Dunyodagi mashhur “Al-Azhar” islom universiteti Tailandda dinlarning tinch-totuv yashashni targ'ib etishiga bag'ishlangan konferentsiya o'tkazishni rejalashtirmoqda. Unga jahonning yirik diniy konfessiyalar rahbarlari taklif etiladi, deb xabar bermoqda, “Arab News” nashri.
Anjumandan ko'zlangan maqsad – o'zaro birdamlikni mustahkamlash, dinlar o'rtasidagi muloqotni rivojlantirish, tinchlik va bag'rikenglik masalalarini muhokama qilishdan iborat.
Mazkur xalqaro tadbirni muvofiqlashtirish maqsadida “Al-Azhar” majmuasi raisi, doktor Ahmad at-Toyyib Bangkokda Tailand qiroli Maxa Vajiralongkorn va qirolicha Suthida bilan suhbatda bo'ldi.
Uchrashuvda “Al-Azhar” universitetida tailandlik talabalar sonini oshirish va mamlakatdagi islom markazlariga universitet dasturiga muvofiq dars o'tishga ruxsat berish bo'yicha kelishuvga erishildi, deb yozadi, “Arab News”.
Bundan tashqari, doktor Ahmad at-Toyyib Tailandda arab tilini o'rganish markazlarini ochishga tayyorligini ma'lum qildi va Tailand imomlarini “Al-Azhar”da malaka oshirish uchun o'qishga taklif qildi.
O'zbekiston musulmonlari idorasi xodimi I.Ahmedov tayyorladi.
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Sayyid Sulaymon Nadaviy rahmatullohi alayhning ilm va fazllari mashhur bo‘layotgan va shuhrat qozonayotgan edi. U kishi o‘zlarining voqealarini quyidagicha so‘zlab beradilar: «Men «Siyratun-Nabiy sollallohu alayhi vasallam» kitobini olti jild qilib tamomladim. «Muhtaram Zotning siyratlaridagi biror jilva yoki ko‘rinish mening hayotimda ham bo‘lganmi yoki yo‘q? Agar bo‘lmagan bo‘lsa, u holda qanday bo‘ladi?» degan o‘y qayta-qayta qalbimda tinchlik bermas edi. Shu maqsad uchun Allohning biror valiysini qidirdim.
Thana Bhavandagi xonaqohda yashaydigan va Alloh taolo fayzlarini taratib qo‘ygan Mavlono Ashraf Ali Tahonaviy hazratlari haqida eshitgan edim. Shunday qilib, bir kuni Thana Bhavanga borishni niyat qildim va safarga chiqdim. Borib, hazrat bilan ko‘rishdim va bir necha kun u yerda turdim. Ortga qaytayotganimda hazrat Tahonaviy rahmatullohi alayhga: «Hazrat! Biror nasihat qiling», dedim. U zotning xayollariga o‘sha payt: «Shunday katta allomaga nima nasihat qilaman? Ilm va fazli butun dunyoga mashhur bo‘lsa», degan o‘y kelibdi. Keyin: «Ey Alloh! Qalbimga uning uchun ham foydali bo‘lgan va mening uchun ham foydali bo‘lgan narsani sol», deb duo qilibdi. Shundan keyin hazrat Tahonaviy rahmatullohi alayh Sayyid Sulaymon Nadaviy rahmatullohi alayhga xitob qilib: «Ey birodar! Bizning yo‘limizda boshidan oxirigacha o‘zingizni xokisor tutishingiz kerak», debdilar.
Sayyid Sulaymon Nadaviy rahmatullohi alayh aytadilar: «Hazrat Tahonaviy rahmatullohi alayh bu so‘zlarni aytayotganlarida qo‘llarini ko‘ksilariga olib borib, past tarafiga bir zarba berdilar, zarba xuddi mening qalbimga tushgandek bo‘ldi».
Hazratimiz Doktor Abdulhay rahmatullohi alayh aytadilar: «Bu voqeadan keyin Sayyid Sulaymon Nadaviy rahmatullohi alayh o‘zlarini shunday xokisor tutdilarki, uning misli topilishi qiyin edi. Bir kuni qarasam, xonaqohning tashqarisida hazrat Sayyid Sulaymon Nadaviy rahmatullohi alayh majlisga kelganlarning oyoq kiyimlarini tartiblayotgan ekanlar. Shunday tavoze’ va muhabbatni Alloh taolo u kishining qalbida paydo qildi va keyin yuksak darajalarga ko‘tarib qo‘ydi».
«Nasihatlar guldastasi» kitobidan