Bugun, 3 oktyabr' kuni O'zbekiston musulmonlari idorasi raisining birinchi o'rinbosari Homidjon domla Ishmatbekov Dog'iston Respublikasi delegatsiyasi vakillarini qabul qildi.

Uchrashuvda Homidjon domla Ishmatbekov mehmonlarni tashrif bilan qutlab, mamlakatimizda diniy ma'rifiy sohada amalga oshirilayotgan keng ko'lamli ishlar haqida so'z yuritdi. Hususan, diyorimiz mo'min-musulmonlari ibodatlarini emin-erkin ado etish uchun munosib sharoitlar yaratish, Islom dinining asl mohiyatini aholiga etkazish hamda butun dunyoga tanitish borasida ulkan sa'y-harakatlar amalga oshirilayotganini alohida ta'kidladi.

Shuningdek, Homidjon domla Dog'iston delegatsiyasi vakillarini O'zbekiston musulmonlari idorasi faoliyati bilan tanishtirib, keyingi paytda Fatvo bo'limi alohida markazga aylangani, haj kvotasi yildan yilga ortib borayotgani, umra bo'yicha cheklovlar bekor qilingani va yil davomida ziyoratlar tashkil etilayotganini ma'lum qildi. So'ngra yurtimizda keyingi yillarda jome masjidlar soni ko'payib, ular ibodat va ma'rifat maskaniga aylanayotgani, diniy ta'lim muassasalari soni va o'qitish sifati yanada oshib borayotganini ham qayd etib o'tdi.

O'z navbatida, Dog'iston Respublikasi muftiyati vakili Murod Ismoilov samimiy qabul uchun minnatdorlik bildirib mamlakat muftiysi Shayx Ahmad Abdullayevning salom va Mavlid oyi tabrigini etkazdi. Shuningdek, u O'zbekistonda diniy jabhadagi o'zgarish va o'zaro yaqin hamkorlik aloqalaridan Dog'iston tomoni juda mamnun ekanini bildirdi.

Dog'istonlik mehmonlar so'zi davomida O'zbekistonni alohida ehtirom bilan qadrlashi, buning boisi bu diyordan Islom dini rivojiga ulkan hissa qo'shgan zabardast ulamolarni etish chiqqani, xususan, respublikadagi ko'plab mo'min-musulmonlar aqida borasida Imom Moturidiy, tasavvuf bo'yicha Naqshbandiy tariqati yo'lini tutganlarini bayon etdi. Shuningdek, sinovli kunlarda ko'plab dog'istonlik bolalarga o'zbek xalqi o'z bag'ridan joy berib, mehr ko'rsatganini ehtirom bilan tilga oldi.

Camimiy muloqot davomida diniy-ma'rifiy soha vakillarining o'zaro yaqin hamkorligi ikki tomon uchun ham manfaatli va dinimiz rivojiga ham turtki bo'lishi aytib o'tildi.

Do'stona ruhda o'tgan uchrashuv so'ngida o'zaro hadyalar almashildi.

O'zbekiston musulmonlari idorasi
Matbuot xizmati