Bismillahir Rohmanir Rohiym
Bugun 20 iyul kuni Imom Buxoriy xalqaro ilmiy tadqiqot markazida “Imom Buxoriyning islom sivilizatsiyasi rivojiga qo‘shgan hissasi” mavzusida ilmiy-amaliy konferensiya o‘tkazildi. Unda O‘zbekiston Islom sivilizatsiyasi markazi, Imom Buxoriy xalqaro ilmiy tadqiqot markazi, O‘zbekiston musulmonlari idorasi, Imom Buxoriy hadis maktabi rahbarlari, ilmiy jamoalar, olimlar, ilmiy xodimlar, davlat va jamoat tashkilotlari hamda jamoatchilik vakillari, nuroniylar ishtirok etdi.
Anjumanda Imom Buxoriy merosining ilmiy ahamiyatini, islom ta’limoti asoslaridan bo‘lgan hadislarni jamlab, ulardan ishonchlilarini saralab bergan buyuk muhaddis olim hayoti va ilmiy yo‘lini chuqur o‘rganish va jamoatchilik orasida zamonaviy usullarda keng targ‘ib qilish zaruratini alohida qayd etildi.
Konferensiyada O‘zbekiston musulmonlari idorasi raisi o‘rinbosari Zayniddin domla Eshonqulov so‘zga chiqib, Imom Buxoriyning xizmatlarini e’tirof etib, u zot qoldirgan boy meros islom olami uchun alohida faxr ekanini ta’kidladi. Mamlakatimizda buyuk vatandoshimiz Imom Buxoriyning boy ilmiy merosini puxta o‘rganish, keng targ‘ib va tashviq qilish va hayotga tatbiq etish borasida keng ko‘lamli ishlar olib borilayotgani, ilmiy-ijodiy faoliyatlari bilan bir qatorda ul zotning hayotlari, axloq-odoblari, yuksak insoniy fazilatlarida biz uchun ibrat, namuna ekanini qayd etib o‘tdi.
Konferensiya yakunida Imom Buxoriy majmuasida allomaning “Sahihi Buxoriy” asari xatm qilindi.
O‘zbekiston musulmonlari idorasi Matbuot xizmati
Bugun O‘zbekiston xalqaro islomshunoslik akademiyasida O‘zbekiston Respublikasi Prezidentining "O‘zbekiston – 2030" strategiyasi to‘g‘risida"gi farmoni ijrosini ta’minlash maqsadida "Radikallashuv va yot g‘oyalarga qarshi kurashish hamda axborot iste’moli madaniyatini shakllantirish" o‘n kunligi loyihasi doirasida "Soxta salafiylik: tarixi, g‘oyasi, belgisi, xatarlari" mavzusida ma’naviy-ma’rifiy tadbir o‘tkazildi.
Tadbirda bir qator mutasaddi tashkilotlar vakillari qatorida O‘zbekiston musulmonlari idorasi raisi o‘rinbosari Muhammadolim Muhammadsiddiqov ham ishtirok etdi.
"Ziyo" media markazi bilan hamkorlikda tashkil etilgan ushbu o‘n kunlik tadbirlaridan maqsad – yoshlarni radikalizm, terrorizm, ekstremizm, soxta da’volar, g‘arazli da’vatlar, axborot xurujlari, mafkuraviy tazyiqlar, ommaviy madaniyat ta’siridan himoyalash, ularda vatanparvarlik, sadoqat tuyg‘ularini shakllantirishdir.
Tadbir mavzularini keng va atroflicha yoritib berish uchun ijtimoiy-siyosiy, diniy, madaniy-ma’rifiy sohada o‘z sohasining yetakchi ekspertlari ma’ruzalari bilan qatnashdi.
Aytish mumkinki, davlatimiz rahbarining: “Biz jamiyatimizda har qanday radikallashuvga, yoshlarimiz ongini buzg‘unchi yot g‘oyalar bilan zaharlashga, dindan siyosiy maqsadlarda foydalanishga, ma’rifat o‘rnini jaholat egallashiga yo‘l qo‘ymaymiz”, degan so‘zlari o‘n kunlikning shioriga aylangan.
Tadbir yakunida talabalar o‘zlarini qiziqtirgan savollar bilan murojaat qilishdi.
O‘zbekiston musulmonlari idorasi
Matbuot xizmati