Ikki buyuk ne'mat
Bizga ko'p narsa o'z-o'zidan bo'lib qolayotgandek tuyulaveradi. Go'yo tinchlik, osudalik ham o'z maromidadek. Lekin bu ikki ne'matning bardavom bo'lishi hammaga bog'liq. Irmoqlar qo'shilib soy, soylar qo'shilib daryo va dengiz bo'lgani singari har kim o'z uyini asrashi, mahallasi osudaligiga hissa qo'shishi natijasida butun yurtning tinchligi ta'minlanadi, aslida.
Bugun Toshkent viloyati bosh imom-xatibi Jasurbek domla Raupov Bo'ka tumani "Toshloq" masjidiga tashrif buyurdi.
Jamoat bilan uchrashib, dildan suhbatlashgan Jasurbek domla ularga "Tinchlik va osudalikni ta'minlash - savobi ulug' amal" mavzusida mav'iza qilib berdi.
Masjidda namozxonlarga yaratilgan shart-sharoit ko'zdan kechirildi. Zarur tavsiyalar berildi.
Hayrli duolar bilan tashrif nihoyasiga etdi.
Toshkent viloyati vakilligi
Matbuot xizmati
Ar-Riyozda o‘zbek miniatyura san’ati ko‘rgazmasi ochildi
Saudiya Arabistoni poytaxtida O‘zbekiston Mustaqilligining 35 yilligiga bag‘ishlangan “Miniatyura san’ati: Buxorodan Arabiston yarim oroligacha. Muqaddas qadamjolar yo‘lidagi tarix” nomli madaniy kecha va ko‘rgazmaning ochilish marosimi bo‘lib o‘tdi, deb xabar bermoqda “Dunyo” AA muxbiri.
Tadbir O‘zbekiston elchixonasi tomonidan tashkil etildi. Unda diplomatik korpus, davlat idoralari, ommaviy axborot vositalari vakillari, madaniyat va san’at arboblari ishtirok etdi.
Ko‘rgazmada o‘zbek ustalarining 35 ta ijodiy ishi namoyish etilib, ular tashrif buyuruvchilarni O‘zbekiston miniatyura rangtasviri tarixi, badiiy xususiyatlari va an’analari bilan tanishtiradi.
O‘zbekiston elchisi Nodirjon Turg‘unov xalqlar o‘rtasidagi o‘zaro anglashuvni mustahkamlash va o‘zbek-saudiya madaniy-gumanitar aloqalarini rivojlantirishda madaniyatning o‘rnini ta’kidladi.
“AlMashtal” kreativ markazi rahbari, malaka Nura bint Saud bin Naif Al Saud O‘zbekistonni mustaqillikning 35 yilligi bilan tabriklab, miniatyura san’atini islom badiiy merosining bir qismi sifatida saqlab qolish ahamiyatini alohida qayd etdi.
Tadbir doirasida ta’lim va san’at sohasidagi hamkorlik istiqbollari ham muhokama qilindi. Saudiya universitetlari vakillari Kamoliddin Behzod nomidagi Milliy rassomlik va dizayn instituti bilan akademik almashinuvlar, qo‘shma tadqiqotlar va kasbiy aloqalarni o‘z ichiga olgan sheriklikni yo‘lga qo‘yishdan manfaatdor ekanliklarini bildirdilar.
Ko‘rgazma tashrif buyuruvchilar uchun ikki kun davomida ochiq bo‘ladi. Shuningdek, o‘zbek mutaxassislari rahbarligida 35 nafar saudiyalik havaskor rassomlar va yosh ustalar uchun amaliy mahorat saboqlari o‘tkaziladi.
O‘zbekiston musulmonlari idorasi Matbuot xizmati
