘g‘i imtihon, xolos. Imtihon savollari qanchalar qiyin bo‘lmasin, o‘tirib qolmang.
Aqlli inson boshqalarning hojatini chiqarishga harakat qiladi. Ularni qiyin ahvolda qoldirmaydi. Kishilarga ehson qilganingizda ular o‘zini aybdor va nuqsonli sanashmasin!
Bemor kishining faqirligini bilib qolsangiz, u so‘rashidan oldin ahvolidan xabar olishingiz oqilona ishdir. Ba’zilarning iffati so‘rashdan to‘sadi. In’omning eng afzali insonlarning iffatni ehtirom qilib, obro‘larini muhofaza qilib berilgan in’omdir!
Ehson qilishning ham odoblari bor. Bir kishiga hammaning oldida sadaqa yoki ehson bersangiz, uni xijolatga qo‘yasiz, iffatini jarohatlaysiz, ojizligini yuziga solgandek bo‘lasiz... Bunaqa sadaqa-ehson qilgandan ko‘ra, qilmaganing afzaldir!
Yuqorida keltirilgan ansoriyning odobiga boqing. Ovqati ozligi uchun xotiniga chiroqni o‘chirishni buyurdi. Maqsadi mehmonni xijolat qilmaslik edi. Chiroq yonib turganida mehmon ovqatning kamligini ko‘rib, uyalib, ovqat barchaga yetishi uchun ehtimol to‘yib yeya olmasdi.
Kishilardan noqulaylikni ketkazish ham ularni xotirjam qilishdir. Xotirjam qilish esa, ibodatdir!
«Nabaviy tarbiya» kitobi asosida tayyorlandi