Shu yil 12-18 iyun' kunlari O'zbekiston musulmonlari idorasining bir guruh voiz imom-xatiblari Rossiya va Qozog'iston davlatlarida vaqtincha yashab turgan vatandoshlarimiz bilan birga Qurbon hayitini o'tkazish va ularga ma'rifiy suhbat qilish maqsadida ushbu mamlakatlarda bo'lib turibdi.

Hususan, Toshkent shahar Chilonzor tumanidagi "Hasanxon qori" jome masjidi imom-xatibi Najmiddin domla Hasanov Moskva shahridagi elchixona va mamlakatimizdagi tashqi migratsiya xodimlari bilan qurilish sohasida mehnat qilayotgan hamyurtlarimiz bilan uchrashuv o'tkazdi.

Ana shunday uchrashuv O'zbekistonning Olmaota shahridagi elchixonasida Toshkentdagi "Hofiz Ko'hakiy" jome masjidi imom-xatibi Sherali domla Toshmatov va Samarqanddagi "G'ovsul A'zam" jome masjidi imom-xatibi To'lqin domla Isayev ishtirokida mazkur mamlakatda vaqtincha mehnat qilayotgan hamyurtlarimiz bilan ham bo'lib o'tdi.

Mazkur ma'rifiy suhbatlarda Qurbon hayitini munosib o'tkazish bo'yicha tavsiyalar berib, shari'y masalalardagi savollarga javob bermoqdalar. Shuningdek, yurtimizdagi so'nggi o'zgarishlarni bayon etish barobarida e'tiqodda adashib qolmaslik maqsadida dinimizdagi ishonchli manbalarni o'rganish bo'yicha ma'lumot berildi. 

O'zbekiston musulmonlari idorasi
Matbuot xizmati