Ziyoratchilar uchun birinchi elektron hamyon ishga tushirildi
Saudiya Arabistoni Haj va umra vazirligi mamlakat Milliy banki bilan hamkorlikda Haj va umra ziyoratchilari uchun maxsus ishlab chiqilgan “Nusuk Wallet” nomli birinchi xalqaro raqamli hamyonni ishga tushirdi. Bu haqda “IQNA” sayti “Golf News” ga tayanib xabar berdi.
Nusuk hamyoni o'tgan seshanba kuni Haj va umra vaziri Tavfiq ar-Rabia' ishtirokida rasman ishga tushirildi.
Ushbu innovatsion raqamli hamyon ziyorat safarlari paytida moliyaviy ishlar va xarajatlarni boshqarish uchun keng qamrovli echimni taklif etadi. “Nusuk Wallet” foydalanuvchilarning moliyaviy operatsiyalari uchun maksimal xavfsizlikni ta'minlash uchun ilg'or texnologiya va shifrlash usullaridan foydalanadi.
Saudiya Arabistoni Haj va umra vazirligining Raqamli tajriba bo'yicha direktori Ahmad bin Sulaymon Al-Maymen ushbu harakat muhimligini ta'kidlab, uni oltita asosiy yutuq keltiradigan burilish nuqtasi deb atadi.
Al-Maymen ta'kidlaganidek, hamyoni zamonaviy texnologiyalarning foydalanuvchi funktsiyalari, jumladan, sun'iy intellekt, shifrlash va biometrik autentifikatsiya kabi ilg'or funktsiyalarga ega.
Qayd etish joizki, bu Haj va umra ziyoratchilari uchun mo'ljallangan birinchi xalqaro raqamli hamyon va bank kartasi bo'lib, ularning egalari uchun qulaylik va xavfsizlikning yangi davrini ochadi. Raqamli hamyon - bu elektron to'lovlar, chiptalar va elektron hujjatlarni sotib olish uchun ishlatiladigan onlayn xizmat yoki dastur hamdir.
O'zbekiston musulmonlari idorasi xodimi
Ilyosxon Ahmedov tayyorladi.
Hijriy yangi yilingiz muborak bo‘lsin!
2025 yilning 26 iyun kuni – yangi 1447 hijriy yil – Muharram oyi boshlanishining 1 kunidir. Ashuro kuni 2025 yilning 5 iyul, shanba kuniga to‘g‘ri keladi.
Muharram oyi qanday oy?
Muharram oyi – musulmonlar taqvimining birinchi oyidir. Bu oy Alloh taolo urush, qon to‘kishni harom qilgan (Zulhijja, Zulqa’da, Muharram, Rajab) to‘rt oyning biri bo‘lib, uning o‘ninchi kuni ya’ni, ashuro kuni alohida fazilatlarga ega.
Ashuro qanday kun?
Bu kun haqida Rasululloh sollallohu alayhi vasallam: “Bu shunday yaxshi kundirki, bu kunda Alloh Bani Isroilni dushmanlaridan qutqargan. Shu bois Muso alayhissalom bu kunda ro‘za tutgan. Men Musoga ko‘proq (yaqin bo‘lishga) haqliroqman”, dedilar va u kunda ro‘za tutib, odamlarni ham uning ro‘zasini tutishga buyurdilar” (Imom Buxoriy rivoyati).
Ashuro kuni ro‘za tutish o‘tgan bir yillik gunohlarga kafforat bo‘ladi.
Bu haqda Rasululloh sollallohu alayhi vasallam: “Ashuro kunining ro‘zasi – Allohdan umid qilamanki – bir yil oldingi gunohlarga kafforat bo‘ladi”, deganlar (Imom Muslim rivoyati).
Bu kun yaqinlarga kengchilik qilish, bir yillik kengchilikka sabab bo‘ladi.
Abu Sa’d roziyallohu anhudan rivoyat qilinadi. Nabiy sollallohu alayhi vasallam: “Kim Ashuro kuni ahli ayoliga kenglik yaratsa, Alloh unga yil bo‘yi kenglik yaratadi”, dedilar (Imom Bayhaqiy rivoyati).
Sufyon ibn Uyayna rahmatullohi alayh: “Bu hadisni oltmish yil tajriba qildim va faqatgina yaxshilik ko‘rdim”, deganlar.
Ashuro kunini Rasululloh sollallohu alayhi vasallam qanday o‘tkazardilar?
Rasululloh sollallohu alayhi vasallam bu kunni o‘tkazib yubormaslik uchun qattiq harakat qilardilar, uning savobiga erishish uchun bu kunning kelishini intiqlik bilan kutardilar. Bu haqda Ibn Abbos roziyallohu anhu aytadilar: “Rasululloh sollallohu alayhi vasallamni Ashuro kuni ro‘zasini Ramazon oyi ro‘zasini kutib sog‘ingandek, boshqa kun va oy ro‘zasini kutganlarini ko‘rmadim” (Imom Buxoriy, Imom Muslim rivoyati).
Abdulloh ibn Abbos roziyallohu anhudan rivoyat qilinadi. Rasululloh sollallohu alayhi vasallam Ashuro kuni ro‘zasini tutib, odamlarni ham bu kunning ro‘zasini tutishga buyurganlarida, sahobalar: “Yo, Rasululloh! Bu kun yahudiy va nasroniylar ulug‘laydigan kun-ku!” deyishdi. Shunda Rasululloh sollallohu alayhi vasallam: “Alloh xohlasa kelasi yil to‘qqizinchi kuni ham tutamiz”, dedilar. Ammo, kelasi yil kelmasidan Rasululloh sollallohu alayhi vasallam vafot etdilar (Imom Muslim rivoyati).
Ulamolarimiz Rasululloh sollallohu alayhi vasallamning ushbu niyatlariga e’tiboran, Ashuro kuniga qo‘shib bir kun oldingi yoki bir kun keyingi kunda ham ro‘za tutmoq afzal deydilar.
Alloh taolo ushbu oyning fazilatlaridan barcha mo‘min-musulmonlarni to‘liq bahramand etsin. O‘zining roziligini topadigan amallarda bardavom qilsin.
O‘zbekiston musulmonlari idorasi
Matbuot xizmati
